ۇلى اقىننىڭ تۋعان كۇنى, ياعني 10 تامىزدا, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە اباي اتامىزدىڭ 175 جىلدىق مەرەيتويىنا وراي «اباي اكادەمياسى» سەرياسىمەن جارىق كورگەن كىتاپتاردىڭ تانىستىرىلىمى بولدى.
اباي كۇنى مەرەكەسىندە ۇيىمداستىرىلعان شارا بارىسىندا ءدال وسى سەريامەن شىققان كەزەكتى 12 زەرتتەۋ ەڭبەك جۇرتشىلىق نازارىنا ۇسىنىلدى. اتاپ ايتقاندا, ەكى كىتاپتان تۇراتىن «ابايدىڭ عۇمىرناماسى» (عىلىمي-تانىمدىق دەرەكناما جيناعى), جوبا جەتەكشىسى – ە.سىدىقوۆ, اكادەميك; 4 تومدىق «اباي جانە قازاق سوتسيۋمى» (ۇجىمدىق ماقالالار جيناعى), جوبا ۇيلەستىرۋشىلەرى – اكادەميك د.قامزابەكۇلى, دوتسەنتتەر – د.ايتماعامبەتوۆ, ە.سايلاۋباي; «ابايدىڭ ءپالساپاسى» (اۆتورلىق وي-تولعاۋلار), قالام يەلەرى – اكادەميك ع.ەسىم, رھD ر.كەمەرباي; «ابايدىڭ كوركەمدىك جانە عىلىمي دۇنيەتانىمى» (عىلىمي ىزدەنىستى مونوگرافيا), اۆتورى – پروفەسسور س.نەگيموۆ; اباي جانە ونىڭ الەۋمەتتىك ورتاسى تۋرالى «سوقتىقپالى, سوقپاقسىز زاماندا ءوستى» (عىلىمي ىزدەنىستى مونوگرافيا), اۆتورى – پروفەسسور ت.جۇرتباي; «اباي جانە الاش ساباقتاستىعى: تاريحي-فيلوسوفيالىق, ادەبي-لينگۆيستيكالىق اسپەكت ابايدىڭ كوركەمدىك جانە عىلىمي دۇنيەتانىمى» (ۇجىمدىق مونوگرافيا), جوبا جەتەكشىلەرى – اكادەميك د.قامزابەكۇلى, الاشتانۋشى عالىم س.اققۇلۇلى; «ابايدىڭ پەداگوگيكالىق دۇنيەتانىمى» (ۇجىمدىق مونوگرافيا), جوبا جەتەكشىسى – پروفەسسور ر.تولەۋبەكوۆا; بالالارعا ارنالعان «بەس اسىل ءىس» تانىمدىق جيناعى. جاڭا تەحنولوگيالارعا نەگىزدەلگەن جوبا جەتەكشىسى – پروفەسسور ج.اسكەربەكقىزى.
