قازاقستان پرەزيدەنتىنىڭ ءباسپاسوز حاتشىسى بەرىك ءۋالي «Egemen Qazaqstan» باسىلىمىنا بەرگەن سۇحباتىندا مەملەكەت باسشىسىنىڭ قاي گازەتتەردى ءجيى وقيتىنى تۋرالى ءمالىم ەتتى.
«Egemen Qazaqstan», «ايقىن», «Astana aqshamy» گازەتتەرىن كۇندەلىكتى وقيدى. ولاردان باسقا «انا ءتىلى», «تۇركىستان», «قازاق ادەبيەتى», «جاس قازاق», «الماتى اقشامى» سەكىلدى اپتالىقتاردى قاراپ, باقىلاپ وتىرادى. ەگەر جاقسى ماقالالار, سۇحباتتار شىقسا, اسىقپاي وقىپ, استىن سىزىپ, ءتىپتى كەيبىرىنە قاتىستى بۇرىشتاما سوعىپ جاتادى. مەرزىمدى باسىلىمدارعا شىققان سىني نەمەسە پروبلەمالىق ماقالالاردى وقىپ, قۇزىرلى ورگاندارعا ارنايى تاپسىرمالار بەرەتىن كەزدەرى دە بولادى, – دەدى بەرىك ءۋالي.
ول ءسوز اراسىندا قوعامداعى ماڭىزدى ماسەلەلەردى كوتەرەتىن تەلەحابارلاردى دا كورىپ, قازاق راديوحابارلارىن تىڭدايتىنىن جەتكىزدى.
