ۇلتتىق ەكونوميكا ءمينيسترى الىبەك قۋانتىروۆ پەن استانا قالاسى اكىمىنىڭ ورىنباسارى نۇرلان سولتامبەكوۆ ەلورداداعى بىرقاتار الەۋمەتتىك جانە ونەركاسىپتىك نىساندى ارالادى.
ولار الدىمەن باس شاھارداعى №2 جىلۋ ەلەكتر ورتالىعىنا ات باسىن بۇردى. ءىس-شاراعا قاتىسۋشىلار بۇل جەردە تاريف بەلگىلەۋ, كومىر قازاندىقتارىن گازعا اۋىستىرۋ ماسەلەلەرىن تالقىلادى.
مامانداردىڭ مالىمدەۋىنشە, ستانسانىڭ جىلۋ ەنەرگياسىنىڭ قۋاتى – 2 106 گكال/ساع, ەلەكتر قۋاتى – 600 مۆت. وندىرىلگەن ەلەكتر ەنەرگياسى ەلوردانىڭ ەلەكتر جۇكتەمەسىن جانە ستانسانىڭ ءوز قاجەتتىلىگىن جابۋعا جۇمسالادى.
بۇدان ءارى قر ۇلتتىق ەكونوميكا ءمينيسترى مەن قالا اكىمىنىڭ ورىنباسارى باستاعان توپ ينتەگراتسيالانعان وندىرىستىك كەشەننىڭ قۇرىلىسى بارىسىمەن تانىستى.
«استانا-تەحنوپوليس» ارنايى ەكونوميكالىق ايماعى اۋماعىندا ورنالاسقان كاسىپورىننىڭ جالپى اۋدانى 17 مىڭ شارشى مەتر ەكەن. ول 5 تسەحتان تۇرادى. كەشەندى وسى جىلدىڭ سوڭىنا دەيىن پايدالانۋعا بەرۋ جوسپارلانىپ وتىر. تەرەزەلەر, مەديتسينالىق جابدىقتار, كەڭسە جيھازدارى مەن مەتالل بۇيىمدارىن شىعاراتىن زاۋىتتىڭ قۇنى 21,7 ملرد تەڭگەنى قۇرايدى.
– بۇل ءوندىرىس تولىعىمەن جەكە شەتەلدىك ينۆەستيتسيا ەسەبىنەن قارجىلاندىرىلادى. ءبىز ءوز تاراپىمىزدان جاڭا جۇمىس ورىندارى اشىلىپ, جاڭا تەحنولوگيالار ەنگىزىلەتىن وسىنداي سالالارعا قولداۋ كورسەتۋگە دايىنبىز. وتاندىق ءوندىرىس تۇتىنۋشىلىق سۇرانىستى ارتتىرادى. مۇنىڭ بارلىعى ەلوردا ەكونوميكاسىنا وڭ اسەر ەتىپ, بيۋدجەتكە قوسىمشا كىرىس اكەلەدى, – دەدى مينيستر.
قىزمەت تۇرلەرىنىڭ تىزبەسىن كەڭەيتۋ شەڭبەرىندە قازىرگى ۋاقىتتا مينيسترلىك وكىلدەرىمەن بيۋدجەتتىڭ شارتتى شىعىندارىن ەسەپتەۋ پىسىقتالىپ جاتىر.
ودان سوڭ مينيستر قالاداعى «كوكتال-1», «كوكتال-2» جانە «اگروقالاشىق» تۇرعىن الابىنىڭ تۇرعىندارىمەن كەزدەستى. بۇل رەتتە استانالىقتار مينيسترگە وزدەرىن تولعاندىرعان سۇراقتارىن تىكەلەي قويىپ, قالاداعى گازداندىرۋ, الەۋمەتتىك نىسانداردى, ونىڭ ىشىندە مەكتەپتەر, بالاباقشالار, مەديتسينالىق ورتالىقتار, كارىز جەلىلەرىن سالۋ, سونداي-اق قوسىمشا اۆتوبۋس باعىتتارىن ىسكە قوسۋ ماسەلەلەرىن كوتەردى.
ءوز كەزەگىندە ءا.قۋانتىروۆ تۇرعىنداردىڭ وتىنىشتەرىن مۇقيات تىڭداپ, بارلىق ماسەلەلەر تولىق زەردەلەنىپ, اكىمدىكپەن بىرلەسىپ قارالاتىنىن اتاپ ءوتتى.
