قازىرگى تاڭدا استانادا كولىك جۇكتەمەسىن ازايتۋ ماقساتىندا شاعىن اينالما جولدار قۇرىلىسى قارقىندى جۇرگىزىلۋدە.
بۇگىندە قالا حالقى ميلليونعا جەتىپ, مەگوپوليسكە اينالدى. كولىكتىڭ سانى دا ءوسىپ, كەپتەلىس پايدا بولدى. سول تىعىرىقتان شىعۋ ءۇشىن ەلوردا اكىمدىگى بىرقاتار جوبانى قولعا العان. اسىرەسە, كىشى اينالما جولدىڭ قۇرىلىسى كولىك جۇكتەمەسىن شەشۋگە مۇمكىندىك بەرمەك. ونىڭ جالپى ۇزىندىعى – 35,0 كم. كىشى اينالما جول تاۋلىگىنە 90 مىڭنان اسا اۆتوكولىكتى وتكىزۋگە قابىلەتتى. 2021 جىلى 20 مىڭ اۆتوكولىك قالا ورتالىعىن اينالىپ وتەدى دەپ جوسپارلانۋدا.
«بيىل قوشقارباەۆ كوشەسىنىڭ قۇرىلىسىن تولىعىمەن اياقتايمىز. سونداي-اق, بەيسەكوۆا كوشەسىنىڭ سىعاناق كوشەسىنەن ۇلى دالا كوشەسىنە دەيىنگى ۇزىندىعى 2,9 شاقىرىمدىق ۋچاسكەسىن سالۋ جالعاسادى. سارايشىق كوشەسىنىڭ تۇران داڭعىلىنان بەيسەكوۆا كوشەسىنە دەيىنگى ۇزىندىعى 3 كم قۇرايتىن بولىگى اشىلادى. مۇنىمەن قوسا, بيىل ۇزىندىعى 10,5 كم قۇرايتىن 11 كوشە پايدا بولادى, ونىڭ ىشىندە 48 كم ينجەنەرلىك جەلى – جىلۋ تراسساسى, سۋ قۇبىرى, كارىز جۇيەسى, بايلانىس كابەلى تارتىلادى» دەپ گازەتىمىزگە بەرگەن سۇحباتىندا اۆتوموبيل جولدارى باسقارماسى باسشىسىنىڭ ورىنباسارى بولات ساۋلەباەۆ ايتقان ەدى.
سونىمەن بىرگە ش.بەيسەكوۆا پەن ن.تىلەنديەۆ داڭعىلى قيىلىسىندا كولىكتىك اينالما جول قۇرىلىسىن جۇرگىزۋ جۇمىستارى قالالىق بيۋدجەتتەن قارجى بولىنگەندە جۇزەگە اسادى دەپ كۇتىلۋدە.
جالپى, جول ساپاسى كولىك سانىنا بايلانىستى. ماسەلەن, ەلوردادا 400 مىڭنىڭ شاماسىندا اۆتوكولىك بار. ايتالىق, 7 مىڭ كولىك جولدىڭ ءبىر جولاعىمەن جۇرگەندە, ول جول 5 جىلدان كەيىن كۇردەلى جوندەۋدى تالاپ ەتەدى. ال استانادا ءبىر جولاقپەن 30 مىڭ كولىككە دەيىن جۇرەدى ەكەن.
سونداي-اق, بولات ساۋلەباەۆتىڭ ايتۋىنشا, بيىل «ارىس» جانە «ارقار» كوپىرلەرىنىڭ كولىك جۇرەتىن بولىكتەرىنە اعىمدىق جوندەۋ جۇمىستارى باستالماق. العاشقىسىندا كولىك جۇرەتىن بولىك 2009 جىلدان بەرى جوندەلمەگەن. باسقارما ماماندارى جىل سايىن قالاداعى بارلىق كوپىرلەردى تەكسەرىپ وتىرادى. ەگەر اقاۋلار تابىلعان جاعدايدا جوندەۋ جۇرگىزىلەدى.
بۇگىندە باس قالادا 20 كوپىر بار. سوڭعى كوپىر 2013 جىلى ش.بەيسەكوۆا كوشەسىندە پايدالانۋعا بەرىلگەن. ولار ەسىل وزەنى ارقىلى قالانىڭ وڭ جاعالاۋى مەن سول جاعالاۋىن جالعاپ جاتىر. اتاۋلارى دا ۇلتتىق بولمىستان سىر تارتادى. «ارىس», «ارقار», «مارال» تۇران داڭعىلى مەن سارىارقا كوشەسىن قوساتىن «تۇلپار» جانە قابانباي باتىر داڭعىلى مەن باراەۆ كوشەسىن جالعاعان «قاراوتكەل» كوپىرلەرى كومپوزيتسيالىق جاعىنان كوشپەندىلەر وركەنيەتىنىڭ باي تاريحىن باياندايدى.
ازامات ەسەنجول
