كوپەتنوستى قوعامنىڭ ماسەلەلەرى تالداندى
ەلورداداعى نازارباەۆ ورتالىعىندا «كوپەتنوستى قوعام جانە زاماناۋي مەملەكەت: دامۋ ستراتەگيالارى» اتتى حالىقارالىق فورۋم ءوتتى.
ءىس-شارا بارىسىندا «كوپەتنوستى قوعامنىڭ ۇلتتىق دامۋ مودەلى: قازاقستانداعى وزبەكستان جىلى», «استاناعا 20 جىل: ەۋرازيا جۇرەگىندە», «تابىستى الەۋمەتتىك دامۋ – كوپەتنوستى قوعامدى شوعىرلاندىرۋ نەگىزى» تاقىرىپتارىندا پانەلدىك سەسسيالار ۇيىمداستىرىلدى.
سونداي-اق عالىمدار مەن ساراپشىلار باس قوسقان فورۋمدا قوعامداعى تاتۋلىق پەن جالپىۇلتتىق بىرلىككە ارنالعان رەسپۋبليكالىق عىلىمي جوبالاردىڭ جەڭىمپازدارى باعالى سىيلىقتارمەن ماراپاتتالدى. جاس عالىمداردى قولداۋعا باعىتتالعان بايقاۋعا ەلدىڭ تۇكپىر-تۇكپىرىنەن باس-اياعى 21 جوبا تۇسكەن. سولاردىڭ ىشىنەن ءادىل-قازىلار فينالعا تەك 10 جوبانى عانا ىرىكتەپ, تاڭداپ الدى.
«بولاشاق» ۋنيۆەرسيتەتىنىڭ وقۋ ءىسى جانە حالىقارالىق بايلانىستار جونىندەگى پرورەكتورى, ساياساتتانۋ عىلىمدارىنىڭ كانديداتى مۇرات ناسيموۆ بايقاۋدىڭ باس جۇلدەسىنە يە بولدى. ال ءبىرىنشى ورىن م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ وقىتۋشىسى رىستى كەرىمباەۆاعا بۇيىردى. ەكىنشى ورىندى «جاستار اراسىندا ەتنوسارالىق ىنتىماقتاستىقتى نىعايتۋ» اتتى تاقىرىبى جوباسىنىڭ اۆتورلارى اننا سۆينارچكۋك جانە جايلاگۇل ساعىندىققىزى ەنشىلەسە, ءۇشىنشى ورىندى باتىس قازاقستان وبلىسى يننوۆاتسيالىق-تەحنولوگيالىق ۋنيۆەرسيتەتى تاريح عىلىمدارىنىڭ ماگيسترى قارلىعاش قايرالى الدى. جۇزدەن جۇيرىك اتانعان بارلىق جەڭىمپازدار ارنايى ديپلومدارمەن جانە نوۋتبۋك, سمارتفون سياقتى زاتتاي سىيلىقتارمەن ماراپاتتالدى.