استانادا دەنساۋلىق ساقتاۋ جۇيەسىنىڭ ينفراقۇرىلىمىن دامىتۋعا ەرەكشە ماڭىز بەرىلىپ وتىر. ونىڭ ىشىندە مەديتسينا قىزمەتكەرلەرىنىڭ الەۋمەتتىك جاعدايىن جاقسارتۋعا باعىتتالعان شارالار اتقارىلۋدا. اتاپ ايتقاندا, 2020 جىلدان بەرى دارىگەرلەردىڭ ورتاشا جالاقىسى 60 پايىزعا وسسە, ورتا بۋىن ماماندارىنىڭ جالاقىسى 50 پايىزعا ءوستى. سونداي-اق ەمدەۋ مەكەمەلەرىنىڭ ماتەريالدىق-تەحنيكالىق بازاسىن نىعايتۋ بويىنشا دا جۇيەلى جۇمىستار جۇرگىزىلۋدە. جاقىندا عانا جەدەل جاردەم ستانساسى 55 ماشينامەن تولىقسا, بۇعان دەيىن 100-دەن اسا ارنايى كولىك پەن رەانيموبيل بەرىلگەن بولاتىن. ەلوردا اكىمى التاي كولگىنوۆ مەديتسينالىق مەكەمەلەردىڭ باسشىلارىمەن مەديتسينالىق كومەكتىڭ ساپاسىن ارتتىرۋ جانە مەديتسينا ورتالىقتارىن ودان ءارى جاراقتاندىرۋ ماسەلەسىن تالقىلادى. بۇل تۋرالى قالا باسشىسى ءوزىنىڭ الەۋمەتتىك جەلىدەگى پاراقشاسىندا جازدى.
«وسىعان دەيىنگى كەزدەسۋدە مەديتسينا قىزمەتكەرلەرىمەن ءارى تۇرعىندارمەن بىرگە اتقارىلۋى ءتيىس جۇمىس جوسپارى جاسالعان. ولاردىڭ باسىم بولىگىن ورىندادىق. بۇگىنگى كەزدەسۋدە دە كوتەرىلگەن ماسەلەلەردى شەشۋگە كىرىسىپ كەتتىك. ماسەلەن, مەديتسينا قىزمەتكەرلەرى مەديتسينالىق نىسانداردى سالۋ جانە جوندەۋ, كادرلاردى دايارلاۋ, نىسانداردى تولىق جاراقتاندىرۋ, «قاۋىپسىز اۋلا» جوباسىن ودان ءارى ەنگىزۋ جانە تاعى باسقا ماسەلەلەردى كوتەرگەن ەدى. ءبىرىنشى ماسەلە – دەنساۋلىق ساقتاۋ جۇيەسىنىڭ ينفراقۇرىلىمىن دامىتۋ. ەلوردانىڭ اۋقىمدى جوبالارىنىڭ ءبىرى تەمىرجول اۋرۋحاناسىنىڭ (№3 كوپسالالى قالالىق اۋرۋحانا) «Ramada Plaza» عيماراتىنا كوشۋى بولىپ سانالادى. ەسكى تەمىرجول اۋرۋحاناسىنىڭ اۋماعىنا جاڭا پەريناتالدىق ورتالىق سالىنادى, ويتكەنى بۇل شاعىن اۋداندا وسى ماسەلە (سارىارقا اۋدانى) وتە وزەكتى بولىپ تۇر. بۇدان بولەك, الماتى اۋدانىندا №1 كوپسالالى قالالىق اۋرۋحاناسىنىڭ جانىنان تاعى ءبىر پەريناتالدىق ورتالىق بوي كوتەرەدى» دەدى ا.كولگىنوۆ.
قالا باسشىسى بىرقاتار مەديتسينالىق مەكەمەلەرگە جوندەۋ جۇرگىزىلگەنى, سول سياقتى «جاعالاۋ-3» جانە «نۇرلى جول» ۆوكزالى اۋدانىندا امبۋلاتوريالىق-ەمحانالىق كەشەندەرىنىڭ, «كوكتال-1», «پريگورودنىي», «تەلمان» جانە تاعى باسقا ەلدى مەكەندەردە العاشقى مەديتسينالىق-سانيتارلىق كومەك ورتالىقتارىنىڭ قۇرىلىسى جوسپارلانعانىن اتاپ ايتتى. ماسەلەن, قادامدىق قولجەتىمدىلىك اياسىندا سوڭعى 3 جىلدا 40 «ءۇي جانىنداعى دارىگەر» نىسانى (ونىڭ 7-ەۋى ەلدى مەكەندەردە ورنالاسقان) اشىلدى. استانا اكىمدىگى جىل سوڭىنا دەيىن تاعى وسىنداي 10 نىسان اشۋدى جوسپارلاپ وتىر. وعان دا جەكە ينۆەستيتسيالار تارتىلادى.
«ەكىنشى ماسەلە – مەديتسينا قىزمەتكەرلەرىنە جاعداي جاساۋ. 2020 جىلدان باستاپ دارىگەرلەردىڭ ورتاشا جالاقىسى 60%-عا, ورتا بۋىن مەديتسينا قىزمەتكەرلەرىنىڭ جالاقىسى 50%-عا ءوستى. كەلەسى جىلى دارىگەرلەردىڭ جالاقىسىن تاعى 35%-عا, ال ورتا بۋىن مەديتسينا قىزمەتكەرلەرىنىڭ جالاقىسىن 10%-عا كوبەيتۋ جوسپارلانىپ وتىر. كادرلاردى جۇمىلدىرۋ ءۇشىن گرانتتار بولەمىز. وسىلايشا, 3 جىل ىشىندە جوعارى ءبىلىم الۋعا 750 گرانت ءبولىندى. قازىرگى وقۋ جىلىنا 250-گە جۋىق گرانت بولدىك. سول سياقتى مەديتسينا قىزمەتكەرلەرىنە ارناپ جاتاقحانا سالۋدى جوسپارلاپ وتىرمىز. ءۇشىنشى ماسەلە – ماتەريالدىق-تەحنيكالىق بازا. سوڭعى 3 جىلدا مەديتسينا مەكەمەلەرى 3 مىڭعا جۋىق ارنايى جابدىقپەن جابدىقتالدى. ءتورتىنشى ماسەلە – جەدەل مەديتسينالىق جاردەم ستانساسى. وسى جىلدىڭ كۇزىندە جەدەل مەديتسينالىق جاردەم ستانساسىنا تاعى 55 ارنايى ماشينا بەرىلدى. بۇعان دەيىن 100-دەن استام ارنايى كولىك, ونىڭ ىشىندە 65 رەانيموبيل مەديتسينالىق كومەك ستانساسى تاپسىرىلدى» دەپ ءتۇسىندىرىپ بەردى قالا اكىمى.
كەزدەسۋدىڭ سوڭىندا ەلورداداعى ۇزدىك مەديتسينا قىزمەتكەرلەرى قۇرمەت گراموتالارىمەن ماراپاتتالدى.
