ەلىمىزدە دەنساۋلىعىنا بايلانىستى جۇمىسقا تۇرۋعا مۇمكىندىگى جوق ادامداردىڭ ءال-اۋقاتىن جاقسارتۋعا ارنالعان الەۋمەتتىك جوبالار جۇزەگە اسىرىلۋدا. كەشە قر پرەمەر-ءمينيسترىنىڭ ورىنباسارى ەرالى توعجانوۆ ەلوردادا سونداي جوبالار بويىنشا نىسانداردى ارالاپ, قوعامدا ءوز ەڭبەگىمەن ورنىن تابۋعا ۇمتىلىپ جۇرگەن ەرەكشە جانداردىڭ جۇمىسىمەن تانىستى.
ۆيتسە-ءمينيستردىڭ جۇمىس كەزدەسۋىنە مەملەكەتتىك ورگاندار وكىلدەرىمەن قاتار نۇر-سۇلتان قالاسى اكىمىنىڭ ورىنباسارى ەرلان بەكمۇرزاەۆ قاتىستى.
ۆيتسە-پرەمەر الدىمەن «مەيىرىم» كوپسالالى مەديتسينالىق ورتالىعىنا باردى. ورتالىق ەل وڭىرلەرىن بەينەكونفەرەنتسيا ارقىلى بىرىكتىرەتىن تەلەمەديتسينا كابينەتىنىڭ قىزمەتىمەن ەرەكشەلەنەدى. سونىڭ ارقاسىندا شالعاي اۋىلدار تۇرعىندارى ساپالى مەديتسينالىق كومەككە قول جەتكىزسە, وڭىرلەردەگى دارىگەرلەر تاجىريبە الماسۋعا مۇمكىندىك الادى. ە.توعجانوۆ باستاپقى مەديتسينالىق سانيتارلىق كومەك كورسەتۋ بويىنشا جۇمىس ىستەيتىن مەديتسينالىق ورتالىقتار قىزمەتىنىڭ ماڭىزىن جوعارى باعالادى.
ءارى قاراي ول «دوس تاۋەلسىز ءومىر» كاسىپكەرلىك ورتالىعىن ارالادى. بۇل ورتالىقتا مۇمكىندىگى شەكتەۋلى جانداردىڭ قالىپتى ومىرگە ورالۋىنا جانە ازاماتتىق قوعامعا كىرىگۋىنە بارلىق جاعداي جاسالادى. نىساندا ەڭبەك ەتەتىن 28 ادامنىڭ 17-ءسى – مۇمكىندىگى شەكتەۋلى جاندار. ورتالىق وكىلدەرى وڭالتۋ تەحنيكالارىن ساتۋ, تەحنيكا مەن جابدىقتار جوندەيتىن «ينۆا-ستو» سەرۆيس ورتالىعى بويىنشا شوۋ-رۋم كورسەتتى. وسىنداي جاعدايعا تۇسكەن ازاماتتاردىڭ وزدەرى مۇگەدەكتەر اربالارىن دايىنداۋ, ولارعا تاپسىرىس بەرۋ, بۇزىلعانىن جوندەۋ ءۇشىن جاڭا جوبالار جۇزەگە اسىرىپ, ورتالىق جۇمىسىن جەتىلدىرىپ وتىر. ەندى ولار وزگە وبلىستارداعى وزدەرى سياقتى جانداردى دا ۇيىنەن الىسقا بارماي, زۋم ارقىلى ءبارىن ۇيرەنىپ, ونلاين تاپسىرىستار بەرۋ ماسەلەسىن دە رەتتەپ جاتىر. مىنە, ولارعا مەملەكەت تاراپىنان مىندەتتى تۇردە قولداۋ كورسەتۋ كەرەك. پرەمەر-ءمينيستردىڭ ورىنباسارى ورتالىقتىڭ جۇمىسىندا كەزدەسەتىن قيىندىقتار مەن كەدەرگىلەر تۋرالى سۇراپ, ولاردى مەملەكەتتىك ورگاندارمەن بىرگە قىسقا مەرزىمدە شەشۋدى قالا اكىمدىگى وكىلدەرىنە تاپسىردى.
– وتكەن جىلى الەۋمەتتىك كاسىپكەرلىك تۋرالى زاڭ قابىلداندى. بۇگىنگى تاڭدا مەملەكەت باسشىسىنىڭ تاپسىرماسىمەن ۇكىمەتتە حالىق تابىسىن ارتتىرۋ باعدارلاماسى جۇزەگە اسىرىلىپ جاتىر. باعدارلامانىڭ نەگىزگى ماقساتى – ەكونوميكانى يندۋستريالاندىرۋ جانە ءارتاراپتاندىرۋ, كاسىپكەرلىكتى دامىتۋمەن ۇشتاستىرا وتىرىپ حالىقتىڭ تابىسىن ارتتىرۋ جانە ناتيجەلى جۇمىسپەن قامتاماسىز ەتۋ. اتالعان باعدارلامادا بيۋدجەت قارجىسىن حالىقتىڭ الەۋمەتتىك وسال توپتارى مەن جالاقىسى تومەن ازاماتتارعا ءادىل ءبولۋ جانە ولاردىڭ الداعى ۋاقىتتا ەكونوميكاعا كىرىگۋىن ىنتالاندىرۋعا باعىتتالعان شارالار قاراستىرىلعان. سوندىقتان بۇل باعدارلاما ەڭ الدىمەن, كومەككە مۇقتاج جاندارعا جاڭا مۇمكىندىكتەر بەرەدى. تەك قارجى ءبولىپ قانا قويماي, كومەك الۋشىلاردىڭ الەۋمەتتىك مارتەبەسىن وزگەرتۋ, جۇمىسپەن قامتۋدىڭ ءتۇرلى سالالارىنا تارتۋ ارقىلى ماتەريالدىق جاعدايىن جاقسارتۋ – باعدارلامانىڭ الدىنا قويعان مىندەتى. سونداي باعىتتاردىڭ ءبىرى – الەۋمەتتىك كاسىپكەرلىك, – دەدى ە.توعجانوۆ.
كەلەسى بارعان نىسان الەۋمەتتىك وسال توپتارعا جاتاتىن ادامداردى وقىتىپ, جۇمىسقا ورنالاستىرۋعا باعىتتالعان «Green TAL» الەۋمەتتىك كاسىپورنى بولدى. جوباعا 62 ادام تارتىلعان بولسا, سونىڭ 53-ءى الەۋمەتتىك وسال توپقا جاتادى. ە.توعجانوۆ ۇكىمەت تاراپىنان مۇنداي كاسىپورىندارعا جان-جاقتى قولداۋ كورسەتىلىپ وتىرعانىن جانە ولار تابىسى مول تولىققاندى بيزنەسكە اينالۋى كەرەك ەكەنىن جەتكىزدى. سونىمەن قاتار ول ءتيىستى مەملەكەتتىك ورگاندارعا بولەك وتىرىستا الەۋمەتتىك كاسىپكەرلىكتى دامىتۋمەن بايلانىستى ماسەلەلەردى كوتەرىپ, قاراستىرۋدى تاپسىردى.
