«استانا – دۋاتلون 2016»: جۇلدىزدارمەن بىرگە جۇگىر!
استانا كۇنى قارساڭىندا وتەتىن ءداستۇرلى «استانا –دۋاتلون 2016» بۇقارالىق-سپورت شاراسى 26 ماۋسىم كۇنى «استانا-بايتەرەك» مونۋمەنتى الاڭىندا باستاۋ الماقشى. ەل تاۋەلسىزدىگىنىڭ 25 جىلدىعىنا جانە استانا كۇنىنە ارنالعان مەرەكەلىك جارىسقا قاتىسۋشىلار 25 شاقىرىم جول جۇرەدى. ياعني, ۆەلوسيپەدپەن 15 شاقىرىم قاشىقتىقتى باعىندىرسا, جارتىلاي مارافوندا 10 شاقىرىمعا دەيىن جۇگىرەتىن بولادى.
جارىستىڭ ۇيىمداستىرۋشىسى – استانا قالاسىنىڭ اكىمدىگى.
– جارىس جەڭىمپازدارى Life Fitness Astana ەليتالىق فيتنەس كلۋبىنىڭ ارناۋلى جۇلدەلەرىمەن ماراپاتتالادى, – دەيدى جارىستى ۇيىمداستىرۋ كوميتەتىنىڭ مۇشەسى شىڭعىسحان نۇركەنوۆ.
جالپى, بۇقارالىق شارا بيىل ەكىنشى مارتە وتكىزىلمەك. بىلتىر تامىز ايىندا العاش رەت ۇيىمداستىرىلعان جارىس جوعارى دەڭگەيدە ءوتىپ, استانالىقتار مەن قالا قوناقتارىنىڭ وسى سپورتقا دەگەن قىزىعۋشىلىعىن ارتتىرعان.
– بىلتىرعى تاجىريبەمىزدى ەسكەرە وتىرىپ, بيىل 500-گە جۋىق كىسى قاتىسادى دەپ جوسپارلادىق. دۋاتلون جارىسىنا 16 جاستان اسقان بارلىق ادام قاتىسا الادى. بىراق, جاسى 18-گە تولماعاندار اتا-اناسىنىڭ جازباشا تۇردەگى رۇقساتىمەن كەلۋى كەرەك. ءوزىمەن بىرگە جەكە ۆەلوسيپەدى, قورعانىش باس كيىمى جانە جەكە كۋالىگى مىندەتتى تۇردە بولعانى ءجون, – دەيدى شىڭعىسحان نۇركەنوۆ.
ايتا كەتۋ كەرەك, «استانا-دۋاتلون 2016» شاراسى 3 ەتاپ بويىنشا وتكىزىلەدى. الدىمەن قاتىسۋشىلار 5 شاقىرىم قاشىقتىقتا جۇگىرەدى. ودان كەيىن ۆەلوسيپەدپەن 15 شاقىرىم ءجۇرىپ, قايتادان 5 شاقىرىم جولدى جاياۋ باعىندىرادى. جارىسقا قاتىسۋشىلاردى تىركەۋ ساعات 07.00-دەن 09.00-گە دەيىن جۇرگىزىلەدى.
تىركەلگەن ءاربىر قاتىسۋشىعا تىركەۋ ءنومىرى, ۆەلوسيپەدكە ارنالعان جاپسىرما جانە ءار سايىسكەردىڭ ءجۇرىپ وتكەن ۋاقىتىن كورسەتەتىن دەربەس چيپ سالىنعان پاكەت بەرىلەدى.
مەرەكەلىك جارىسقا قاتىسۋشىلار «استانا-بايتەرەك» مونۋمەنتى الاڭىنان شىعىپ, دىنمۇحامەد قوناەۆ كوشەسى بويىمەن جۇگىرىپ باستايدى. جۇگىرۋ جانە ۆەلوجارىستىڭ ءارى قارايعى تولىق باعىتى «استانا اقشامى» گازەتىنىڭ جاقىنداعى ساندارىندا جاريالانادى. جارىستىڭ سورەسى مەن مارەسى بەلگىلەنگەن ترانزيتتىك زونا «استانا-بايتەرەك» مونۋمەنتى الاڭىندا ورنالاسادى.
وسىلايشا, جالپى قاشىقتىق 25 شاقىرىمدى قۇرايدى. مەرەكەلىك شارا كەزىندە قاتىسۋشىلاردىڭ قاۋىپسىزدىگى ساقتالىپ, جولدار ۋاقىتشا جابىلاتىن بولادى. سونداي-اق, قاتىسۋشىلاردىڭ دەنساۋلىعىن بىرنەشە جەدەل-جاردەم كارەتاسى باقىلاۋلارىنا الماق.
«ۆەلوسيپەد دەمەكشى, جارىسقا كەز كەلگەنى جاراي بەرەدى. ەڭ سوڭعى قاتىسۋشى مارە سىزىعىن كەسىپ وتكەننەن كەيىن عانا, ارناۋلى جابدىقتىڭ جانە ءاربىر قاتىسۋشىعا بەرىلگەن دەربەس ءچيپتىڭ كومەگىمەن جارىس قورىتىندىسىن انىقتايتىن بولامىز. «استانا – دۋاتلون 2016» مەرەكەلىك شاراسىنىڭ ءابسوليۋتتى چەمپيونىن انىقتاۋدا جاس كاتەگورياسى ماڭىزدى ەمەس. سونىمەن قاتار, جاسىنا بايلانىستى ايەلدەر مەن ەرلەر اراسىنداعى چەمپيوندار جەكە-جەكە انىقتالادى. ياعني, 16 جاستان 30-عا دەيىن, 31 جاستان 40-قا دەيىن, 41 جاستان 50-گە دەيىن جانە 51 جاستان اسقاندار. يگىلىكتى شاراعا تانىمال سپورتشىلار, قوعام قايراتكەرلەرى, ەسترادا جۇلدىزدارى, پەكين جانە لوندون وليمپياداسىنىڭ قاتىسۋشىلارى دا شىعادى دەپ كۇتىلۋدە» دەيدى شىڭعىسحان نۇركەنوۆ.
«استانا – دۋاتلون 2016» جارىسىنىڭ جەڭىمپازدارى مەن قاتىسۋشىلارى سالتاناتتى تۇردە ماراپاتتالاتىن بولادى. سونىمەن قاتار, جارىسقا قاتىسۋشىلار مەن جانكۇيەرلەر ءۇشىن تاعى ءبىر تاماشا تارتۋ بولماق. قازاقستاننىڭ ەسترادا جۇلدىزدارىنىڭ قاتىسۋىمەن كونتسەرت بولادى.
«استانا –دۋاتلون 2016» جارىسى اۋا-رايىن تالعامايدى. ولاي بولسا, جارىس جولىنا شىعىڭىز!
گۇلميرا ايماعانبەت