كەشە ورتالىق كوممۋنيكاتسيالار قىزمەتىندە استانا اكىمىنىڭ ورىنباسارى قوسمان ايتمۇحامەتوۆتىڭ قاتىسۋىمەن ءباسپاسوز ءماسليحاتى ءوتتى. جيىن بارىسىندا ەلورداداعى تولاسسىز جاۋعان جاڭبىردىڭ بىرنەشە كوشەنى الىپ كەتۋ ماسەلەسى تالقىلاندى.
– «قازگيدرومەت» رمك مالىمەتى بويىنشا 20-21 تامىز كۇندەرى استانانىڭ وڭ جاعالاۋىندا 36 ميلليمەتر, ال سول جاعالاۋىندا 45 ميلليمەترلىك جاۋىن-شاشىن جاۋىپتى. بۇل ايلىق نورمادان 40 پايىزعا ارتىعىراق. بۇعان قوسا نوسەرلى كارىز جۇيەسى ۇزدىكسىز جۇمىس ىستەپ, ءبىر تاۋلىك ىشىندە ءبىر ميلليون كۋب, ياعني ساعاتىنا 45 مىڭ كۋب سۋ قابىلدادى. قالانىڭ نەگىزگى ماگيسترالدى كوشەلەرىندە سۋ باسۋ جاعدايى تىركەلگەن جوق, – دەيدى قالا باسشىسىنىڭ ورىنباسارى.
قوسمان ايتمۇحامبەتوۆتىڭ ايتۋىنشا, جاۋىننىڭ سۋىن قابىلدايتىن تەحنيكالار ۇلگەرمەي, ناتيجەسىندە ناجىمەدەنوۆ, تاۋەلسىزدىك, مومىشۇلى كوشەلەرىن سۋ الىپ كەتكەن. تەك تاڭعى 05:00 شاماسىندا اتالعان كوشەلەردەن سۋدى تولىق سورىپ, تازارتۋ مۇمكىن بولعان.
– مامانداندىرىلعان كاسىپورىندار مەن كوممۋنالدىق كاسىپورىندار بۇل كۇندەرى دامىلسىز جۇمىس ىستەدى. سۋ الىپ كەتۋ جاعدايلارىنا بايلانىستى قالا تۇرعىندارىنان كەشىرىم سۇرايمىز, – دەدى قوسمان ايتمۇحامبەتوۆ.
بۇدان بولەك جيىن بارىسىندا سالونىنا سۋ كىرىپ كەتكەن اۆتوبۋس جۇرگىزۋشىسىنىڭ جۇمىستان بوساتىلۋى مۇمكىن ەكەنى ايتىلدى.
– جۇرگىزۋشىگە بۇل كوشەمەن جۇرمەۋى كەرەكتىگى ەسكەرتىلگەن. ونىڭ ۇستىنە كوشەنى سۋ الىپ كەتكەنىنەن حاباردار بولىپتى. جولاۋشىلارمەن كەلە جاتقانىن ەسكەرۋى كەرەك ەدى. ال ءبىز كوشەنى جاۋىپ تاستاپ, پاترۋلدىك كولىكتى, قورشاۋدى قويعانبىز. الماتى اۋدانى اكىمدىگىنىڭ قىزمەتكەرلەرى ودان كەرى بۇرىلۋدى تالاپ ەتكەن ەكەن. بىراق ول العان بەتىنەن قايتپاي, ارى قاراي جۇرە بەرىپتى. اۆتوبۋس جۇرگىزۋشىسى مومىشۇلى كوشەسىنە توقپانوۆتى اينالىپ وتە الار ەدى. وزگە اۆتوبۋستار بۇل ماڭايدى اينالىپ ءوتىپتى. ونىڭ ەندىگى جۇمىستا قالۋ-قالماۋىن «Astana LRT» باسشىلىعى شەشەدى, – دەدى استانا اكىمىنىڭ ورىنباسارى.
ايان ءابدۋالي
