كۇلاندا توقتاسىنقىزى, زەينەتكەر:
– جاقىندا استاناعا كوشىپ كەلىپ ەدىم. قازىر جەتپىسكە تاقاپ قالدىم. جاس كەزىمنەن بەرى تىزەم اۋىرادى. كارىلىك قوسىلىپ, ءتىپتى بۋىن-بۋىنىم سىرقىرايدى. ەم ىزدەپ, بىرنەشە قالانىڭ اۋرۋحاناسىنا باردىم. بىراق ەش ناتيجە شىقپادى. بۇگىندە جاستاردىڭ وزىندە دە مۇنداي ماسەلە از ەمەس. استانادا وسى سىرقاتتى ەمدەيتىن اۋرۋحانا بار ما؟
بۇل ساۋالعا ۇلتتىق ونكولوگيا جانە ترانسپلانتولوگيا عىلىمي ورتالىعىنىڭ تراۆماتولوگ-ورتوپەد دارىگەرى ەرسىن ءۋسيننىڭ جاۋابىن ۇسىنامىز.
– مۇنداي دەرتتى بۋىن-بۋىنعا پروتەز سالۋ ارقىلى ەمدەيمىز. جۇمىس كەستەسىنە سايكەس, تىزە, جامباس, تابان, شىنتاق, يىق, مويىن, بارماق پەن باقاي سياقتى زاقىم كەلگەن دەنە مۇشەگە مۇندا كۇندەلىكتى 8-9 وتا جاسالادى. سونىڭ ەكى-ۇشەۋى – مەنىڭ ەنشىمدە. اسىرەسە, وتانى 60-تان اسقان ەگدە جاستاعى ادامدارعا ءجيى جاسايمىز. ەمدەلۋشىلەرىمىزدىڭ ەڭ جاسى ۇلكەنى 95-تەگى قاريا بولدى. اياق-قولى اۋىراتىندار بىردەن كەلمەيدى عوي بىزدە. 20-30 جىل بويى شىداپ, ەڭ سوڭىندا دەرتى ابدەن اسقىنىپ, امالى تاۋسىلعان سوڭ بىراق قارالادى. الايدا جاساندى مۇشە سالعاننان كەيىن جاس كەزىنەن بەرى اۋىرعاندار وڭالىپ كەتەتىن جاعداي ۇنەمى بولىپ تۇرادى. جۇرە الماي, سال بولىپ قالدىم دەپ ويلاپ كەلگەن ناۋقاستار ءبىزدىڭ وتادان كەيىن اۋرۋحانادان ۇيلەرىنە ءوز اياقتارىمەن قايتادى. ەگەر كۆوتامەن كەلسە, وتا تەگىن جاسالادى. ايتپەسە, مۇنداعى اقىلى وتالاردى كەز كەلگەن ادامنىڭ قالتاسى كوتەرە بەرمەيدى. ويتكەنى ونىڭ باعاسى ميلليون تەڭگەگە دەيىن جەتىپ جىعىلادى. ال كۆوتاعا يە بولۋ ءۇشىن قازاقستان ازاماتى بولۋى مىندەتتى. ءار ادامعا ءارتۇرلى پروتەزدەر سالىنادى. كوبىنە اقش-تا, گەرمانيادا جانە قازاقستاندا جاسالعان پروتەزدەردى قولدانامىز.
