ماسكەۋدەن اقجولتاي حابار جەتتى. استانا تمد-داعى ىسكەرلىك جانە ۋاقيعالىق ءتۋريزمنىڭ ەڭ ۇزدىك قالاسى اتاندى. بۇل تۋرالى جىل سايىن تاپسىرىلاتىن «Business Traveller Russia&CIS Awards 2018» سىيلىعىنىڭ سالتاناتتى راسىمىندە ايتىلدى.
«استانا كونۆەنشن بيۋرو» جشس-كە سىلتەمە جاساپ ەلوردالىق اكىمدىك سايتى حابارلاعانداي, سالتاناتتى كەشكە حالىقارالىق اۋە كومپانيالارى, قوناقۇي بيزنەسى, ونەركاسىپتىك قۇرىلىمدار, بانكتەر, كورپوراتسيالار وكىلدەرى, ءىرى-ءىرى حالىقارالىق كومپانيالاردىڭ توپ-مەنەدجمەنتى مەن جەتەكشىلەرى قاتىسقان.
داۋىس بەرۋدىڭ ناتيجەسىندە استانا ەكى بىردەي اتالىم بويىنشا جەڭىمپاز اتاندى. ءبىرى – «جىلدىڭ ەڭ ۇزدىك بيزنەس-دەستيناتسياسى», ەكىنشىسى – «تمد-نىڭ ەڭ ۇزدىك ىسكەرلىك جانە ۋاقيعالىق تۋريزم قالاسى». «Business Traveller Awards» سىيلىعى جىل سايىن ىسكەرلىك تۋريزم سالاسىنداعى ايتۋلى جەتىستىكتەر مەن يننوۆاتسيالار ءۇشىن بەرىلەدى. اتاپ ايتارلىعى, بۇل بەدەلدى جۇلدەنىڭ ءبىر ايىرماشىلىعى – وبەكتيۆتىلىگىندە. ويتكەنى جەڭىمپازداردى قازىلار القاسى مەن ساراپشىلار كوميسسياسى ەمەس, داۋىس بەرۋ ارقىلى باسىلىم وقىرماندارى انىقتايدى.
