ەلىمىزدەگى ۇلتتىق مۋزەيدىڭ «التىن ادامنىڭ» الەم مۋزەيلەرىنە شەرۋى» اتتى حالىقارالىق جوباسى اياسىندا رەسەي فەدەراتسياسىنداعى تاتارستان رەسپۋبليكاسىنىڭ باس قالاسى قازاندا 15 ناۋرىزدان باستاپ «ۇلى دالا: تاريح جانە مادەنيەت» دەگەن كورمەسى اشىلادى.
بۇل كورمەنىڭ جۇمىسى ءبىر ايعا سوزىلادى. يگىلىكتى شارانىڭ ماقساتى – قازاقستاننىڭ تاريحي-مادەني باي مۇراسىمەن شەتەلدىك كورەرمەندى تانىستىرۋ. كورمەگە وتكەن عاسىردىڭ 70-ءشى جىلدارى الماتى وبلىسىنداعى ەسىك قورعانىنان تابىلعان «التىن ادامنىڭ» رەكونسترۋكتسياسى مەن ونىڭ
التىن تىلىمشىلەر اشەكەيلەپ تۇرعان كونۋس ءپىشىندى باس كيىمى جانە كونە تەمىر عاسىرىنىڭ ارحەولوگيالىق كوللەكتسياسى قويىلادى. ايتپاقشى, «جيىرماسىنشى عاسىردىڭ جاڭالىعى» دەپ باعالانعان بۇل قۇندى مۇرانى كورنەكتى ارحەولوگ كەمەل اقىشەۆ تاپقان.
سونداي-اق قازان جۇرتشىلىعىنا ۇلتتىق مۋزەيدىڭ قورىنداعى 127 جادىگەر ۇسىنىلادى. سولاردىڭ قاتارىندا تاقساي, تالدى-2 جانە بەرەل سەكىلدى ساق قورعاندارىنان تابىلعان ارحەولوگيالىق بىرەگەي ولجالار كورسەتىلەدى. بۇلاردىڭ ءبارى – قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى سانالادى.
بۇعان دەيىن «التىن ادامنىڭ الەم مۋزەيلەرىنە شەرۋى» اتتى حالىقارالىق جوباسى شەڭبەرىندە رەسەي, بەلارۋس, ازەربايجان, قىتاي, پولشا جانە وڭتۇستىك كورەيا ەلدەرىندە اۋقىمدى كورمە ۇيىمداستىرىلدى. ەندى اتالعان جوبا جىل سوڭىنا دەيىن تاعى دا التى ەلگە ساياحات جاساماق.
