فۋتبولدان قارت قۇرلىقتىڭ باستى دوداسى – چەمپيوندار ليگاسىندا ونەر كورسەتىپ جاتقان «استانا» كلۋبى ەكىنشى ىرىكتەۋ كەزەڭىن ءساتتى اياقتادى. دانيا چەمپيونى «ميدتيۋللاندپەن» وتكەن قارىمتا ماتچتا ەسەپ اشىلماي, ەلوردادا تىركەلگەن 2:1 ەسەبىنىڭ ارقاسىندا جەرلەستەرىمىز كەلەسى كەزەڭگە جولداما الدى.
العاشقى ويىندا «استانا» لاسلو كلياينحايسلەردىڭ ەكى گولىنىڭ ارقاسىندا جەڭىسكە جەتكەن. ال دانيالىقتار ساپىنان جالعىز دوپ گۋستاۆ ۆيكحەيمنىڭ ەنشىسىنە جازىلعان ەدى. ەندى كەلەسى كەزەڭدە «استانانى» حورۆاتيانىڭ «دينامو» كلۋبى كۇتىپ تۇر. العاشقى تەكەتىرەس 7 تامىز كۇنى استانا-ارەنا ستاديونىندا وتەدى.
ال الماتىنىڭ «قايراتى» نيدەرلاندتىڭ «از الكماار» ۇجىمىنان 1:2 ەسەبىمەن جەڭىلگەنىمەن, ەكى ويىننىڭ قورىتىندىسى بويىنشا 3:2 ناتيجەسى تىركەلىپ, ەۋروپا ليگاسىنىڭ ءۇشىنشى ىرىكتەۋ كەزەڭىنە جولداما الدى.
