كەشە ماحامبەت وتەمىسۇلى اتىنداعى وقۋشىلار سارايىندا استانا قالاسى ءبىلىم باسقارماسىنىڭ ۇيىمداستىرۋىمەن ءى رەسپۋبليكالىق «اكەلەر وداعى» سلەتى ءوتتى.
2011 جىلى استاناداعى №59 مەكتەپ-ليتسەيدىڭ جانىنان اكەلەر كەڭەسى قۇرىلعان بولاتىن. ءبىر جىلدان كەيىن بۇل ۇيىم «اكەلەر وداعى» قوعامدىق بىرلەستىگى بولىپ قايتا قۇرىلدى. وداق مۇشەلەرى جىل سايىن قالالىق اكەلەر سلەتىن وتكىزىپ, ۇرپاق تاربيەسىندەگى ماڭىزدى ماسەلەلەر توڭىرەگىندە پىكىر الماساتىن. بيىل اتالمىش شارا تۇڭعىش رەت رەسپۋبليكالىق دەڭگەيدە ءوتىپ, وعان ەلىمىزدىڭ تۇكپىر-تۇكپىرىنەن دەلەگاتتار جينالدى.
پلەنارلىق وتىرىستان سوڭ ءتورت سەكتسيا بويىنشا جۇمىس جۇرگىزىلدى. وندا ۇرپاققا رۋحاني-ادامگەرشىلىك, پاتريوتتىق تاربيە بەرۋ, بالالاردى سالاۋاتتى ءومىر سالتىنا تارتۋ ماسەلەلەرى قوزعالىپ, جەتكىنشەكتەردىڭ ءومىرىن قورعاۋ ءۇشىن نە ىستەۋ كەرەكپىز دەگەن سۇراقتىڭ توڭىرەگىندە اڭگىمە ءوربىدى.
ءسوز سويلەۋشىلەر – «نۇر وتان» پارتياسى قالالىق فيليالى توراعاسىنىڭ ورىنباسارى مەيرامباي ورالوۆ شارانىڭ ماڭىزدىلىعىن اتاپ ءوتتى. قازاقستان-رەسەي ۋنيۆەرسيتەتىنىڭ جانىنان جۇمىس ىستەيتىن «ابايتانۋ» عىلىمي-تانىمدىق ورتالىعىنىڭ ديرەكتورى الماحان مۇحامەتقاليقىزى اباي مەن قۇنانبايدى مىسالعا الىپ, بالا تاربيەسىندەگى اكەنىڭ الاتىن ءرولىن اشتى. قان تازالىعى, تەك ۇعىمدارىنىڭ قۇر ءسوز ەمەستىگىن دايەكتەدى. تەبىرەنىپ سويلەگەن پارلامەنت ءماجىلىسىنىڭ دەپۋتاتى, حالىق قاھارمانى باقىتجان ەرتاەۆ: «ءاربىر شاڭىراقتىڭ ءوزىنىڭ تاريحى بار. تاريحسىز اۋلەت جوق. بابابالارىمىز, اتالارىمىز «جەتى اتاڭدى ءبىل. سەنىڭ اتاڭ وسىنداي بولعان! اناۋ اقساقالعا بارىپ سالەم بەر» دەپ ايتىپ, بىزگە قانداي كەرەمەت ۇلگى كورسەتىپ كەتتى!» دەدى. ءوزىنىڭ بەسىكتە جاتقانىندا اكەسىنەن ايىرىلعاندىعىن, عۇمىر بويى اكەنىڭ ايالى الاقانىن, ءتىپتى, قامشىسىن دا اڭساپ وتكەنىن ايتتى. بالا كۇنگى ەستەلىكتەرىمەن ءبولىستى. اسكەردەگى كومانديردىڭ جاۋىنگەرلەرگە اكەدەي بولۋ كەرەكتىگىن دە جاقسى مىسالدارمەن ادىپتەدى.
امانعالي شميتۇلى
