ەلوردادا «تازا قازاقستان. استانا – تازالىق پەن ءتارتىپتىڭ ۇلگىسى» اۋقىمدى ەكولوگيالىق ءىس-شاراسى اياسىندا استانادا ۆانداليزمگە قارسى باعىتتالعان «توقتا, ۆاندال!» اكتسياسى ءوتتى, دەپ حابارلايدى astana-akshamy.kz
استانادا ەرىكتىلەر, بەلسەندىلەر, تانىمال سپورتشىلار, ۇەۇ وكىلدەرى, قالا تۇرعىندارى, اۋدان اكىمدىكتەرىنىڭ جانە قالالىق پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسى قىزمەتكەرلەرى, ءماسليحات دەپۋتاتتارى قولداعان «توقتا, ۆاندال» اكتسياسى ءجۇرىپ جاتىر. اكتسيا اياسىندا قالادا كۇندىزگى جانە تۇنگى رەيدتەر وتكىزىلەدى, تۇرعىندار اراسىندا قوعامدىق ءتارتىپتى ساقتاۋ جانە قالا مۇلكىنە ۇقىپتى قاراۋ قاجەتتىلىگى تۋرالى ءتۇسىندىرۋ جۇمىستارى جۇرگىزىلەدى. بوتەننىڭ مۇلكىن قاساقانا ءبۇلدىرۋ اكىمشىلىك جاۋاپكەرشىلىككە اكەپ سوعادى. ۆانداليزم جاساعاندار جازاسىز قالمايدى.
«توقتا, ۆاندال!» اتتى اكتسيا 2021 جىلدان باستاۋ الدى. ءبىز قالاداعى عيماراتتاردىڭ قابىرعالارىنا ەلوردامىزدىڭ ءسانىن كەتىرىپ, بەي-بەرەكەت جازىلعان سۋرەتتەر مەن جازۋلاردى وشىرەمىز. وندا ەسىرتكى ونىمدەرىنە سىلتەمە, سايتتار كورسەتىلگەن بولۋى مۇمكىن. مىنە, ۆانداليزممەن كۇرەسە وتىرىپ, ناشاقورلىقتىڭ دا الدىن الۋعا كومەكتەسەمىز. مۇنداي نارسەلەر كوبىنە عيماراتتاردىڭ قابىرعالارىنا, ايالدامالارعا, ورىندىقتارعا جازىلادى. ۆانداليزم بۇل قوعامدىق مۇلىككە زيان تيگىزىپ قانا قويمايدى, سونىمەن قاتار تۇرعىنداردىڭ قاۋىپسىزدىگى مەن جايلىلىعىنا قاۋىپ توندىرەدى. ءبىز بۇعان نەمقۇرايلى قاراماۋىمىز كەرەك», – دەدى ۆولونتەر يليا جاقسىلىق.
جىل باسىنان بەرى سوت بوتەننىڭ مۇلكىن قاساقانا سىندىرعانى, جالپى پايدالانۋ ورىندارىن لاستاعانى, عيماراتتار مەن تۇرعىن ءۇي-جايلاردى بۇلدىرگەنى ءۇشىن 100-گە جۋىق ادام جازالاندى. ولاردىڭ ءبارى جاۋاپقا تارتىلدى.
اكتسيانىڭ ماقساتى – ءۆانداليزمنىڭ كەز كەلگەن جاعدايىن بولدىرماۋ جانە ەلوردادا تازالىق پەن ءتارتىپتى ساقتاۋ. ءۆانداليزمنىڭ الدىن الۋ جۇمىستارى قالالىق پروكۋراتۋرا مەن پوليتسيا دەپارتامەنتىنىڭ ۇيلەستىرۋىمەن جۇرگىزىلەدى.
ايتا كەتەيىك, استانالىق جاستار ۆەيپكە قارسى اكتسيانى دا قولعا الدى. وسىلايشا, ولار جاستاردىڭ جامان ادەتتەن ارىلىپ, كەرىسىنشە سپورتقا ۇمتىلۋىنا ۇلەس قوسىپ جاتىر.
