قىركۇيەك ايىنان باستاپ استانا بيلىگى تۇتاستاي تەك تاكسيمەن عانا جۇرەدى. بۇل تۋرالى قالالىق ءماسليحاتتىڭ كەزەكتەن تىس 37-سەسسياسىندا قالالىق ورتانى رەگەنەراتسيالاۋ باسقارماسىنىڭ باسشىسى عالي يسكاليەۆ مالىمدەدى.
وسى وزگەرىستىڭ ارقاسىندا بيۋدجەت قارجىسىن 20 پايىزعا ۇنەمدەۋگە بولادى. بولاشاقتا بۇل كورسەتكىش 40 پايىزعا دەيىن جەتۋى مۇمكىن. ۇكىمەتتىڭ شەشىمىنە سايكەس, «اۆتوشارۋاشىلىق-استانا» جشس بيىل جەكەشەلەندىرىلىپ, ونىڭ تەحنيكالىق بازاسى اكىمدىك قاراماعىندا قالماق.
– الداعى ۋاقىتتا قالالىق اكىمدىك ماماندارىن تاسىمالداۋعا جەكە كومپانيالار قىزمەت كورسەتەتىندىكتەن, وسى كۇندەرى مەملەكەتتىك-جەكەمەنشىك ارىپتەستىك نەگىزىندە تاكسوپاركتەرمەن كەلىسىمشارتقا وتىرامىز. قالاداعى 12 تاكسوپاركتىڭ تورتەۋى بىزبەن جۇمىس ءىستەۋگە كەلىستى. ولاردىڭ سانى الداعى ۋاقىتتا دا ارتۋى مۇمكىن. كولىكتەر «Astana taxi» برەندى بويىنشا بەزەندىرىلەتىن بولادى. بۇل جوبا 5 جىلعا جوسپارلانىپ وتىر, – دەيدى عالي يسكاليەۆ.
باسقارما باسشىسىنىڭ ايتۋىنشا, ءار باسقارمانىڭ اي سايىنعى شىعىنى ءارتۇرلى. مىسالى, كەيبىرىنىڭ شىعىنى 800 مىڭ تەڭگە بولسا, ەندى بىرىنىكى 1,5 ملن تەڭگە كورىنەدى.
– ءبىز تالداۋ جاساعان كەزدە بارلىق باسقارما ماماندارىنىڭ كۇندەلىكتى ءجۇرۋ سانىن ەسەپتەپ كوردىك. كەيبىر باسقارمالار كولىكتى كۇنىنە 4-5 رەت قانا پايدالانسا, تاعى ءبىرى 20-30 رەت جۇرەدى ەكەن. ورتا ەسەپپەن ءبىر باسقارماداعى ەكى كولىككە 15 جۇرۋدەن ءبولىندى. قازىرگى ۋاقىتتا بۇعان بيۋدجەتتەن ايىنا شامامەن 1 ملن تەڭگە جۇمسالىپ جاتىر. ال تاكسيدىڭ ءبىر ءجۇرۋىن 1000 تەڭگە دەپ ەسەپتەگەندە, كۇنىنە 30 مىڭ تەڭگە بولادى. ونى 24 جۇمىس كۇنىنە كوبەيتكەندە 720 مىڭ تەڭگە شىعادى. جەكە كومپانيالارمەن ەسەپ ايىرىسۋ اي سايىن جۇرگىزىلىپ وتىرادى, – دەدى ول.
اكىمدىك بالانسىنداعى بارلىق كولىكتەر جەرگىلىكتى بيلىك قاراماعىنداعى قالالىق ىشكى ىستەر دەپارتامەنتى مەن مەكتەپ, اۋرۋحانا سياقتى مەكەمەلەرگە تاپسىرىلادى.
جاڭا جۇيەنىڭ ارتىقشىلىعى تاكسي قىزمەتىن تۇتىنعان شەنەۋنىكتەر كولىك كەپتەلىسىندە تۇرىپ ۋاقىت جوعالتپايدى. سەبەبى «Astana taxi»-گە قوعامدىق كولىكتەرگە ارنالعان «Bus lane» جولاعىمەن جۇرۋگە رۇقسات بەرىلگەن. اتالمىش جوبا تۋرالى استانا قالاسى اكىمىنىڭ ورىنباسارى اسقار امرين دە ءوز ويىن ورتاعا سالدى.
– قولعا الىنىپ وتىرعان وسى جوبا ۇنەمدىلىك جاعىنان وتە ءتيىمدى. وسىنىڭ ارقاسىندا, بىرىنشىدەن, ميلليارد تەڭگەدەن اسا قارجى ۇنەمدەلەدى. ويتكەنى ءار كولىكتىڭ كۇندەلىكتى جانار-جاعارمايى مەن اۆتوبولشەك سايماندارى, جىل سايىنعى سالىعى مەن تەحنيكالىق تەكسەرىسى تاعى بار. ەكىنشىدەن, بۇل – مەملەكەتتىڭ ساياساتى. ياعني الداعى ۋاقىتتا اتقارۋشى بيلىككە سەرۆيستىك قىزمەت كورسەتەتىن بارلىق ۇيىمدار جەكەشەلەندىرىلەدى. ءبىز قازىر اۆتوشارۋاشىلىق مەكەمەسى تۋرالى ايتىپ وتىرمىز. دەگەنمەن قازىرگى ۋاقىتتا اكىمدىك قاراماعىنداعى 100 كولىكتىڭ جۇرگىزۋشىسىن جۇمىسسىز قالدىرمايمىز. ولار ەندى مەكتەپ, اۋرۋحانا سياقتى مەكەمەلەردە جۇمىسىن جالعاستىرادى. الايدا كەلەر جىلدان باستاپ اكىمدىككە قاراستى مەكەمەلەر دە بىرتىندەپ سەرۆيستىك كەلىسىمشارت جۇيەسىنە كوشەدى, – دەدى اسقار امرين.
بۇل جوبا ءماسليحات سەسسياسىنان ءبىر كۇن بۇرىن وتكەن قوعامدىق تىڭدالىمدا دا دەپۋتاتتاردىڭ تالقىلاۋىنا ۇسىنىلعان بولاتىن. شەنەۋنىكتەردى تاسىمالداۋعا قىزمەت كورسەتۋ جوباسىمەن ەگجەي-تەگجەيلى تانىسىپ شىققان سوڭ حالىق قالاۋلىلارى قالا بيلىگىنىڭ جاڭا ءجۇيەگە كوشۋى جونىندەگى باستاماعا كوپشىلىك داۋىسپەن قولداۋ ءبىلدىردى.
