بوتاگوز كەنجەباەۆا, قالا تۇرعىنى:
– سالەمەتسىزدەر مە, «استانا اقشامى»! كەشە №10 باعىتتاعى اۆتوبۋسقا ءمىندىم. تولەم كارتاسىن ءالى ساتىپ الماعاندىقتان, 180 تەڭگەگە ءبىر رەتتىك بيلەت الماقشى بولدىم. بىراق كوندۋكتور بيلەتتى ارنايى اپپاراتتان ەمەس, ءوز قالتاسىنان شىعارىپ بەردى. بيلەتتەگى ۋاقىت – 9:16, ال مەن مىنگەن كەز – 9:35. سالدەن سوڭ تاعى ءبىر جولاۋشىنىڭ 180 تەڭگەسىن الدى دا, ول كىسىنىڭ ەكى ايالدامادان سوڭ تۇسەتىنىن ەستىپ, بيلەت بەرگىسى كەلمەدى. وسىنداي زاڭ بۇزۋشىلىقتارى ءۇشىن كوندۋكتور قالاي جازالانادى؟
بۇل سۇراققا «استانا LRT» مەكەمەسىنىڭ بايلانىس قىزمەتى باس مەنەدجەرى ءاليا جارقىمبەكوۆا جاۋاپ بەرەدى:
– كوندۋكتوردىڭ بيلەتتى اپپاراتتان ەمەس, ءوز قالتاسىنان شىعارىپ بەرۋى زاڭسىز. ويتكەنى ول بيلەت بۇرىن ءتۇسىپ كەتكەن جولاۋشىنىكى بولۋى مۇمكىن. ءار جولاۋشىعا جاڭا بيلەت اپپاراتتان شىعارىلىپ بەرىلۋى كەرەك. كوندۋكتوردىڭ جولاۋشىعا مۇلدە بيلەت بەرمەۋى دە زاڭعا قايشى. ەگەر تۇرعىندار وسىنداي وقيعالارعا كۋا بولسا, اۆتوبۋستىڭ باعىتى, مەملەكەتتىك ءنومىرى, كوندۋكتوردىڭ اتى-ءجونى (جۇرگىزۋشى ورنىنىڭ ارتىنداعى قابىرعادا جازۋلى تۇرادى) سياقتى اقپاراتتى «109» نومىرىنە حابارلاۋى ءتيىس. كوندۋكتوردىڭ اتىنا ءبىرىنشى رەت شاعىم تۇسسە, ونىڭ ماسەلەسى تارتىپتىك كەڭەستە قارالىپ, 1-2 كۇنگە جۇمىستان شەتتەتىلەدى. سونداي-اق اكىمشىلىك قۇقىق بۇزۋشىلىق تۋرالى كودەكستىڭ 623-بابىنا سايكەس, وعان 5 اەك مولشەرىندە ايىپپۇل سالىنادى. ەگەر ەكىنشى رەت زاڭ بۇزسا, جۇمىستان شىعارىلادى دا, قالاداعى 8 اۆتوپاركتىڭ بىردە-بىرىندە قايتادان جۇمىس ىستەي المايدى.
