بۇگىن تاڭەرتەڭ ساعات 07.00 ەلوردادا 178 اشىق سايلاۋ ۋچاسكەسى ءوز جۇمىسىن باستادى, ولار ساعات 20:00-گە دەيىن جۇمىس ىستەيدى.
بۇگىن بارشا قازاقستان بويىنشا قر پارلامەنتى ءماجىلىسى دەپۋتاتتارىنىڭ جانە بارلىق دەڭگەيلەردەگى ءماسليحات دەپۋتاتتارىنىڭ سايلاۋى وتەدى. استانادا 405233 سايلاۋشى تىركەلگەن. استانا قالاسى اكىمىنىڭ تاپسىرماسىمەن بيىل 26 جاڭا سايلاۋ ۋچاسكەسى قۇرىلدى. سونىمەن قاتار, سايلاۋشىلارعا ىڭعايلى بولۋى ءۇشىن ءاربىر سايلاۋ ۋچاسكەسىندە شاعىن حالىققا قىزمەت كورسەتۋ ورتالىقتارى جۇمىس ىستەيدى.
حقكو ەلوردا تۇرعىندارىن قانداي دا بولماسىن سايلاۋ ۋچاسكەسىندە سايلاۋشىلار تىزىمىنە ەنگىزۋ ءۇشىن مەكەنجاي انىقتامالارىن بەرەتىن بولادى.
«الماتى», «ەسىل», «سارىارقا» اۋداندارى اكىمدىكتەرىنىڭ, اۋىل شارۋاشىلىق, سونداي-اق, كاسىپكەرلىك جانە ونەركاسىپ باسقارمالارىنىڭ كۇشىمەن 91 سايلاۋ ۋچاسكەسىنە ءتيىستى اۋماقتا قالالىق اۋىل شارۋاشىلىق تاۋار وندىرۋشىلەردىڭ جانە كاسىپكەرلەردىڭ قاتىسۋىمەن جارمەڭكەلەر ۇيىمداستىرىلادى, – دەپ حابارلايدى استانا اكىمدىگىنىڭ رەسمي سايتى.
ادەتتەگىدەي, ءبىرىنشى بولىپ كەلگەن سايلاۋشىلار, العاش رەت داۋىس بەرەتىندەر, سونداي-اق, 20 ناۋرىزدا تۋعان كۇنىن اتاپ وتەتىن ازاماتتارعا ەستەلىك سىيلىقتار بەرىلەدى.
بۇگىن بارلىق ساناتتاعى ازاماتتار ءۇشىن بارلىق ساناتتاعى قوعامدىق كولىكپەن جول ءجۇرۋ تەگىن بولادى.
astana-akshamy.kz
