وتكەن اپتانىڭ سوڭى ەلىمىزدە فۋتبولدان قازاقستان پرەمەر-ليگاسىنىڭ ءبىرىنشى تۋرى باستالدى. «استانا» كومانداسىنىڭ العاشقى قوناعى «اقتوبە» بولدى.
«استانا ارەنادا» وتكەن بۇل ويىندى تاماشالاۋعا 10 مىڭ جانكۇيەر جينالدى. كوپشىلىك الدىمەن كۇتپەگەن جەردەن اقتوبەلىكتەردىڭ گولىنا كۋا بولدى. 3-مينۋتتا الاڭ يەلەرىنىڭ قاتەلىگىن ابات ايىمبەتوۆ گولعا اينالدىردى. دەگەنمەن «استانا» كوپ ۇزاماي تارازى باسىن تەڭەستىردى. 20-مينۋتتا ايىپ دوبىن ورىنداعان مارين توماسوۆ سول اياعىمەن قاقپانىڭ سول جاق بۇرىشىن ءدال كوزدەدى. وسى توماسوۆتىڭ 33-مينۋتتا يۋري لوگۆينەنكونىڭ باسىنا قويىپ بەرگەن دوبى قاقپادان تابىلدى. ال 39-مينۋتتا تاعى سول توماسوۆ ءوزىنىڭ ۇيرەنشىكتى قاپتالىنان دوپپەن جۇگىرىپ كەلىپ, ەكىنشى گولىن سوعىپ كەتتى.
ەكىنشى تايم بىرىنشىدەي ناتيجەلى بولا قويعان جوق. بىراق ەلوردالىقتار ويىن نۇكتەسىن سوڭعى 94-مينۋتتا يۋري پەرتسۋحتىڭ گولىمەن قويدى.
بۇل جەڭىسپەن «استانا» «اقتوبەمەن» بولعان ويىنداردىڭ جەڭىلىسسىز سەرياسىن 17 ماتچقا جالعادى. ونىڭ 12-ءسى جەڭىسپەن اياقتالسا, بەسەۋىندە تەڭ ناتيجە تىركەلگەن.
ەل بىرىنشىلىگىنىڭ قالعان ماتچتارىنا كەلسەك, الماتىنىڭ «قايراتى» «تارازدى1 2:0, قوستانايدىڭ «توبىلى» پاۆلوداردىڭ «ەرتىسىن» 3:0, شىمكەنتتىڭ «ورداباسى» كومانداسى قاراعاندىنىڭ «شاحتەرىن» 3:0 ەسەبىمەن تىزە بۇكتىردى. سونداي-اق تالدىقورعاننىڭ «جەتىسۋى» كوكشەتاۋدىڭ «وقجەتپەسىن» 5:1 ەسەبىمەن باعىندىرسا, «اتىراۋ» سىرت الاڭدا قىزىلوردانىڭ «قايسارىن» 1:0 ەتىپ جەڭدى.
