ەلوردادا – الەم مەرگەندەرى
ەلوردا تورىندەگى «قازانات» يپپودرومىندا الەم ساداقشىلارىنىڭ قاتىسۋىمەن مەرگەندىك باسەكەسى باستالىپ كەتتى. بۇل باسەكە بۇگىن شىمىلدىق تۇرەتىن ءىى «التىن جەبە» حالىقارالىق تۋرنيرىنە جاتتىعۋ رەتىندە ۇيىمداستىرىلدى.
قىرىققا جۋىق مەرگەن جاياۋ تۇرىپ نىسانا اتۋدان باق سىنادى. ەلۋ مەترلىك قاشىقتىقتاعى نىسانا اتۋدا الماتىلىق باقتيار تۇرىسبەكوۆ توپ جاردى. جيىنى 69 ۇپاي جيناعان مەرگەن باس جۇلدەگە تىگىلگەن 300 دوللاردى ۇتىپ الدى. ەكىنشى جۇلدە – 250 دوللارلىق سىيلىق 59 ۇپاي ەنشىلەگەن جامبى اتۋدىڭ سۇرمەرگەنى, تارازدىق ابزال تۋلىبەكوۆكە بۇيىردى. ءۇشىنشى جۇلدەلى ورىندى 150 دوللاردى رەسەي ساداقشىسى سەرگەي ودينوكوۆ ولجالادى.
بۇگىن تاڭەرتەڭ 10.00-دەن باستاپ «قازانات» اتشابارىندا «التىن جەبە» حالىقارالىق ءتۋرنيرى باستالادى. سايىستار «ازيالىق ستيل», «تۇرىك ءستيلى» جانە «قازاق ءستيلى» بويىنشا وتەدى. ولاي بولسا, جامبى اتۋدىڭ قىزىعىن تاماشالاۋعا اسىعىڭىزدار, قادىرلى جانكۇيەر.