ەمحانالارعا تىركەلگەن 26000-نان استام ەلوردا تۇرعىندارى ەركىن تاڭداۋ قۇقىعىن پايدالاندى
ەلىمىزدە تۇرعىنداردى ەمدەۋ مەكەمەلەرىنە تىركەۋدىڭ كەزەكتى ناۋقانى اياقتالدى.
ناۋقانعا قاتىسقان قازاقستاندىقتاردىڭ باسىم بولىگى ەمحاناعا وزدەرى بارىپ تىركەلسە, 13,5 مىڭعا جۋىعى ونلاين قىزمەتتى تاڭداعان (egov.kz پورتالى ارقىلى).
«تىركەۋ كامپانياسى اياسىندا, ياعني 15 قىركۇيەك پەن 15 قاراشا ارالىعىندا باستاپقى مەديتسينالىق-سانيتارلىق كومەك ۇيىمدارىنا تىركەلگەندەر سانى – 13 668. مەديتسينالىق ۇيىمدار مەن دارىگەردى ەركىن تاڭداۋ قۇقىعىن پايدالانعاندار سانى – 26 487. الدىن الا مالىمەتكە سۇيەنسەك, بۇگىنگى كۇنگە دەيىن 2018 جىلدىڭ تىركەۋ قورىتىندىسى بويىنشا استانا قالاسىنداعى ەمدەۋ مەكەمەلەرىنە 1 091 640 ادام تىركەلگەن»,- دەيدى «مىندەتتى الەۋمەتتىك مەديتسينالىق ساقتاندىرۋ قورى» كەاق استانا فيليالى ديرەكتورى نۇرلىبەك قابدىقاپاروۆ.
ناۋقان شەڭبەرىندە ەمحانالارعا تىركەلگەن ازاماتتارعا 2019 جىلدىڭ 1 قاڭتارىنان باستاپ قىزمەت كورسەتىلەدى. ازاماتتار تىكەلەي جۇگىنسە, ولاردى مساك ۇيىمدارىنا بەكىتكەن كەزدە بۇرىن بەكىتىلگەن مساك ۇيىمدارىنان ەسەپتەن شىعارۋ «بەكىتىلگەن حالىق تىركەلىمى» پورتالىنىڭ دەرەكقورى ارقىلى اۆتوماتتى تۇردە جۇزەگە اسىرىلادى.
بيىلعى تىركەۋ ناۋقانىنا 31 ەمدەۋ مەكەمەسى قاتىستى. تىركەلگەندەر سانى بويىنشا استانا قالاسىنداعى № 6, 10, 4 جانە 7 ەمحانالار الدىڭعى قاتاردا. سونداي-اق, تۇرعىندار جەكە كلينيكالاردان «سالاۋاتتى استانا» جشس, «شيپاگەر» وتباسىلىق دەنساۋلىق ساقتاۋ ورتالىعىنا كوپ تىركەلگەن.
جالپى, تىركەۋ ناۋقانى – ەمحانا اۋىستىرۋدىڭ جالعىز جولى ەمەس. قازاقستاندىقتاردىڭ جىلىنا ءبىر رەت ەمحانا اۋىستىرۋعا مۇمكىندىگى بار. سونىمەن قاتار, قونىس اۋدارعاندا, ەمحانا جابىلىپ قالسا نەمەسە مەديتسينالىق ساقتاندىرۋ قورىمەن كەلىسىمشارتتى بۇزسا, جاقىن ماڭنان جاڭا ەمحانا سالىنسا, ەمحانا قىزمەتىنە قاتىستى شىعىنداردى جاباتىن ەرىكتى مەديتسينالىق ساقتاندىرۋ كەلىسىمشارتىن بەكىتكەن جاعدايدا باسقا ەمحاناعا اۋىسۋعا بولادى.
ەستەرىڭىزگە سالا كەتەيىك, بۇدان بىلاي ەمحاناعا egov.kz ەلەكتروندى ۇكىمەت پورتالى مەن Telegram-بوت egov.kz. ارقىلى دا تىركەلۋگە دە بولادى.
«الەۋمەتتىك مەديتسينالىق ساقتاندىرۋ قورى» كەاق-مەن كەلىسىمشارتقا وتىرعان مەديتسينا ۇيىمدارىنىڭ تولىق ءتىزىمىن مەديتسينالىق ساقتاندىرۋ قورىنىڭ fms.kz سايتىنان تابۋعا بولادى. ولار كەپىلدەندىرىلگەن تەگىن مەديتسينالىق كومەك شەڭبەرىندە حالىققا قىزمەت كورسەتپەك.
