التىن سانى ارتپاي جاتىر

يندونەزيانىڭ جاكارتا جانە پالەمبانگ قالالارىندا ءوتىپ جاتقان ازيا ويىندارىندا ەل قورجىنىنا تۇسكەن جۇلدەلەر سانى 16-عا جەتتى. ازيادادا قازاقستان كومانداسىنىڭ ەنشىسىندە – ازىرگە 1 التىن, 5 كۇمىس جانە 12 قولا مەدال.

21 تامىز, ءۇشىنشى كۇن

كيريلل كازانتسەۆ – قولا جۇلدەگەر. وتانداسىمىز ەل تاريحىندا العاش رەت ماۋنتينبايكتەن جۇلدە سالدى. ول ءبىرىنشى اينالىمدا بارىنەن بۇرىن كەلىپ, مارەگە جاقىندا­عاندا قىتاي سپورتشىلارىن العا وزدىرىپ الدى.
رۋسلان جاپاروۆ – قولا جۇلدەگەر. 80 كگ سالماقتا ەل نامىسىن قورعاعان تاەكۆوندوشى جارتىلاي فينالدا يران سپورتشىسىنا ەسە جىبەرىپ الدى. ءسويتىپ ازيادانىڭ قولا جۇلدەسىنە قول جەتكىزدى.
جانسەل دەنيز – كۇمىس جۇلدەگەر. تاەكۆوندوشى قىز التىنعا تالاسقان سايىستا كورەيالىق سپورتشىعا باسىمدىق بەرىپ قويدى.
سۋ دوبىنان قازاقستان قۇراماسى – كۇمىس جۇلدەگەر. قىزدار كومانداسى 5 كەزدەسۋدىڭ تورتەۋىندە جەڭىسكە جەتتى. بۇل سىندا التىن قىتايدىڭ قانجىعاسىندا كەتتى.
ەلميرا سىزدىقوۆا – قولا جۇلدەگەر. ايەلدەر كۇرەسىنەن 76 كگ سالماقتا بەلدەسكەن ەلميرا قولا جۇلدە ءۇشىن كۇرەستە وڭ­تۇستىك كورەيا وكىلىن 5:2 ەسەبىمەن جەڭدى.
مەيرامبەك ايناعۇلوۆ – قولا جۇلدەگەر. گرەك-ريم كۇرەسىنەن 60 كگ سالماقتا مەيرامبەك سولتۇستىك كورەيا سپورتشىسىن 13:5 ەسەبىمەن جەڭىپ, ءۇشىنشى ورىندى يەلەندى.
المات كەبىسپاەۆ – كۇ­مىس جۇلدەگەر. گرەك-ريم كۇرەسىنەن 67 كگ سالماقتا بەلدەسكەن الماس فينالدا وڭتۇستىك كورەيانىڭ وكىلى ريۋ زان سۋدان جەڭىلدى.

22 تامىز, ءتورتىنشى كۇن

سەمسەرلەسۋدەن قازاق­ستان ايەلدەر كومانداسى – قولا جۇلدەگەر. سەمسەر­لەسۋدىڭ سابليا تۇرىنەن تامارا پوچەكۋتوۆا, ايگەرىم سارىباي, ايبيكە حابيبۋللينا جانە تاتيانا پريحودكو جارتىلاي فينالدان قىتاي قۇراماسىنان جەڭىلدى. سپورتتىڭ بۇل تۇرىندە جارتىلاي فينالدان جەڭىلىس تاپقاندارعا بىردەن قولا بۇيىرادى.
الەكساندر كۋليكوۆ – قولا جۇلدەگەر. ەسكەك ەسۋدەن قازاقستاندىق سپورت­شى «سلالوم» باعدارلاماسى بويىنشا ءۇشىنشى ورىننان كورىندى. ونىڭ الدىن جاپون جانە قىتاي سپورتشىلارى وراپ كەتتى.
سەمسەرلەسۋدەن قازاق­ستان ەرلەر كومانداسى – قولا جۇلدەگەر. وسى سپورتتىڭ شپاگا تۇرىنەن ءبىزدىڭ جىگىتتەر جارتىلاي فينالدا جاپونياعا جول بەرىپ, ۇزدىك ۇشتىككە ەندى. بۇعان دەيىن سەمسەرلەسۋدەن ەكى جۇلدە تۇسكەن ەدى.
نۇرلان مىرزاباەۆ – قولا جۇلدەگەر. قازاقس­تاندىق تاەكۆوندوشى 80 كگ سالماقتا سىنعا ءتۇسىپ, جارتىلاي فينالعا دەيىن جەتتى. سوڭعى سايىسىندا كورەيالىق سپورتشىدان ءبىر ۇپاي ايىرماشىلىعىمەن جەڭىلدى.
دميتري بالاندين – قولا جۇلدەگەر. ريو وليمپياداسىنىڭ چەمپيونى 100 مەترگە براسس ادىسىمەن جۇزۋدە جاپونيا جانە قىتاي سپورتشىلارىنان قالىپ قويدى.

دايىنداعان
ورىنبەك وتەمۇرات
دەرەككوزى – olimpic.kz