اسقار مامين: شەبەرلىك مۇمكىندىگى بىردەي ەدى, بىراق ساتتىلىك قارسىلاس جاققا بۇرىلىپ كەتتى
اسقار مامين, قازاقستان حوككەي فەدەراتسياسىنىڭ پرەزيدەنتى
قازاقستان جانكۇيەرى ءۇشىن استانالىق «بارىس» حوككەي كومانداسى ۇلتتىق برەندىمىزگە اينالعانداي بولىپ وتىر. وسىدان ون جىلداي بۇرىن حوككەيدەن ايتارلىقتاي ءداستۇرى جوق قالامىزدى بۇگىندە حوككەي قالاسى دەرسىز. «قازاقستان» سپورت سارايى اشىلىپ, ۇلكەن حوككەيدى تاماشالاي باستاعاندا مالاقايىمىزدى اسپانعا اتىپ ءبىر قۋانىپ ەدىك, ەندى ەلوردا تورىندە تاعى ءبىر حوككەيگە ارنالعان سۋپەرستاديون پايدالانۋعا بەرىلمەكشى. وسىنىڭ ءبارى قازاقستان حوككەي فەدەراتسياسىنىڭ جۇيەلى ءارى ماقساتتى جۇرگىزىپ وتىرعان مەنەدجمەنتى ارقاسىندا جۇزەگە اسىرىلىپ وتىرعان يگى ىستەر دەسەك جاراسادى.
قازاقستان كوماندالارى بۇگىندە كحل, ۆحل جانە محل چەمپيوناتتارىندا ءساتتى ونەر كورسەتۋدە. «سارىارقا» كومانداسىنىڭ بىلتىرعى ماۋسىمدا ۆحل چەمپيوناتىنىڭ جەڭىمپازى رەتىندە براتينا كۋبوگىن الۋى, «سنەجنىە بارسى» كومانداسىنىڭ ۆحل چەمپيوناتىنىڭ پلەي-وفف ويىندارىنا ءتۇسۋى ماقتانىپ ايتۋعا تۇرارلىق جەتىستىكتەر دەپ ەسەپتەيمىز. قازاقستان ۇلتتىق قۇراماسى بولسا بيىل ەليتالىق ديۆيزيونعا قايتا قوسىلۋ ءۇشىن باسەكەگە ءتۇسۋ قىزۋ دايىندىق ۇستىندە. ال, ەلىمىزدىڭ ىشكى چەمپيوناتىنىڭ باسەكەسى دە جىل سايىن تارتىستى ءارى قىزىقتى وتە باستادى.
ال ەلىمىزدىڭ ەڭ باستى كلۋبتىق كومانداسى «بارىس» ءۇشىن كونتينەنتالدىق حوككەي ليگاسىنىڭ (كحل) 2014-2015 جىلعى ماۋسىمى اياقتالدى. استانالىق كوماندا چەمپيونات بارىسىندا ۇزدىكتەر قاتارىنان كورىنىپ پلەي-وفف ويىندارىنا ءوتتى. وكىنىشكە قاراي, سىرالعى قارسىلاسىمىز «اۆانگارد» تاعى دا جولىمىزدى كەستى. وسىلايشا گاگارين كۋبوگى ءۇشىن باسەكەدەن شىعىپ قالدىق. جاقىندا قازاقستان حوككەي فەدەراتسياسىنىڭ پرەزيدەنتى اسقار مامين BESTNEWS.KZ اقپارات اگەنتتىگىنە «بارىس» كومانداسىنىڭ بيىلعى چەمپيوناتتاعى كورسەتكىشتەرى تۋرالى اڭگىمەلەپ بەردى.
«چەمپيونات ادەتتەگىدەي وڭاي بولعان جوق. ماۋسىمنىڭ باسىندا جاقسى ويىن ورنەگى قالىپتاسقان ەدى, بىراق ورتاسىندا ەپتەپ توقىراۋ ءبىلىندى. ال جالپى چەمپيوناتتىڭ سوڭىنا قاراي كوماندالىق ويىن تۇزەلىپ, «بارىس» شىعىس ديۆيزونى بويىنشا 5-ءىنشى ورىننان كورىندى. پلەي-وفف باسەكەسىندە ءبىر-بىرىنە ساي كوماندالاردىڭ ويىنىن كوردىك. «بارىستىڭ» دا, «اۆانگاردتىڭ» دا جەڭۋگە مۇمكىندىگى بىردەي بولدى. ارينە, «اۆانگارد» جەڭىستى ءداستۇرى بار كوماندا, بۇرىن رەسەي چەمپيونى بولعان, كحل چەمپيوناتىندا دا وزىندىك امبيتسياسى بار كوماندا. سوڭعى ماتچتا (پلەي-وففتىڭ 7-ءىنشى ويىنى) ساتتىلىك «اۆانگارد» جاعىنا اۋىسىپ كەتتى. ال جالپى العاندا «بارىستىڭ» بيىلعى چەمپيوناتتاعى كورسەتكىشىن قاناعاتتانارلىق دەپ باعالايمىن. باس جاتتىقتىرۋشى جايلى ايتار بولسام, كومانداعا بەرىلگەن باعالاۋ اندرەي نازاروۆقا بەرىلگەن باعا دەپ قابىلداۋعا بولادى».
سونىمەن, قالىڭ جانكۇيەردىڭ سۇيىكتى كومانداسىنا اينالعان «بارىس» بيىلعى ماۋسىمداعى ويىندارىن اياقتادى. جەتى اي بويى تارتىستى دا, قىزىقتى دا ويىندارىمەن كوپشىلىكتىڭ بىردە كوڭىلىن كوتەرىپ, بىردە جۇيكەسىن جۇقارتقان كوماندامىزدى كۇزگە دەيىن, ياعني, جاڭا ماۋسىم اشىلعانشا اسىعا كۇتەتىن بولامىز.
