19 مامىر كۇنى «جاستار» سارايىندا «ءبارى دە ءان ايتادى» اتتى كاراوكەدەن اشىق چەمپيوناتىنا قاتىسۋعا نيەتتىلەردى تىڭداۋ وتەدى. وعان 18 جاستان اسقان بارشا ادام قاتىسا الادى. ساعات 17.00-دە باستالاتىن شارا 20.00-گە دەيىن جالعاسادى.
بۇل چەمپيونات استانا اكىمدىگىنىڭ قولداۋىمەن ءۇشىنشى جىل قاتارىنان ۇيىمداستىرىلىپ وتىر. جەڭىمپازدار مەن جۇلدەگەرلەر قالا كۇنى مەرەكەسى تويلاناتىن مەزگىلدە انىقتالادى. باس جۇلدەگەرگە استانا اكىمىنىڭ كۋبوگى مەن اقشالاي سىيلىق تاپسىرىلادى.
العاشقى ىرىكتەۋ كەزەڭىنەن وتكەندەردى بەلگىلى انشىلەر دايىنداپ, ترەنينگتەر مەن شەبەرلىك ساباقتارىن ۇيىمداستىرادى. ەكىنشى ىرىكتەۋدەن سۇرىنبەگەندەر جارتىلاي فينالعا, ودان وتكەندەر فينالعا جولداما الادى.
قاتىسۋشىلار جاس ايىرماشىلىعىنا قاراي ءۇش توپقا بولىنەدى. ءار توپ بويىنشا جەڭىمپازعا جۇلدە بەرىلەدى. ال استانا اكىمىنىڭ كۋبوگى ەڭ كوپ بالل جيناپ, توپ جارعان انشىگە تابىستالادى.
بيىلعى چەمپيونات قالا كۇنىمەن قاتار «ەكسپو-2017» حالىقارالىق مامانداندىرىلعان كورمەسىنە ارنالىپ وتىر. العاشقى ىرىكتەۋ كەزەڭى كورمەنىڭ اشىلۋىنا وراي 10 ماۋسىمدا وتەدى. ەكىنشى كەزەڭ 24 ماۋسىمعا قويىلدى. ال جارتىلاي فينال مەن فينال 5-6 شىلدەدە ۇيىمداستىرىلادى.
امانعالي قالجانوۆ
