استانا قالاسى ءماسليحاتىنىڭ دەپۋتاتى, قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيانىڭ مۇشەسى, «الكون+» فيرماسىنىڭ ديرەكتورى امان ايۋپوۆكە قويعان العاشقى سۇراعىمىز قوعامدىق قىزمەتىمەن بايلانىستى بولدى.
«ۇستىمىزدەگى جىلدىڭ ناۋرىز ايىنان باستالعان قوعامدىق جۇمىس جەكە تۇرعىنداردىڭ ءوتىنىش-قالاۋلارىن تىڭداپ, ناقتى ماسەلەلەردى شەشۋگە ارنادىم» دەدى امان ايۋپوۆ.
ءماسليحات دەپۋتاتى العاشقى كەزەڭدە تۇرعىندارمەن سايلاۋ الدى كەزدەسۋلەردە ايتىلعان وتىنىشتەردى, جەكەلەگەن ازاماتتاردىڭ مۇقتاجدارىن ەسكەرگەن. سونىڭ ءبىرى مۇمكىندىگى شەكتەۋلى ازاماتتىڭ ءوتىنىشى بويىنشا جاسالعان تۇرعىن ءۇي دالىزىندەگى قۇرامالى-اۆتوماتتى پاندۋس ەكەن. ەسكى جوبامەن سالىنعان ءۇيدىڭ ءدالىزىنىڭ تارلىعىنا بايلانىستى قولاربانى اۆتوماتتى تۇردە كوتەرەتىن پاندۋستى ويلاپ تاپقان فيرمانىڭ ونەرتاپقىشتارىنا ق.رىسقۇلبەكوۆ كوشەسىنىڭ تۇرعىنى انتونينا بەسكوروۆاينايانىڭ العىسى شەكسىز. ودان باسقا, قارتتارعا ارناپ ابىلايحان 29/2 اۋلاسىندا كۇن مەن جەلدەن قالقا بولاتىن وتىرعىش جاسالىنعان. «التاي» پيك كىرەبەرىستىڭ تەرەزەلەرىن ءاينەكپەن قاپتاۋعا كومەك بەردى. قازىرگى كەزدە زەينەتكەرلەر مەن بالالارعا ارنالعان اۋلا كلۋبتارى ءۇشىن ورىن ىزدەستىرىلىپ جاتىر. قارتتار كۇنى قارساڭىندا جالعىزىلىكتى جۇزدەن استام قارياعا ازىق-تۇلىكپەن كومەك كورسەتىلدى. وكرۋگكە قاراستى ۇيلەردىڭ كىرەبەرىستەرىنە قۇتتىقتاۋ پلاكاتتارى ءىلىنىپ, لايىقتى كوڭىل ءبولىندى.
«وسىعان دەيىنگى جىلدارى دا فيرمادا جۇمىس ىستەيتىن جۇمىسشىلاردىڭ الەۋمەتتىك جاعدايلارىن شەشۋمەن قاتار, وزگە دە قايىرىمدىلىق شارالارىن ۇيىمداستىرىپ كەلەمىز» دەيدى «الكون+» باسشىسى. ول مۇنداي شارالاردىڭ ءوزىنىڭ ىزگى نيەتىنەن تۋىندايتىنىن, «نۇر وتان» پارتياسىنىڭ مۇشەسى رەتىندە دە جاۋاپكەرشىلىكتى تۇسىنەتىنىن ءبىلدىردى. حالىق مۇددەسىنە ارنالعان جۇمىستىڭ باسىندا ءجۇرىپ, اسىرەسە, الەۋمەتتىك جاعىنان از قامتىلعان تۇرعىندارعا قول ۇشىن بەرۋدەن اينالىپ وتپەيتىنىن ايتتى. ونىڭ سايلاۋ وكرۋگىندە №32, №37 مەكتەپتەر ورنالاسقان. وسى كۇزدە الەۋمەتتىك جاعىنان از قامتىلعان وتباسىلارىنداعى 20 بالاعا مەكتەپ كيىمىن الىپ بەرسە, 15 وقۋشى ساباققا كەرەكتى قۇرال-جابدىقتارمەن قامتاماسىز ەتىلدى. ۇلى وتان سوعىسىنىڭ ارداگەرلەرىنىڭ جايى دا دەپۋتات نازارىنان تىس قالماعان. جاقىن كۇندە ەل تاۋەلسىزدىگىنىڭ 25 جىلدىعىنا وراي «25 ىزگىلىكتى ءىس» اكتسياسى ىسكە قوسىلادى.
دەپۋتات امان ايۋپوۆ سوڭعى كەزدەرى بيۋدجەت ەسەبىنەن مەملەكەتتىك تاپسىرىسپەن سالىنىپ جاتقان كەيبىر تۇرعىن ۇيلەردىڭ ساپاسى سىن كوتەرمەيتىنىن ايتىپ, دابىل قاعىپ ءجۇر.
«پايدالانۋعا بەرىلگەن جاڭا ۇيلەردىڭ ساپاسىنا باقىلاۋ جۇمىسى كوڭىل كونشىتپەيدى. تۇرعىن ءۇي تاپشىلىعى, ونىڭ كەزەگىندە تۇرعانداردىڭ قاجەتتىلىگىن دە ەسكەرەمىز. الايدا بۇل جۇيەنى وزگەرتپەسەك, جىلدار وتە كەلە بۇل ۇيلەردى پايدالانۋ قىمباتقا ءتۇسىپ, قالا بيۋدجەتىنە سالماق بولاتىنى انىق. بۇل – ارىدەن ويلاعانداعى ماسەلەلەر. ءسوزىمنىڭ دالەلى رەتىندە ايتايىن, قازىرگى كۇندە باسپانالى بولعاندار ءبىر قىستاپ شىققاننان كەيىن, قۋانىشتارى باسىلىپ, فيرماعا جاڭادان ساپالى تەرەزە سالۋعا تاپسىرىس بەرىپ جاتادى. دەمەك, ءۇي تۇرعىزۋعا بولىنگەن مەملەكەت قاراجاتى العاشقى سۋىققا شىدامايتىن, ساپاسىز قۇرىلىس ماتەريالدارىن قولدانۋ ارقىلى قىرۋار قاراجاتتى جەلگە شاشتى دەگەن ءسوز. ەگەر بۇل جۇيەگە وزگەرىس ەنگىزبەسەك, بولىنگەن قارجىنىڭ بەرەكەسى بولماۋى ابدەن مۇمكىن» دەيدى دەپۋتات.
1998 جىلى ىرگەتاسى قالانعان «الكون+» فيرماسى – ەلوردانىڭ قۇرداسى. بۇگىندە «الكوننىڭ» اسەم ءاينەكتەرىمەن جارقىراعان عيماراتتار قالانىڭ سيمۆولىنا اينالىپ ۇلگەردى. قازاقستاندا العاشقىلاردىڭ ءبىرى بولىپ قاسبەتتى شىنىلاۋدىڭ پانەلدىك ءجۇيەسىن ءوندىرۋ جانە قۇراستىرۋدىڭ يننوۆاتسيالىق تەحنولوگياسىن مەڭگەردى. وسى تەحنولوگيا بويىنشا «قازاقستان تەمىر جولى» ۇلتتىق كومپانياسىنىڭ اكىمشىلىك عيماراتى جانە «Marriott» قوناق ءۇيى ءۇشىن جۇمىستار ورىندالدى. كومپانيانىڭ شىنى پاكەتتەرى استاناداعى ۇلتتىق مۋزىكا اكادەمياسىنىڭ, «قازاقستان» سپورت سارايىنىڭ عيماراتتارىندا, سەنات عيماراتىندا, «كورمە» زالىنىڭ, كوپتەگەن ساۋدا ورتالىقتارى مەن تۇرعىن ءۇي كەشەندەرىنىڭ عيماراتتارىندا ورناتىلعان. «شاعىن جانە ورتا كاسىپكەرلىك سالاسىنداعى جەتىستىكتەر ءۇشىن» كونكۋرسىندا «ءوندىرىس سالاسىنداعى ۇزدىك كاسىپكەر» اتالىمى بويىنشا 1-ورىنعا يە بولۋى (2014 ج.) جانە «وندىرىستىك ماقساتتاعى ۇزدىك كاسىپورىن» اتالىمى بويىنشا قازاقستان رەسپۋبليكاسى پرەزيدەنتىنىڭ «التىن ساپا» سىيلىعىن الۋى (2014 ج.) كومپانيانىڭ جەتىستىكتەرىن مويىنداۋدىڭ بەلگىسى بولدى.
«استانا قالاسىنداعى بيزنەستىڭ ەرەكشەلىگى تۋرالى ايتساق, كاسىپكەرگە جەكە ءىسىن باستاپ, ونى دامىتۋعا بارلىق ەسىك اشىلعان. بيزنەستىڭ ءارتۇرلى باعىتىندا ىسكەر ازاماتتار ءۇشىن قوماقتى ۇلەس الاتىن ورىن بار. استانا وركەندەگەن سايىن قالا قۇرىلىسى مەن باسقا دا قاجەتتىلىكتەرىن وتەيتىن بيزنەستىڭ سان الۋان سالاسىنىڭ قاتار دامۋى – ەلوردا بيزنەسىنىڭ باستى ەرەكشەلىگى. ءوز فيرماممەن بايلانىستىرسام, ەلورداداعى ماڭىزدى, نىسانالى قۇرىلىس الاڭدارىنىڭ قاتىسىپ, بيزنەستى ءتيىمدى ءجۇرگىزۋگە ەشقانداي كەدەرگى بولعان جوق. مۇندايدا تەك تاڭداۋلىلار قاتىسىپ, ۇلەستى سولار الادى دەگەن ۇعىم بولماۋى كەرەك. بىزدە وزگەلەردەي تەڭ قۇقىقپەن تەندەرگە قاتىسىپ كەلەمىز. ۇسىناتىن قىزمەتتىڭ ساپاسى ارتقان سايىن الاتىن ۇلەسىمىز دە ارتىپ كەلەدى. ءبىزدىڭ ءبىر ارتىقشىلىعىمىز – ەلوردا بيزنەسىندە 18 جىلدىق ءتاجىريبەمىز. وسىعان بايلانىستى تەحنيكالىق بازامىز بەن قاجەتتى ادام رەسۋرسى دا بار. وسى جىلدارى تەك ساپالى ءونىم شىعارىپ, ءمىنسىز قىزمەت كورسەتۋ ارقىلى جاقسى اتىمىزدى جاساپ الدىق. مەملەكەت تاراپىنان دا كومەك بولىپ جاتىر. وسىدان بىرنەشە جىل بۇرىن ءوز زاۋىتىمىزدى ءوز كۇشىمىزبەن باستادىق. الايدا دەۆالۆاتسيا اسەر ەتىپ, قۇرىلىستىڭ توقتاپ قالۋ قاۋپى بولعان ەدى. سول سەبەپتى «دامۋ» قورىنا قولداۋ كورسەتۋىن ءوتىنىپ, تومەن پايىزبەن نەسيە الىپ, زاۋىتتىڭ قۇرىلىسىن اياقتاپ, قاجەتتى قۇرال-جابدىقتاردى الىپ, ىسكە قوستىق. قوسىمشا جۇمىس ورىندارى اشىلىپ, ءبىزدىڭ بيزنەسكە سەرپىن بەردى» دەيدى ءماسليحات دەپۋتاتى, كاسىپكەر امان ايۋپوۆ.
ايگۇل ۋايسوۆا
