فۋتبولدان قازاقستان چەمپيوناتىنىڭ ءۇشىنشى تۋرى ويىندارى ءوتتى. «استانا» ءوز الاڭىندا قاراعاندىلىق «شاحتەر» كومانداسىن قابىلداپ, كەزەكتى جەڭىسىنە قول جەتكىزدى.
«استانا ارەنا» ستاديونىنا جينالعان جانكۇيەر الدىندا «شاحتەر» چەمپيوندىق مىنەزىن كورسەتكەندەي بولدى. ەكى جاق تا قورعانىسقا اسا ماڭىز بەرىپ باستاعان ويىننىڭ 30-ىنشى مينۋتىن استانالىق فوكسي كەتەۆواما شىعارعان ادەمى پاستى سەربيا جاستار قۇراماسىنىڭ كاپيتانى, جاستار اراسىنداعى ەۋروپا چەمپيونى نەمانيا ماكسيموۆيچ ۇتىمدى پايدالانىپ, الا دوپتى باسپەن ۇرىپ, «شاحتەر» قاقپاسىنا تۋلاتىپ ءتۇسىردى. ال ءبىرىنشى تايمنىڭ سوڭعى مينۋتىندا قوناقتار ەسەپتى تەڭەستىرىپ جىبەردى. وسىلايشا ءوزارا تارتىستى ءوتىپ جاتقان ويىن بارىسىندا دۇركىن-دۇركىن شابۋىلدار ۇيىمداستىرا بىلگەن الاڭ يەلەرى «شاحتەر» قورعانىسىنان ءبارىبىر ءبىر ساڭىلاۋ تاۋىپ كەتتى. تاعى دا سول فوكسيدىڭ تاماشا پاسى ءبىر مەرگەنىمىز كانياس ءمۇلت جىبەرمەدى. ول دا باسپەن سوقتى. قالعان ۋاقىتتا ەسەپ وزگەرمەدى. وسىلايشا «استانا» 2:1 ەسەبىمەن جەڭىسكە جەتتى. ال ەلوردالىق كوماندانىڭ نەگىزگى قارسىلاسى بولىپ العان «قايرات» تا الماتىدا تالدىقورعاندىق «جەتىسۋ» كومانداسىن ۇتتى. كوپتەگەن جانكۇيەرلەر بۇگىننىڭ وزىندە چەمپيوندىق اتاق ءۇشىن بيىل دا استانا مەن الماتى كوماندالارى ءوزارا باسەكەگە تۇسەدى دەپ ايتىپ ءجۇر. مۇمكىن سولاي دا بولار. ەڭ باستىسى, ەكى مەگاپوليستىڭ اراسىندا شىنايى تارتىس بولعاي. سوندا عانا قازاقستاندىق دەربيدى كورەتىن بولامىز.
پرەمەر-ليگانىڭ باسقا ويىندارىندا مىناداي ناتيجەلەر تىركەلدى: «قايرات» – «جەتىسۋ» 2:0, «ورداباسى» – «اتىراۋ» 2:0, «توبىل» – «وقجەتپەس» 0:2, «تاراز» – «اقتوبە» 0:1, «قايسار» – «ەرتىس» 0:0.
«استانا» كەلەسى ويىندا 21 ناۋرىز كۇنى اتىراۋدا وتكىزەدى. ال ءوز الاڭىنداعى كەزەكتى ماتچتا «اقتوبە» كومانداسىن قابىلدايدى. بۇل ويىن 5 ساۋىردە وتەدى. وعان دەيىن, ياعني, 28 ناۋرىز كۇنى «استانا ارەنا» ستاديونىندا ەۋروپا چەمپيوناتىنىڭ توپتىق ىرىكتەۋ ءتۋرنيرى اياسىنداعى قازاقستان – يسلانديا قۇرامالارى اراسىنداعى ماتچتى تاماشالايتىن بولامىز.
عالىم قوجابەكوۆ
