قازاقستان رەسپۋبليكاسى قارجى مونيتورينگى اگەنتتىگىنىڭ رەسمي وكىلى الىبەك ءابدىلوۆ جالپى قارجى پيراميداسى جانە قازاقستان رەسپۋبليكاسى قارجى مونيتورينگى اگەنتتىگىنىڭ الاياقتارمەن كۇرەسىندەگى ءىس-ارەكەتى جايىندا بايانداپ بەرگەن بولاتىن. ايتا كەتسەك, قارجى پيراميداسى – قارجى ينۆەستيتسياسى سالاسىنداعى قىلمىستىق سيپاتىنىڭ ەڭ قاۋىپتى تۇرىنە جاتادى. ولاردىڭ ەلىمىزدە تارالۋى حالىقتىڭ قارجىلىق جاعدايىنا نۇقسان كەلتىرەتىندىكتەن, الەۋمەتتىك جانە قوعامدىق شيەلەنىستىڭ ارتۋىنا الىپ كەلەدى.
– وكىنىشكە قاراي, ادامدار ءالى دە تەز ارادا كوپ اقشا تابامىن دەپ الاياقتاردىڭ تۇزاعىنا ءتۇسىپ جاتىر. ازاماتتار كۇندەلىكتى ەڭبەكپەن كەلمەيتىن ءپاسسيۆتى تابىستىڭ بارلىق ۇسىنىسىنا, اسىرەسە عالامتورداعى مول بايلىققا كەنەلتەمىن دەۋشىلەرگە كەلگەندە قىراعىلىقتى ۇمىتادى. سول سەبەپتى حالىقتى جاعدايدان حاباردار ەتىپ, قارجىلىق ساۋاتتىلىققا وقىتۋ جۇمىسىن جۇرگىزۋدەمىز. ءوز كەزەگىندە قارجى مونيتورينگى اگەنتتىگى الاياقتىقپەن كۇرەستى ەرەكشە باقىلاۋعا الدى. وسى ماقساتتا قارجى پيراميداسىنىڭ ومىرلىك تسيكلىن قىسقارتۋ جانە ولاردىڭ سالىمشىلارى قاتارىن بارىنشا ازايتۋعا ارنالعان ارنايى جوبا جاسادى. ويتكەنى قانداي دا بولماسىن پيراميدا پايدا بولعاننان باستاپ قۇلدىراعانعا دەيىن بىرنەشە كەزەڭنەن وتەدى. العاشقى اشىلۋى, ياعني باستاماسىنان كەيىن ءوسىپ-وركەندەۋى مۇمكىن. باستاپقى لەكتەگى سالىمشىلار ءوز قاراجاتىن العاننان كەيىن كەيىنگىلەرگە جەتپەي داعدارىسقا ءتۇسىپ, ارتىنشا كۇيرەيدى. سوڭعى لەكتەگىلەردىڭ قاراجاتى وسىلايشا كۇيىپ كەتەدى.
ءبىزدىڭ مىندەتىمىز – جابىرلەنۋشىلەردىڭ ارىز-شاعىمىن كۇتكىزبەي-اق, «جالعان قارجى» كومپانيالارى جۇمىسىنىڭ باستاپقى كەزەڭىندە انىقتاۋدى قامتاماسىز ەتۋ. وسى ماقساتتا مۇددەلى ۋاكىلەتتى ورگاندارمەن جانە ۇيىمدارمەن ءوزارا ارەكەتتەسۋ ءۇشىن ارنايى الگوريتم ازىرلەندى.
– قارجى پيراميداسىنىڭ ءجيى كەزدەسەتىن تۇرلەرىنە توقتالىپ وتسەڭىز. ونىڭ زاڭسىز قۇرىلىم ەكەنىن قالاي انىقتاپ بىلۋگە بولادى؟
– قارجى پيراميداسىنىڭ ءبىر ءتۇرى – ماتريتسا. بىرنەشە ساتىدان نەمەسە دەڭگەيدەن تۇراتىن مۇنداي قارجى پيراميداسىنا بەلگىلى ءبىر قاتىسۋشىلارى جينالىپ, وزىنەن كەيىنگى قاتارعا ادام تارتادى. تىركەلگەن ادامداردىڭ سانى بەلگىلى ءبىر مولشەرگە جەتكەندە, الدىنداعىلار وزىنە ءتيىستى بونۋسىن الا وتىرىپ, جاڭا دەڭگەيگە كوتەرىلەدى. وسىلايشا, قاراجات قۇيۋشىلار تاۋسىلعانعا دەيىن جالعاسا بەرەدى.
جەلىلىك ماركەتينگ تە ءاربىر تارتىلعان ادام ءۇشىن پايداسىن كورىپ, سالىمشىلارىن كوبەيتۋدى ماقسات تۇتادى. نەگىزگى مەحانيزمى – تاۋارلاردى (قىزمەتتەردى) وتكىزۋ. بۇل جاعدايدا ساتىلاتىن ءونىم جەلەۋ عانا. پيراميدا بيىكتەپ, دەڭگەي نەعۇرلىم جوعارى بولسا, سوعۇرلىم كوپ سالىمشى كوبەيەدى, دەمەك پايدا كوپ بولادى, ويتكەنى باستاپقى قاتىسۋشىلار ءاربىر جاڭا قاتىسۋشى ءۇشىن پايدا الادى. ينۆەستيتسيا كومپانياسى – مۇنداي ۇيىم كوبىنەسە بيرجالىق ساۋداعا قاتىسۋ, تانىمال مەيرامحانالار نەمەسە قىزمەت كورسەتەتىن كومپانيالاردىڭ قىزمەتىنە جانە ت. ب. تەندەرلەرگە, شەتەلدەگى جىلجىمايتىن مۇلىككە جانە باسقا دا قۇندى مۇلىكتەرگە قاتىسۋ ارقىلى باعالى قاعازدار نارىعىنا ينۆەستيتسيالاۋدى ۇسىنادى. العاشقى قاتىسۋشىلاردىڭ تابىسى, جاڭا ينۆەستورلاردىڭ ەسەبىنەن قالىپتاسادى. تۇتىنۋشىلار كووپەراتيۆى – ينۆەستورلاردىڭ جىلجىمالى جانە جىلجىمايتىن مۇلىكتى ساتىپ الۋى ءۇشىن پايىزسىز نەسيەلەر بەرۋگە نەگىزدەلگەن. مەسسەندجەردەگى چات – ادامداردى پيراميداعا تارتۋدىڭ بۇل ءادىسى WhatsApp جانە Telegram مەسسەندجەرلەرىندە چاتتار قۇرۋ ارقىلى جۇزەگە اسادى. پرينتسيپ – توپ قۇرۋ, وعان قوسىلۋ ءۇشىن بەلگىلى ءبىر سومانى تولەۋ كەرەك. قوسىلعاننان كەيىن توپقا بەلگىلى ءبىر ادامداردى قوسىمشا شاقىرىپ, قاتارىن كوبەيتىپ, ونى ورىنداعاندارعا تۇسكەن اقشادان 200-400 پايىز سىياقى بەرىلەدى. شاقىرىلعان قاتىسۋشىلاردىڭ سانى شەكتەلمەيدى. ادەتتە, بۇل ءتۇرى شاعىن سومالاردى ينۆەستيتسيالاۋ ارقىلى اقشا تابۋعا باعىتتالعان.
بۇل جولدا ميكروقارجى ۇيىمدارى (لومبارد, قايتا قارجىلاندىرۋ, قوسا قارجىلاندىرۋ ۇيىمدارى) بۇل ىستەن سىرت قالمايدى. ادەتتە, مۇنداي ۇيىمدار نەسيە ارقىلى اقشا تابۋ مۇمكىندىگىن بەرۋ جەلەۋىمەن ازاماتتاردان قاراجات تارتادى.
قىزىعۋشىلىعىنا قاراي بىرىككەن كلۋبتار جۇمىسى – كرۋيز, ساياحات, بيزنەس قۇرۋ جانە العا جىلجىتۋ بويىنشا ترەنينگ, ماركەتينگ, ينۆەستيتسيا نەگىزدەرى, كوپيرايتينگ, پالميستيكا, استرونوميا, پسيحيكالىق تەپە-تەڭدىكتى جاقسارتۋ, پسيحولوگيا, نۋمەرولوگيا, سيمۆول, ماگيا جانە ت. ب. باعدارلامالارعا بايلانىستى بەلگىلى ءبىر مەرزىم ىشىندە جاڭا ادامداردى تارتۋى جانە كلۋبقا مۇشەلىك جارناسىن تولەۋى كەرەك.
بلوكچەين تەحنولوگياسىن وقىتۋ, كريپتوگرافيا پلاتفورمالارى – كريپتو بيرجالارىنا ينۆەستيتسيالار, جوبالاردى ازىرلەۋ, تاعى باسقا تۇرلەرى كلاسسيكالىق ىسكەرلىك بەلسەندىلىك ۇلگىلەرى ارقىلى جاسالادى. حالىقارالىق قارجى ورتالىعى – استانا اۋماعىندا جۇزەگە اساتىن وپەراتسيالاردى قوسپاعاندا, قازاقستان رەسپۋبليكاسىندا كريپتوۆاليۋتامەن كەز كەلگەن وپەراتسيالارعا تىيىم سالىنعانىن اتاپ وتكىمىز كەلەدى.
بۇگىندە شابۋىلداۋشىلار كريپتوۆاليۋتاداعى ينۆەستيتسيا ارقىلى وڭاي ءپاسسيۆتى كىرىس ۇسىنادى. كريپتو الماستىرعىشتار ينتەرنەتتە قىزمەتتەردى ۇسىنادى. تسيفرلىق اكتيۆتەر ەسىرتكىنىڭ زاڭسىز اينالىمى, اقشانى جىلىستاتۋ جانە تەرروريزمدى قارجىلاندىرۋ ءۇشىن دە قولدانىلادى. بۇل ارەكەتتەردىڭ بارلىعى زاڭسىز جانە قىلمىستىق كودەكس اياسىندا جازالانادى. سوندىقتان الاياقتاردىڭ ايلا-امالىنا تۇسپەۋگە كەڭەس بەرەمىز. مۇنداي فاكتىلەر بەلگىلى بولعان جاعدايدا, قارجى مونيتورينگى اگەنتتىگىنە 8-7172-70-84-78, call-ورتالىق 8-7172-70-09-58, 1458 تەلەفوندارى ارقىلى حابارلاۋىڭىزدى سۇرايمىز.
– بۇقارانى اقپاراتتاندىرۋدا قانداي تەحنولوگيانى پايدالاناسىزدار؟
– زامان اعىمىنا ىلەسىپ, ناقتى شىندىققا تەز بەيىمدەلەمىز. قويىلعان ماقساتقا جەتۋ ءۇشىن الدىن الۋ شارالارىنىڭ كەشەنى ازىرلەنىپ, جاساندى ينتەللەكت ەنگىزىلۋدە. وسىلايشا, IT-قۇرالدارىن پايدالانا وتىرىپ, عالامتوردا, ياعني جاڭالىقتار پورتالى, بلوگ, ۆەب-سايت جانە الەۋمەتتىك جەلىدەگى اككاۋنتتاردان قۇقىق بۇزۋشىلىق مازمۇنداعى ماتىندەردى انىقتايمىز.
قارجى پيراميداسىنىڭ بەلگىلەرى بار ماتەريالدار Cybernadzor جۇيەسىندە بۇعاتتاۋ ءۇشىن قۇزىرەتتى مينيسترلىككە جىبەرىلەدى. 2022 جىلى قارجى پيراميداسى بەلگىلەرى بار 6,5 مىڭ سايت پەن اككاۋنتتى بۇعاتتاۋعا مۇمكىندىك بەردى. بيىلدىڭ وزىندە 7 مىڭعا جۋىق سىلتەمە بۇعاتتالدى. سالىستىرۋ ءۇشىن ايتساق, 2020 جىلى بۇل كورسەتكىش 600 (578) بولدى. وتكەن جىلدىڭ سوڭىنان قارجى پيراميداسىنا جازىلۋشىلاردىڭ ماقساتتى اۋديتورياسىمەن اقپارات-ءتۇسىندىرۋ جۇمىسى جۇرگىزىلۋدە. ءبىز ازاماتتاردىڭ كۇماندى جوبالارعا اقشا سالىپ, اقشاسىن جوعالتۋىن كۇتپەيمىز. بىلايشا ايتقاندا, بەلسەندى جۇمىس ىستەپ جاتىرمىز.
– قارجى پيراميداسىنىڭ قىزمەتى تۋرالى بۇگىندە قۇقىق بۇزۋشىلىق بەلگىلى بولعان كەزدە عانا جاڭالىقتار پورتالدارى مەن الەۋمەتتىك جەلىلەردەن بىلە الاسىز. ازاماتتاردىڭ بەلگىلى ءبىر جوبادا قارجى پيراميداسى بەلگىلەرىنىڭ بار-جوعىن ءوز بەتىنشە تەكسەرۋگە مۇمكىندىگى بار ما؟
– ءيا, حالىقتىڭ مۇنداي مۇمكىندىگى بار. جىل باسىنان بەرى ينتەرنەت-رەسۋرستاردى تەكسەرەتىن Telegram بوت ىسكە قوسىلدى. ەندى ازاماتتارىمىز ۆەب-سايتتار مەن الەۋمەتتىك جەلىلەردى قارجى پيراميداسى بەلگىلەرىن ءوز بەتىنشە تەكسەرە الادى. بۇل ولاردىڭ «الاياقتىق» سحەمالارعا تارتىلۋىنىڭ الدىن الادى. جاسالعان ءونىم سۇرانىسقا يە بولىپ, حالىق اراسىندا ۇلكەن سۇرانىسقا يە ەكەنى قازىردىڭ وزىندە بەلگىلى. قىسقا مەرزىمدە ازاماتتاردىڭ 6 مىڭنان استام ءوتىنىشى قارالدى, ونىڭ ىشىندە بوتپەن (3127) اۆتوماتتى تۇردە جاۋاپ بەرىلگەن. وسىمەن توقتاپ قالماي, ازاماتتاردى جاڭالىقتار, جۇرگىزىلىپ جاتقان جۇمىستار جانە ەسكەرتۋ اقپاراتتارى تۋرالى حاباردار ەتۋ مۇمكىندىگىن جۇزەگە اسىرۋدى جوسپارلاپ وتىرمىز.
