بيىل نۇر-سۇلتان قالاسىندا اسكەرگە شاقىرۋ ماۋسىمدارىندا – كوكتەمدە 782, كۇزدە 770 ازاماتتى ارمياعا الدىرۋ جوسپارلانعان. قالالىق ءماسليحاتتىڭ زاڭدىلىق, قۇقىقتىق ءتارتىپ جانە قوعاممەن جۇمىس ماسەلەلەرى جونىندەگى تۇراقتى كوميسسيا وتىرىسىندا وسى ماسەلەنى قالالىق قورعانىس ىستەرى دەپارتامەنتىنىڭ باستىعى مۇرات بەرىكپولوۆ ءمالىم ەتتى. جيىندا وسى جۇمىستى ۇيىمداستىرۋ بارىسى تالقىلانىپ, جان-جاقتى اقپارات بەرىلدى.
بيىلعى ناۋقاندا جۇمىس ىستەمەيتىن جاستاردى اسكەرگە شاقىرۋعا ەرەكشە ەكپىن قويىلعان. ال جالپى العاندا ارمياعا الىنعان جاستار 58,1 پايىزدى نەمەسە 463 ادامدى قۇرادى. بىراق ىندەتكە بايلانىستى توتەنشە جاعدايدىڭ جاريالانۋى بۇل ناۋقانعا كەرى اسەرىن تيگىزدى. سول سەبەپتەن اسكەرگە شاقىرۋ ماۋسىمى 30 تامىزعا دەيىن ۇزارتىلدى. كوميسسيا مۇشەلەرىنىڭ اراسىندا ينفەكتسيانى جۇقتىرعاندار بولدى. بۇل دا ءبىراز قيىندىقتاردى تۋدىردى. اتاپ ايتقاندا, بىرقاتار شاقىرۋ كوميسسيالارىنىڭ جۇمىسى ۋاقىتشا توقتاتىلدى. ناتيجەسىندە كوكتەمدە اسكەرگە شاقىرىلۋى ءتيىس 782 ادامنىڭ 714-ءى نەمەسە 91,3 پايىزى شاقىرىلدى. جالپى, بيىل 1552 ادام ارمياعا الىنۋى ءتيىس.
دەپارتامەنت باستىعى وسىنى ايتا كەلە, كۇزگى اسكەرگە شاقىرۋ ناۋقانى ءالى جۇرگىزىلىپ جاتقانىن, ازىرگە 88 ادام شاقىرىلعانىن جەتكىزدى. سونداي-اق بيىل اسكەري مىندەتتى ازاماتتاردى ارنايى جيىندارعا دا شاقىرۋ جۇرگىزىلدى. بۇل جۇمىس مەملەكەت باسشىسىنىڭ بيىلعى 2 ساۋىردەگى جارلىعى جانە نۇر-سۇلتان قالاسى اكىمدىگىنىڭ قاۋلىلارىنا سايكەس اتقارىلدى. قورىتىندىسىندا مامىر ايىندا 150 ادام شاقىرىلدى. سونىڭ ىشىندە 50-ءى وفيتسەر مەن 100-ءى سەرجانت-ساربازدار بولدى. بۇل قاتاردا شاقىرىلعاندار بلوكبەتتەردى كۇشەيتۋ, قوعامدىق ءتارتىپتى ساقتاۋ, نىساندار مەن كوشەلەردى زالالسىزداندىرۋ سياقتى جۇمىستار مەن ەلوردا جەدەل شتابىنىڭ ىندەتپەن كۇرەسكە قاتىستى شارۋالارىنا تارتىلدى.
الايدا بۇل سالادا پروبلەمالار دا جوق ەمەس. ماسەلەن, اۋداندىق شاقىرۋ كوميسسيالارىنىڭ ەكى قۇرامى عانا دارىگەر ماماندار مەن ورتا بۋىن مەديتسينالىق قىزمەتكەرلەرىنەن جاساقتالعان. سارىارقا جانە بايقوڭىر اۋداندارىنداعى شاقىرۋ پۋنكتتەرىنە عيمارات كەرەك. كەيبىر اسكەردەن جالتارعان ازاماتتاردى ىزدەستىرۋ دە قيىندىق تۋدىردى. سەبەبى ولاردىڭ تىركەلگەن مەكەنجايى جالعان بولىپ شىقتى. كولىكتەر جەتىسپەگەندىكتەن بۇل جۇمىس ءتيىستى دەڭگەيدە جۇرگىزىلمەدى. اۋدانداردىڭ اكىمدىكتەرى دە اسكەرگە شاقىرۋ ناۋقانىن ۇيىمداستىرۋدا سىلبىرلىق تانىتقان.
وسى ورايدا قالالىق ءماسليحات دەپۋتاتتارى اكىمدىكتەردىڭ بۇل تاراپتاعى جۇمىسىن قاتاڭ سىنعا الدى. زاڭدىلىق, قۇقىقتىق ءتارتىپ جانە قوعاممەن جۇمىس ماسەلەلەرى جونىندەگى تۇراقتى كوميسسيانىڭ توراعاسى قايىرلى تاۋكەن جاۋاپتى ورگاندار باسشىلارىنا بارلىق تۇيتكىلدەردى شەشۋ جولدارىن ۇسىنۋدى ايتىپ, ارنايى اقپارات دايىنداۋ كەرەكتىگىن جەتكىزدى.
