پرەزيدەنت جولداۋىندا ۇكىمەتكە «تسيفرلى قازاقستان» باعدارلاماسىن جۇزەگە اسىرۋ جايى جۇكتەلگەنى بەلگىلى. ونىڭ اياسىندا يگى باستامالار باستاۋ الدى. سولاردىڭ ءبىرى – قوعامدىق كولىكتەردەگى جولاقىنىڭ جاڭا جۇيەگە ءوتۋى جۇرت اراسىندا قىزۋ تالقىلانعان ەدى. بۇگىندە جۇرت پايدالانىپ جۇرگەن ەلەكتروندى كولىك كارتاسى مەن ەلوردالىقتار ءجيى قولداناتىن «Astra Bus» قوسىمشاسىندا ولقىلىقتار دا جوق ەمەس.
وسى جىلدىڭ 21 شىلدەسىنەن استاناداعى قوعامدىق كولىكتەر تولىعىمەن ساندىق جۇيەگە وتكەنى بەلگىلى. قالا تۇرعىندارىنىڭ جاڭا باعىتقا جىلدام قوسىلۋى ءۇشىن قولما-قول جولاقى قۇنى 180 تەڭگەگە كوتەرىلسە, ارنايى كارتا 90 تەڭگە كولەمىندە قالدى. وسىنىڭ ناتيجەسىندە بۇگىنگە دەيىن ەلەكتروندى كارتانى قولدانۋشىلار سانى كۇرت ارتتى. ءاربىر جاڭا باستامانىڭ باستاپقىدا كەمشىن تۇستارىنىڭ بولۋى – زاڭدىلىق, الايدا پروبلەمالاردىڭ ۋاقتىلى شەشىلۋىن كەز كەلگەن مەكەمە باستى نازاردا ۇستاۋى ءتيىس.
بۇل جۇيە العاش ەنگىزىلگەندە كەي كارتالاردىڭ تولەم قابىلداماي, سونىڭ سالدارىنان جولاۋشىلاردىڭ ورىنسىز ايىپپۇل تولەگەن ساتتەرى دە كەزدەسكەن. ودان بولەك, كولىك كارتاسىنا اقشا تولتىرۋ ءۇشىن تەرمينالداردا جينالعان جۇرتتا ەسەپ بولمايتىن. ەلوردالىقتاردىڭ بۇل پروبلەماسى ءالى كۇنگە دەيىن شەشىلمەي كەلەدى. استاناداعى ساناۋلى اپپاراتتىڭ جانىندا ۇزىن-سونار كەزەك بولادى. وسى ءىس شەشىلۋ ءۇشىن «Astana LRT» جشس تولەماقىنىڭ وزگە دە تۇرلەرىن شىعارعانى ايتا كەتۋ كەرەك. قازىرگى ۋاقىتتا جولاقىنى سمس-حابارلاما, QR-كود ارقىلى تولەۋگە مۇمكىندىك بار. دەي تۇرعانمەن, ساناۋلى اپپاراتتىڭ سانىن ارتتىرىپ, كەزەكتىڭ ماسەلەسى بىرجاقتى ەتىلگەنى ءجون. ايتپەسە, كولىك كارتاسى نەگە كەرەك دەگەن ساۋال تۋىندايتىنى – زاڭدىلىق.
ايتا كەتەر تاعى ءبىر جايت, «مينيسترلىكتەر ءۇيى» ايالداماسىنىڭ ماڭىنا وسىنداي اپپاراتتىڭ ۇشەۋى ورناتىلعان. شىنىن ايتۋ كەرەك, كارتا تولتىراتىن اۆتوماتتىڭ بۇگىنگە دەيىن جۇمىس ىستەمەگەن كۇنى باسىم. قالىڭ كەزەكتە تۇرىپ, ارەڭ جەتكەندە اياق استىنان ىستەمەي قالاتىنى كىمنىڭ بولسىن اشۋىنا ءتيىپ جاتادى.
– قاپ, وسى ءۇشىن قانشا ۋاقىتىم كەتتى. ارەڭ دەگەندە جەتكەندە, جۇمىس ىستەمەي قالعانىن قاراشى. بۇكىل جۇمىسىمدى تاستاپ, كەزەككە تۇرىپ ەدىم. ەندى جولاقىنى ەكى ەسە باعامەن تولەيتىن بولدىم عوي. نە بولعانىن بىلمەيمىن, سوڭعى ەكى-ءۇش اپتادا ءدال وسى اپپارات ءجوندى جۇمىس ىستەمەيتىن بولدى, – دەپ كەيىدى كاميلا ەسىمدى قالا تۇرعىنى.
اتالعان مەكەنجايداعى پروبلەما مۇنىمەن شەكتەلمەيدى. سوڭعى ۋاقىتتا قاعاز اقشا قابىلدامايتىن اقاۋى پايدا بولعان. جولاقىنى سمس-حابارلاما نەمەسە QR-كودپەن ءتولەۋگە بولار, بىراق 1 ميلليوننان اسا تۇرعىنى بار استاناعا جەتكىلىكتى تۇردە اۆتوماتتار ورناتىلىپ, ماسەلەنىڭ ءتيىستى دەڭگەيدە شەشىلۋى ءتيىس دەپ ويلايمىز.
«Astana LRT» توڭىرەگىندەگى پروبلەما مۇنىمەن شەكتەلمەيدى. ەلورداداعى اۆتوبۋستىڭ باعىت-باعدارىن كورسەتىپ تۇراتىن ۇيالى تەلەفونعا ورناتىلاتىن «Astra Bus» قوسىمشاسى بار. بىرەر جىل بۇرىن, ياعني 2016 جىلى قوسىلىپ, تۇراقتى تۇردە جۇمىس ىستەپ كەلەدى. وسى ارقىلى كەز كەلگەن اۆتوبۋستىڭ قاي تۇستا كەتىپ بارا جاتقانىن بىلۋگە بولادى. قالا تۇرعىندارى مەن قوناقتارى ءۇشىن ىڭعايلى قوسىمشالاردىڭ ءبىرى بولعانى انىق. دەگەنمەن ارادا ەكى جىلدان اسا ۋاقىت وتسە دە «Astra Bus» توڭىرەگىندە شەشىمىن تاپپاي تۇرعان ماسەلەلەر بارشىلىق. ماسەلەن, اتالعان قوسىمشاعا ەنگەن قوعامدىق كولىكتەردىڭ باسىم بولىگىنە GPS جۇيەسى ورناتىلماعان. №61 باعىتىنداعى اۆتوبۋس جۇرگىزۋشىسىنەن سۇراعانىمىزدا جاڭادان قوسىلعان اۆتوبۋستارعا GPS قويىلماعانىن العا تارتتى. قازىرگى ۋاقىتتا اتالعان قوسىمشا ارقىلى №1, 3, 7, 11, 26, 32, 35, 36, 38, 39, 42, 60, 61, 71, 72, 80, 120, 127 باعىتىنداعى كولىكتەردىڭ قاي تۇستا كەلە جاتقانىن ءبىلۋ مۇمكىن ەمەس. ال استانانىڭ ساقىلداعان سارى ايازىندا اۆتوبۋس كۇتىپ تۇرۋ قيامەت دەسە بولادى.
قورىتا ايتار بولساق, ەلباسىنىڭ «تسيفرلى قازاقستان» باعدارلاماسى تولىعىمەن جۇزەگە اسىرىلۋى ءتيىس. الايدا ءاربىر ۇيىم, مەكەمە جوعارىدا ايتىلعانداي قيىندىقتار تۋىنداماس ءۇشىن بۇل ىسكە جان-جاقتى دايىن كۇيدە كەلگەنى دۇرىس. دامىعان مەملەكەتتەرمەن يىق تىرەستىرۋ ءۇشىن ەل تۇرعىندارىنىڭ جايلى ءومىرى مەن قۇقىعى ءبىرىنشى كەزەكتە ويلاستىرىلۋى ءتيىس.
