ەندى ءبىزدىڭ بۇلدىرشىندەردىڭ ءتول قاھارماندارى بار. ويتكەنى «Balapan» تەلەارناسى ولارعا ارناپ «دالا ويىندارى», «ايدار» جانە «ەرتەمىر» اتتى قازاقشا مۋلتفيلمدەردى جارىققا شىعاردى.
انيماتسيالىق جوبالاردىڭ يدەيالارى وتە تارتىمدى. ماسەلەن, «دالا ويىندارىندا» كومپيۋتەرلەر مەن گادجەتتەرگە بايلانعان بالدىرعانداردى دالاعا الىپ شىعىپ شىنىقتىرادى, شىمىر بولۋعا ۇيرەتەدى. وسىلايشا جەتكىنشەكتەر ادام مەن تابيعاتتىڭ بايلانىسى قانشالىقتى تىعىز ەكەنىن تۇيسىنەدى. ال ەكىنشى مۋلتحيكايا «ەرتەمىر» فانتاستيكاعا جانى قۇمار بالالاردىڭ كوڭىلىنەن شىعاتىنىنا ەش داۋ جوق. بۇل ءمۋلتفيلمنىڭ باستى قاھارمانى ەكىنشى سىنىپ وقۋشىسى بولعانمەن, ول قاتەر تونگەندە بەس قارۋى ساي باتىرعا اينالىپ شىعا كەلەدى. ءوزى قايسار, ءوزى مىقتى بالاقاي سولايشا ەرلىكتىڭ نەبىر عاجاپ ۇلگىلەرىن كورسەتەدى. «ايدار» دا – قيالشىل بالالارعا كەرەك كەيىپكەر. ول ءبىر الەمنەن ەكىنشى الەمگە ءوتىپ, ميفتىك ماقۇلىقتارمەن ايقاسادى, جاۋىزدىقپەن كۇرەسەدى, جاقسىلىقتىڭ جەڭىپ شىعۋى ءۇشىن بارىن سالادى. قىسقاسى, انيماتسيالىق ءفيلمنىڭ قاي-قايسىسى بولماسىن, كىشكەنتاي كورەرمەندەرگە ىزگى قاسيەتتەردى ناسيحاتتايدى.
مۋلتفيلمدەردىڭ تۇساۋكەسەر راسىمىنە جينالعان ەلوردالىق بالاقايلار جاڭا دۇنيەلەردى جىلى قابىلدادى. قازاقستاننىڭ تۇكپىر-تۇكپىرىندەگى بۇلدىرشىندەر ولاردى 10 جەلتوقساننان باستاپ «بالاپان» تەلەارناسىنان تاماشالاي الادى.
