استانا قالاسى ارداگەرلەر كەڭەسىنىڭ كەزەكتى پلەنۋمى ءوتتى.
جيىننىڭ كۇن تارتىبىنە «الدا وتەتىن پرەزيدەنت سايلاۋىندا ارداگەرلەردىڭ اتقاراتىن مىندەتتەرى مەن ماقساتتارىن ايقىنداۋ», «ارداگەرلەر كەڭەسىنىڭ ۇيىمداستىرۋ جۇمىستارىنا قاتىستى ماسەلەلەردى تالقىلاۋ» جانە «ارداگەرلەر كەڭەسىنە كەلىپ تۇسكەن ءوتىنىش-ۇسىنىستاردى قاراۋ» سىندى ءۇش ماسەلە قويىلىپ, ماڭىزدى تۇيىندەر تالقىلاندى.
ارداگەرلەردىڭ 20 قاراشادا وتەتىن پرەزيدەنت سايلاۋىنا قاتىسۋىن جانداندىرۋ ماقساتىندا وتكەن بۇل شارادا قالالىق ارداگەرلەر كەڭەسىنىڭ توراعاسى سانسىزباي ەسىلوۆ «قر پرەزيدەنت سايلاۋى الدىنداعى ارداگەرلەر قوزعالىسىنىڭ قالالىق اكتيۆىنىڭ مىندەتتەرى تۋرالى» دەگەن تاقىرىپتا بايانداما جاسادى. الدىمەن بۇل رەتكى سايلاۋدىڭ ءمان-ماڭىزىنا توقتالعان توراعا ەلىمىزدە 2019 جىلدان باستاپ ەلىمىزدە اۋقىمدى ساياسي رەفورمالار جۇرگىزىلىپ, ەل ومىرىندە ەلەۋلى وزگەرىستەر بولعانىن ايرىقشا اتاپ ءوتتى. «2019 جىلدان باستاپ پرەزيدەنت قاسىم-جومارت توقاەۆتىڭ باستاماسىمەن اتا زاڭعا وزگەرىستەر مەن تولىقتىرۋلار ەنگىزۋ جونىندە رەسپۋبليكالىق رەفەرەندۋم ءوتتى. وسىعان سايكەس اتا زاڭىمىزعا ۇلكەن وزگەرىستەر جاسالدى. ەندى, مىنە, كەزەكتەن تىس پرەزيدەنت سايلاۋىن وتكىزگەلى جاتىرمىز. بۇل دا – ەلىمىزدىڭ ساياسي اۋقىمىنداعى اسا ەلەۋلى ۋاقيعا. وسى سايلاۋ ارقىلى ءبىز ءوز بولاشاعىمىزعا تاڭداۋ جاسايمىز, سوندىقتان ءاربىر ازامات بۇل سايلاۋعا بەيجاي قاراماي, بەلسەنە داۋىس بەرۋى كەرەك. ەل بولاشاعىنا قاتىستى مۇنداي ساياسي ناۋقاندا اراداگەرلەر دە ءوز ءرولىن تولىق ساۋەلەندىرىپ, سايلاۋدا بەلسەندىلىك تانىتۋى كەرەك» دەدى سانسىزباي ەسىلوۆ.
