مەملەكەت باسشىسىنىڭ باستاماسىمەن ءوتىپ جاتقان «تازا قازاقستان, ەلوردا – تازالىق پەن ءتارتىپتىڭ ۇلگىسى» اتتى ەكولوگيالىق اكتسياعا بولاشاق مەديتسينا ماماندارى دا اتسالىستى. كەشە استانا مەديتسينا ۋنيۆەرسيتەتىنىڭ 7 مىڭنان استام ستۋدەنتى قالادا سەنبىلىككە شىقتى.
اتالعان وقۋ ورنىنىڭ پرورەكتورى دياس سايدانعازيننىڭ ايتۋىنشا, بۇل تازالىق اكتسياسى ەل ەرتەڭى جاستاردىڭ پاتريوتتىق سەزىمىن ارتتىرىپ, ولاردى ءوز ەلىن سۇيەتىن, اينالاسىنا جانى اشيتىن قامقور ەتىپ تاربيەلەۋدە ماڭىزى زور. استانا قالاسى اكىمدىگىنىڭ قولداۋىمەن ۇيىمداستىرىلعان ءىس-شارا بارىسىندا ۋنيۆەرسيتەت باسشىلىعى مەن وقىتۋشىلارى جاستاردى اتالعان وقۋ ورنىنىڭ قالادا بىرنەشە جەردە ورنالاسقان عيماراتتارىن, سول ماڭداعى كوشەلەردى تازالاۋعا جۇمىلدىردى.
-پرەزيدەنتىمىزدىڭ باستاماسىنا قولداۋ ءبىلدىرۋ ماقساتىندا وتكەن اكتسيادا ءبىزدىڭ ستۋدەنتتەر تەك وقۋ ورىندارى اۋماعىن عانا ەمەس, ەسەنبەرلين كوشەسىنەن باستاپ كەنەسارى كوشەسىنە دەيىن بەيبىتشىلىك كوشەسىن ەكى قاپتالىنان قامتي وتىرىپ, تازالاۋ جۇمىستارىن جۇرگىزدى. قىستان قالعان شىرىگەن جاپىراقتار مەن قوقىستاردى جيناپ, قاپتارعا سالدى جانە ۋنيۆەرسيتەت جانىندا 30 ءتۇپ اعاش ەكتى, – دەدى اكتسيا بارىسىندا وقۋ ورنىنىڭ پرورەكتورى.
ەكولوگيالىق اكتسياعا قاتىسقان شەتەلدەن كەلگەن ستۋدەنتتەردىڭ ءبىرى سايف مۋنيب الي دە ءوزىنىڭ وسىنداي ماڭىزدى ءىس-شارانىڭ ورتاسىنان تابىلعانىنا قۋانىشتى ەكەنىن جەتكىزدى.
-ەكولوگيا دەگەنىمىز ءجاي ءبىر سانگە اينالعان ءسوز ەمەس, بۇل ءبىزدىڭ دەنساۋلىعىمىز بەن بولاشاق ۇرپاقتاردىڭ يگىلىگى ءۇشىن كورسەتىلەتىن قامقورلىق. قورشاعان ورتانىڭ تازالىعى بارشامىزدىڭ دەنساۋلىعىمىزعا تىكەلەي اسەر ەتەدى. مۇنداي ماڭىزدى اكتسيالاردان ءبىزدىڭ ۋنيۆەرسيتەت ەشقاشان تىس قالعان ەمەس. مەن ءاربىر قازاقستاندىقتاردى وسى ىسكە بەلسەنە قاتىسۋعا شاقىرامىن. «تازا قازاقستاندى» ءبارىمىز بىرگە جاساي الامىز, – دەيدى ول.
ال ۋنيۆەرسيتەتتىڭ جالپى مەديتسينا فاكۋلتەتىنىڭ 4-كۋرس ستۋدەنتى, ءارى وقۋ ورنىنىڭ مادەني دەپارتامەنت باسشىسى ەرسۇلتان قىدىرباي مۇنداعى ستۋدەنتتەر ۆولونتەرلىك قوزعالىستاردىڭ بارىنە بەلسەنە قاتىساتىنىن ايتادى.
-بۇل اكتسيانىڭ تاربيەلىك ماڭىزى زور. «تازا ولكە», «كيەلى مەكەن», «جاسىل ايماق» سىندى بىرنەشە بولىكتەن تۇراتىن اكتسيا ەلىمىزدىڭ تابيعاتىن ايالاپ, ونى قورعاپ, ساقتاۋعا شاقىرادى. اتالعان ءىس-شارالار كوپشىلىك جينالىپ, كوشەنى تازالايتىن ءبىر مەزەتتىك ناۋقانعا اينالماۋى كەرەك. سەبەبى قورشاعان ورتانى بارلىق ۋاقىتتا قورعاۋ – ورتاق پارىزىمىز, – دەيدى اكتسياعا قاتىسۋشى ستۋدەنت.
بۇگىندە بۇل وقۋ ورنىندا بارلىعى 11 مىڭعا جۋىق ستۋدەنت ءبىلىم الادى. سونىڭ باسىم بولىگى قاتىسقان اكتسيا بارىسىندا تازالاۋ جۇمىستارىنا قاجەت جابدىقتاردىڭ ءبارىن قالا اكىمدىگى قامتاماسىز ەتتى.
