اكىمنىڭ قىزمەتتىك كولىگى قانداي؟
استانا اكىمىنىڭ قازىرگى قىزمەتتىك كولىگى قانداي؟ بۇل تۋرالى اكىمدىكتە وتكەن ءباسپاسوز ءماسليحاتى بارىسىندا جۋرناليستەردىڭ ساۋالىنا جاۋاپ بەرگەن قالا باسشىسى ءباسپاسوز قىزمەتىنىڭ جەتەكشىسى ەلۆيرا جۇرگەنباەۆا ايتتى.
قازىرگى ۋاقىتتا اسەت يسەكەشەۆتىڭ جەكە جەڭىل كولىگى جوق. قالا باسشىسى كۇندەلىكتى شاھارداعى قۇرىلىس نىساندارى مەن جول جوندەۋ, مەكتەپتەردىڭ جاڭا ماۋسىمعا دايىندىعىن باقىلاۋ سياقتى جانە باسقا دا قىزمەتتىك جۇمىستارمەن Hiace ماركالى ميكرواۆتوبۋسپەن جۇرەدى ەكەن. بىراق بۇدان بىلاي قالا باسشىسى Skoda Superb كولىگىنە وتىراتىنىن ايتادى ماماندار.
ايتا كەتۋ كەرەك, الداعى قىركۇيەكتەن باستاپ اكىمدىككە قاراستى 18 باسقارما مەن اۋدان اكىمدىكتەرىنىڭ ماماندارىن تاسىمالداۋ قىزمەتى ولاردىڭ سۇرانىسى بويىنشا جەكەمەنشىك تاكسوپاركتىڭ قۇزىرىنا كوشەدى.
قالالىق ورتانى رەگەنەراتسيالاۋ باسقارماسىنىڭ باسشىسى عالي يسكاليەۆتىڭ ايتۋىنشا, تاسىمالداۋ جۇمىسىندا قالا اكىمىنە ەرەكشە جاعداي قاراستىرىلمايدى ەكەن. مىسالى, ونىڭ كولىك جۇرگىزۋشىسى دە تاكسوپاركتىڭ قاراپايىم مامانى بولادى.
– جەرگىلىكتى بيلىك تاراپىنان جۇرگىزۋشى بەلگىلى ءبىر اتتەستاتسيادان نەمەسە تەستىلەۋدەن ءوتۋى ءتيىس دەگەن تالاپ قويىلمايدى. مامانداردى جۇمىسقا قابىلداۋدا بارلىق قاۋىپسىزدىك جانە مەديتسينالىق تەكسەرىس شارالارىن تاكسوپارك ءوزى جۇرگىزەدى, – دەدى عالي يسكاليەۆ.
ءوز كەزەگىندە استانا تاسىمالداۋشىلار قاۋىمداستىعىنىڭ توراعاسى مەدەت قۇرمانوۆ قالا باسشىسىن تاسىمالداۋعا تاكسوپارك Skoda Superb ماركالى كولىگىمەن قامتاماسىز ەتۋگە دايىن ەكەنىن اتاپ ءوتتى. ونىڭ ايتۋىنشا, تاكسوپاركتەگى كولىكتەردىڭ باسىم كوپشىلىگى, سونىڭ ىشىندە Skoda Superb تە قازاقستاندا قۇراستىرىلعان.
– قازىر تاكسوپارك يەلىگىندەگى كولىك سانى 400-دەن اسادى. ونىڭ كوبىسى – Lada Largus, Renault Logan, Hyundai Accent سياقتى ەكونوم-كلاسس ساناتىنداعى كولىكتەر. مۇمكىندىگىنشە كولىكتەر جاڭارتىلىپ وتىرادى. بىلتىر «ازيا اۆتو»-دا قۇراستىرىلعان 100 Lada Largus كولىگى ساتىپ الىنعان بولاتىن. سول سياقتى تاكسوپاركتە بيزنەس-كلاسس ساناتىنداعى Toyota Camry, Skoda Superb مودەلدەرى دە بار. ولاردىڭ ۇزىندىعى 4,5 مەتر بولسا, ەنى 1,8 مەتردى قۇرايدى, – دەدى مەدەت قۇرمانوۆ.