استانادا قىزىلوردا وبلىستىق تاريحي-ولكەتانۋ مۋزەيىنىڭ «عاسىرلار رۋحانياتى» اتتى كورمەسى وتۋدە, دەپ حابارلايدى astana-akshamy.kz
قىزىلوردا وبلىستىق تاريحي – ولكەتانۋ مۋزەيى 1939 جىلى اشىلعان. وبلىستىق تاريحي – ولكەتانۋ مۋزەيىنىڭ قورىندا 51239 كورمە قويىلىمدارى بار. كورمە قويىلىمدارىندا ارحەولوگيا مەن ەتنوگرافيا, نۋميزماتيكا, ءمۇسىن, قولدانبالى ونەر بۇيىمدارى, فوتوسۋرەتتەر مەن قۇجاتتار, سيرەك كەزدەسەتىن كىتاپتار توپتامالارى, ولكەنىڭ وسىمدىكتى جانە جانۋار الەمى زاتتارى بار. مۋزەي قورى ارحەولوگيالىق, ەتنوگرافيالىق جيناقتار, زەرگەرلىك اشەكەي بۇيىمدارى, سيرەك كەزدەسەتىن كىتاپتار مەن قولجازبالارعا باي.
ەلوردامىز استانا قالاسىندا العاش رەت ۇيىمداستىرىلىپ وتىرعان «عاسىرلار رۋحانياتى» اتتى كورمەدە سىر ەلىنىڭ باعا جەتپەس اسىل قازىناسى – وتكەننىڭ ىزىندەي, كونەنىڭ كوزىندەي ساقتالىپ كەلگەن تاريحي مۇرالارى مەن جازبا دەرەكتەرى نازارلارىڭىزعا ۇسىنىلادى. اتاپ ايتار بولساق, مۋزەي قورىندا ساقتالعان XVIII-XX عع. ستامبۋل, كاير, قازان, تاشكەنتتە جارىق كورگەن اراب, پارسى, شاعاتاي تىلدەرىندە جازىلعان سيرەك كەزدەسەتىن كىتاپتار جانە قولجازبالارمەن تانىسۋعا بولادى. سونىمەن قاتار, سىر وڭىرىنەن شىققان تۇركى حالىقتارىنا ورتاق تاريحي تۇلعا قورقىت اتانىڭ جازبا ەسكەرتكىشى – «قورقىت اتا كىتابىنىڭ» درەزدەندىك جانە ۆاتيكاندىق نۇسقالارى جانە بۇگىنگى تاڭدا اۆتورلىق ءتول قولتاڭباسى ساقتالعان «شىعىستىڭ ءتىرى سوزدىگى» اتانعان شايىرلىق داڭقى قازاق جەرىنەن اسىپ, كورشىلەس وزبەك, قاراقالپاق, تاجىك ەلدەرىنە تانىلعان سىر بويىنان شىققان جىر سۇلەيى تۇرماعانبەت ىزتىلەۋوۆتىڭ قولجازبالارى دا كورمەدەن ورىن الادى. سىر ءوڭىرىنىڭ تاريحي تۇلعالارى مارال يشاننىڭ ۇلى قالمۇحاممەدتىڭ, سەيىتپەنبەت اۋليەنىڭ, بۇقارباي باتىردىڭ, سەردالى ءبيدىڭ مورلەرى, قازانعاپ كۇيشىنىڭ, ايتىسكەر اقىن ماناپ كوكەنوۆتىڭ, جىرشى الماس الماتوۆتىڭ جانە ت.ب. سىر بويىنان شىققان ونەر يەلەرىنىڭ وزدەرى قولدانعان مۋزىكالىق اسپاپتارى قويىلادى.
ءىس-شارانىڭ ماقساتى – قىزىلوردا وبلىستىق تاريحي-ولكەتانۋ مۋزەيى قورلارىندا ساقتالعان حالقىمىزدىڭ رۋحاني قازىناسى بولىپ تابىلاتىن – كونە قۇندى جازبا مۇرالارىمىز بەن تاريحي جادىگەرلەرىمىزدى جانە كيەلى سىر ءوڭىرىنىڭ رۋحاني-مادەني تاريحىن ناسيحاتتاۋ.
