تاعى دا داۋ شىقتى. بۇل تەك ءتىلدىڭ اينالاسىندا تۋعان داۋ ەمەس. ەلوردا قوعامدىق دەنساۋلىق ساقتاۋ جۇيەسىنىڭ قىزمەت ساپاسىنداعى كىناراتتى كورسەتىپ تۇر.
ءبىر قاراعاندا استانا قالالىق №2 اۋرۋحاناسىنىڭ «وتولارينگولوگيا» بولىمشەسىنىڭ 9-پالاتاسىندا ەم العان مۇقاعالي بالقىباەۆتىڭ الەۋمەتتىك جەلىدە جارىق كورگەن جازباسىنا قاراپ «وعىزدىڭ» سيندرومى قايتالاندى دەۋگە بولار ما ەدى؟ الايدا ول ويىمىز ۇشقارى. ويتكەنى اۋىرىپ جاتقان ادام جەل ءسوز قۋماسا كەرەك-ءتى. قىزمەت ساپاسى جوعارى بولسا, قىزمەتكەرلەرى كىشىپەيىل, ءوز مىندەتتەرىن ادال اتقارسا, وسىنشاما داۋ تۋار ما ەدى؟
وسى جازباعا قاراپ وتىرىپ, مەنى ويلاندىرعان ەكى نارسە بولدى. ول – تازالىق ساقتاۋشىنىڭ ناۋقاسقا داۋىسىن كوتەرىپ ءسويلەگەنى. اۋرۋحانا ناۋقاسپەن داۋلاسىپ, اركىم ءوز قۇقىعىن قۋدالايتىنداي ورىن با؟ بۇل جەرگە ادامدار قوعامنىڭ كەسەلىنەن ەمەس, ءوزىنىڭ قاراقان قۋ باسىنىڭ كەسەلىنەن ارىلۋعا كەلەدى ەمەس پە؟! ونىڭ ەكى اراسىن تۇسىنبەيتىندەر نەگە قالامىزدىڭ بەتكەۇستار, «التىن شيپاگەر» اتاعىن العان №2 قالالىق اۋرۋحانانى ساياساتتاندىرىپ, ءتىلدى داۋدىڭ وزەگىنە اينالدىرعان؟ ەكىنشى ماسەلە – اۋرۋحانانىڭ قىزمەتكەرى, مۇقاعاليدىڭ ەمدەۋشى دارىگەرى اسحات نيكولايۇلىنىڭ: «قازاقشا سويلە» دەپ قاقساي بەرسەڭ, اۋرۋحانادان شىعاسىڭ. شىعارۋ تۋرالى انىقتامانى دا ورىس تىلىندە جازىپ بەرەم» دەگەن ءسوزى بولدى.
مۇقاعالي باۋىرىمىز اسحات نيكولايۇلىنىڭ نەمەسە تازالىق ساقتاۋشىنىڭ اكەسىنىڭ ۇيىندە جاتقان جوق. سول اۋرۋحانانىڭ ۇجىمى اۋرۋلارعا قازاقستان رەسپۋبليكاسىنىڭ ازاماتى مۇقاعاليعا بولگەن مەملەكەتتىڭ تەگىن مەديتسينالىق كومەكتىڭ كەپىلدىك بەرىلگەن كولەمىنىڭ شەگىندە بولىنگەن قاراجاتتى الىپ وتىر. ول بيۋدجەت ءسىز بەن ءبىزدىڭ ەسەبىمىزدەن جينالىپ جاتقانىن تاعى دا ەسكە سالعىم كەلەدى. دەمەك, لايىقتى قىزمەت ساپاسىن تالاپ ەتۋگە مۇقاعاليدىڭ دا قۇقىسى بار. ولاي بولماعاندا, مەملەكەتىمىز وسىنشاما قاراجاتتى دۇمبىلەز دارىگەردەن ءسوز ەستۋ ءۇشىن وسى №2 اۋرۋحاناعا اۋدارىپ وتىر ما؟!
«قازاق ءۇنى» پورتالىنىڭ جازۋىنشا, دارىگەرلەر جاۋاپسىزدىعى, سالعىرتتىعى ءۇشىن استانا قالاسى قوعامدىق دەنساۋلىق ساقتاۋ باسقارماسىنىڭ باسشىسى كامالجان ءنادىروۆ ەمدەلۋشىدەن كەشىرىم سۇراپتى. مۇنداي جاعدايدىڭ قايتالانباۋىن قاداعالايمىز دەپتى. ءيا, قاداعالاۋ كەرەك-اق. «اۋرۋدى دارىمەن دە, سوزىڭمەن دە ەمدە» دەگەن جوق پا ەدى ءابۋ ءالي يبن سينا دانىشپان. ولار ءبىر-ءبىرىن ۇقپاسا, ءىس قايدان العا باسسىن…
