يگى داستۇرگە اينالعان بۇل اكتسيا بۇگىن سارىارقا اۋداندىق اكىمدىگىندە جالعاستى. «نۇر وتان» پارتياسىنىڭ سارىارقا اۋداندىق فيليالىمەن بىرلەسە وتكىزىلگەن شارادا 220-عا جۋىق بالاعا وقۋ قۇرالدارى مەن مەكتەپكە قاجەتتى زاتتار تابىستالدى.
«بىرنەشە جىلدان بەرى 1 تامىز بەن 30 قىركۇيەك ارالىعىندا ءداستۇرلى تۇردە ءوتىزىلىپ كەلە جاتقان بۇل شارا بيىل ەرەكشە ءوتىپ جاتىر. سەبەبى بيىل – ەل تاۋەلسىزدىگىنىڭ 25 جىلدىعى. بۇگىنگى قايىرىمدىلىق شاراسىنا 220-دان استام بالا قامتىلىپ وتىر. ولاردىڭ بارلىعىنا مەكتەپكە قاجەتتى قۇرال-جابدىقتارمەن قامتاماسىز ەتىپ وتىرمىز. شاراعا, سونداي-اق بەلسەندى بيزنەس وكىلدەرى اتسالىسىپ وتىر. بۇل – ۋاقىتشا ناۋقان ەمەس. كوپبالالى جانە از قامتىلعان وتباسىلاردان شىققان بۇلدىرشىندەردى, سونداي-اق بالالار ءۇيىنىڭ تاربيەلەنۋشىلەرىن قولداۋعا ارنالعان بۇل شارانى داستۇرگە اينالدىرامىز دەپ وتىرمىز», – دەدى سارىارقا اۋدانى اكىمىنىڭ ورىنباسارى تالعات راحمانبەردى.
اۋدان اكىمى ورىنباسارىنىڭ ايتۋىنشا, سارىارقا اۋدانىندا 450-گە جۋىق كومەككە ءزارۋ ادام تىركەلگەن ەكەن. ولاردىڭ بارلىعى دا جاقىن ارالىقتا قاجەتتى زاتتارمەن قامتىلادى.
الماتى اۋدانى دا وقۋشىلار سارايىندا «مەكتەپكە جول» رەسپۋبليكالىق اكتسيا اياسىندا «مەكتەپكە باراسىڭ, بالاقاي!» اتتى شارا وتكىزدى.
سالتاناتتى جيىنعا از قامتىلعان كوپبالالى وتباسىلاردان شىققان 150-دەن استام بالا قاتىستى.
الماتى اۋدانىنىڭ اكىمى ەرماعانبەت بولەكپاەۆ كومەككە مۇقتاج ادامدارعا, مۇگەدەكتەرگە, جاعدايى تومەن وتباسىلارعا مەملەكەت مۇمكىندىگىنشە قولداۋ كورسەتىپ كەلە جاتقانىن اتاپ ءوتتى.
قايىرىمدىلىق اكتسياعا قر پارلامەنت ءماجىلىسى مەن ءماسليحات دەپۋتاتتارى, ەلوردانىڭ كاسىپكەرلەرى اتسالىسىپ, بالالارعا قاجەتتى قۇرال-جابدىقتار تاپسىردى.
بۇركىت نۇراسىل
