قالاداعى ورتالىق بالالار جانە جاسوسپىرىمدەر كىتاپحاناسىندا ەلوردانىڭ 20 جىلدىق مەرەيتويىنا وراي «اسقاقتاي بەر, ەلىمىنىڭ استاناسى» اتتى تاعىلىمعا تولى كەش ءوتتى.
ءىس-شاراعا باس شاھاردىڭ دامۋىنا قال-قادەرىنشە ءوز ۇلەستەرىن قوسقان ازاماتتار قاتىسىپ, ەلىمىزدىڭ باس ورداسى الاتاۋدىڭ ەتەگىندەگى اسەم قالادان ارقا توسىنە قونىس اۋدارعان تاريحي وقيعا تۋرالى ەستەلىكتەر ايتتى.
ساكەن سەيفۋللين مۋزەيىن ءوز قولىمەن قۇرىپ, ۇزاق جىلدار سونى باسقارعان روزا اسىلبەكوۆا اقمولانىڭ وتكەن تاريحىنان سىر تارتىپ, بۇگىنگى ەلوردا جايىندا وقۋشىلارعا ونەگەلى ءسوز سويلەدى. قالانىڭ بايىرعى تۇرعىنى, ءبىلىم بەرۋ ءىسىنىڭ ۇزدىگى وسپان سۇلەيمەنۇلى دا وتكەن جىلداردان وي تولعادى.
«1997 جىلى 8 قاراشادا اقمولاعا قازاقستان رەسپۋبليكاسىنىڭ مەملەكەتتىك رامىزدەر ەتالوندارى مەن پرەزيدەنت بايراعى جەتكىزىلدى. سالتاناتتى شارا قالالىق اكىمشىلىكتىڭ الدىنداعى الاڭدا ءوتتى. بۇل –تاريحي ءسات ەسىمنەن ەشقاشان شىقپايدى. ءدال سول كۇنگى نومىرگە وبلىستىق «ارقا اجارى» گازەتىنىڭ باس رەداكتورى, مارقۇم جومارت ابدىحالىقوۆ اعامىز مەنىڭ «اقمولا –استانا» اتتى جاڭا ءانىمدى نوتاسىمەن جاريالاپ, ونى ءوز قولىمەن سىيلاعان ەدى» دەدى ۇلاعاتتى ۇستاز.
كەش بارىسىندا سۋرەتشى الماس بولاتحانۇلىنىڭ ەلوردانىڭ 20 جىلدىعىنا ارنالعان شاعىن كورمەسى ۇيىمداستىرىلدى. قىلقالام شەبەرى ءوز ەڭبەكتەرىندە شاھاردىڭ كوركەم كەلبەتىن شىنايى بەدەرلەي بىلگەن.
سونداي-اق, جەتكىنشەكتەر قوناقتارعا سۇراقتار قويىپ, ءوز ونەرلەرىن كورسەتىپ, كەشتى دۋمانعا بولەدى.
