استانادا اتا-انا قامقورلىعىنسىز قالعان سابيلەردىڭ تۇساۋى كەسىلدى (فوتو)
ۇلىستىڭ ۇلى كۇنىنىڭ قارساڭىندا قر ۇلتتىق مۋزەيىندە يگى شارا ءوتتى. رەسپۋبليكالىق «جاقسىلىق جاسا» جوباسىنىڭ اياسىندا اتا-انا قامقورلىعىنسىز قالعان بالالاردىڭ تۇساۋىن كەسۋ ءراسىمى ۇيىمداستىرىلىپ, جينالعان جۇرتشىلىق قاز-قاز باسقان سابيلەردىڭ قادامدارىنا ساتتىلىك تىلەدى. باس قالامىزداعى مامانداندىرىلعان بالالار ءۇيىنىڭ ادەلينا, ەلحان, ياسمين, ارحات, ءدانيا ەسىمدى تاربيەلەنۋشىلەرىنىڭ تۇساۋىن كەسۋگە ونەر, ادەبيەت, جۋرناليستيكا سالالارىندا اتتارى تانىلىپ قالعان ادامدار شاقىرىلدى.
قازاق اراسىندا ەجەلدەن جالعاسىپ كەلە جاتقان بۇل ءداستۇردىڭ ءوز جورالعىلارى بار. ءارتۇرلى جاقسى ىرىمداردى ۇستانعان حالقىمىز بالانىڭ اياعىنا مالدىڭ توق ىشەگىن, كوك ءشوپتى نەمەسە الا ءجىپتى بايلاپ, تۇساۋىن پىشاقپەن كەسكەن. بۇل ءراسىمدى اتقارۋدى كىم كورىنگەنگە تاپسىرماي, «جولىن بەرسىن» دەگەن نيەتپىن ەلگە سىيلى, قيمىلى شيراق, ءسوزى دە, ءىسى دە جۇرتتى قاراتاتىن ازاماتتارعا جۇكتەگەن.
«تۇساۋكەسەر ءراسىمىنىڭ ۇلتتىق مۋزەي قابىرعاسىندا ۇيىمداستىرىلۋى تەكتەن-تەك ەمەس. وسى جەردە اتا-بابالارىمىزدان قالعان اسىل مۇرالار, قۇندى جادىگەرلەر جيناقتالعان. «ۇزىنىن ۇلىنا, قىزىلىن قىزىنا» دەيتىن حالقىمىز ءار مەيرامىندا ءداستۇر-سالتىن ساقتاپ, ۇرپاعىنا ارناعان. سونى ۇستانىپ, تۇساۋكەسەر ءراسىمىن وتكىزىپ وتىرمىز» دەيدى مۋزەيدىڭ باس قور ساقتاۋشىسى ىرىسكۇل ىسكەندىرقىزى.
العاشقى بولىپ ادەلينا اتتى ءسابيدىڭ تۇساۋىن قازاق ءانىن الەم ساحنالارىندا اسقاقتاتىپ سالىپ جۇرگەن وپەرا ءانشىسى, قازاقستاننىڭ ەڭبەك سىڭىرگەن ءارتىسى مايرا مۇحامەدقىزى كەستى. كوپشىلىك الدىندا تولقىپ سويلەگەن ول مۋزەي جانە مامانداندىرىلعان بالالار ءۇيىنىڭ ۇجىمدارىنا «الەم بەسىك جىرلارى» ديسكىسىن سىيعا تارتتى. «بۇل ديسكىگە الەمنىڭ ءىنجۋ-مارجاندارى ءوزىمنىڭ ورىنداۋىمدا قازاق تىلىندە جازىلعان. كىشكەنتايلار ونى تىڭداپ وسسە, بولاشاقتارى جارقىن بولادى, الەم مۋزىكاسىنا دەگەن قۇشتارلىعى ويانادى دەپ ويلايمىن» دەدى وپەرا ءانشىسى.
وزگە سابيلەردىڭ تۇساۋىن «استانا اقشامى» جشس ديرەكتورىنىڭ ورىنباسارى, بەلگىلى جۋرناليست زەيىن الىپبەك, اقىن قالقامان سارين, «بالاپان» تەلەارناسىنىڭ ديرەكتورى, تانىمال تەلەجۇرگىزۋشى ءلايلا سۇلتانقىزى, ساياساتتانۋشى-جۋرناليست جارقىن تۇسىپبەكۇلى كەستى. بەلگىلى ساتيريك, حالىقارالىق «الاش» سىيلىعىنىڭ يەگەرى كوپەن امىربەك اقساقالدىق باتاسىن بەردى.
امانعالي قالجانوۆ
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
