استانا مارافونىنا 4500 ادام قاتىسۋدا
ايتۋلى «استانا مارافونى – 2016» جارىسى «حانشاتىردىڭ» تۇبىنەن باستالدى. مارافونعا قاتىسۋ ءۇشىن ەلورداعا الەمنىڭ 25 ەلىنەن سپورتشىلار كەلدى.
جارىس جولىن كوپشىلىكپەن بىرگە قر پرەمەر-ءمينيسترى كارىم ءماسىموۆ, پرەزيدەنت اپپاراتىنىڭ باسشىسى ادىلبەك جاقسىبەكوۆ جانە وليمپيادا جەڭىمپازدارى سەرىك ساپيەۆ, الەكساندر ۆينوكۋروۆ, دانيار ەلەۋسىنوۆ, گيۋزەل مانيۋروۆا, ەلدوس سمەتوۆ باستادى.
الەم كوز تىككەن مارافون كەزىندە جەلاياقتار بەيبىتشىلىك ءجانە كەلىسىم سارايى, ءازىرەت سۇلتان مەشىتى, بايتەرەك, نازارباەۆ ۋنيۆەرسيتەتى, «استانا-ارەنا» ستاديونى سەكىلدى قالانىڭ ەڭ كورىكتى جەرلەرىنەن جۇگىرىپ وتەدى. قاتىسۋشىلاردىڭ اراسىندا اقش, فرانتسيا, يتاليا, جاپونيا, اۆستراليا, گەرمانيا, يران, يرلانديا, بەلگيا, رەسەي, برازيليا, ەستونيا, قىتاي, وڭتۇستىك كورەيا, تۇركيا, كانادا, ءباا, نيدەرلاندى سياقتى ەلدەردىڭ سپورتشىلارى بار.
بۇل مارافوننىڭ ەڭ ۇزاق مەجەسى – 42,2 شاقىرىم. ودان كەيىنگى بەلگىلەنگەن قاشىقتىق - 21,1 شاقىرىم. ال ءۇشىنشى قاشىقتىق 10 شاقىرىمدى قامتيدى. وعان قوسا, قاتىسۋشىلار سكانديناۆيالىق جۇرۋدەن جارىسادى.
21,1 كيلومەتردى ەڭسەرگەندەرگە قر سپورت شەبەرى اتاعى بەرىلەدى.
جەلاياقتارعا ءار 5 كيلومەتر سايىن سۋمەن ءجانە بانانمەن جۇرەك جالعاپ الۋى ءۇشىن جاعداي جاسالعان. ال ەڭ الىس جولعا جۇگىرەتىندەرگە يزوتونيكالىق سۋسىن ۇسىنىلادى.