استانا قالالىق جولاۋشىلار تاسىمالى جانە اۆتوموبيل جولدارى باسقارماسى ەلورداداعى قوعامدىق كولىكتىڭ جۇيەلى جۇمىس ىستەۋى ءۇشىن اۆتوبۋستاردا ءجۇرۋ اقىسىن ەرەسەكتەر ءۇشىن – 100 تەڭگەگە, بالالارعا – 40 تەڭگەگە كوتەرۋدى ۇسىنىپ وتىر. بۇل ماسەلە قالالىق اكىمدىكتە وتكەن قوعامدىق تىڭداۋدا تالقىلاندى.
باسقارما باسشىسىنىڭ ورىنباسارى ءابدىحاميت تاماباەۆتىڭ ايتۋىنشا, بۇل قر كولىك جانە كوممۋنيكاتسيا مينيسترلىگى بەكىتكەن جولاۋشىلار مەن جۇك تاسىمالداۋ بويىنشا قىزمەت كورسەتۋ تاريفتەرىن ەسەپتەۋ ادىستەمەسىنە سايكەس بەلگىلەنىپ وتىر. ادىستەمە كەستەسىنە جۇگىنسەك, سىيىمدىلىعى جوعارى اۆتوبۋستاردىڭ قىزمەتى ءۇشىن ءبىر رەتتىك ءجۇرۋ اقىسى – 106,6 تەڭگە, سىيىمدىلىعى شاعىن اۆتوبۋستار قىزمەتى ءۇشىن 112,4 تەڭگە بەلگىلەنگەن. جوعارىدا اتالعان تاريف وسىعان نەگىزدەلىپ وتىر. وسى ورايدا, قالالىق ءماسليحاتتىڭ شەشىمىمەن جەڭىلدىكپەن جول جۇرەتىن ازاماتتاردىڭ جول ءجۇرۋ ءتارتىبى وزگەرىسسىز قالاتىن بولادى.
استانا قالاسىندا قوعامدىق كولىكتەگى ءبىر رەتتىك جولاقى قۇنى 2008 جىلدان بەرى وزگەرمەي, 60-65 تەڭگە بولىپ كەلگەنىن اتاپ وتكەن باسقارما باسشىسى راشيد امانجولوۆ قازىرگى تاڭدا جانار جاعار ماي مەن قوسالقى بولشەكتەردىڭ قىمباتتاۋىنا بايلانىستى بۇل تاريف كولىك سالاسىن دامىتۋعا, ونىڭ جىلجىمالى قۇرامىن جاڭارتىپ, كۇتىپ-باپتاۋعا جۇمسالاتىن شىعىندى وتەمەي وتىرعانىن جەتكىزدى. اتاپ ايتقاندا, 2008 جىلدان بەرى ديزەل وتىنىنىڭ 1 ءليترى 75 تەڭگەدەن 115 تەڭگەگە دەيىن, ياعني, 65 پايىزعا وسكەن. ال قوسالقى بولشەكتەر مەن جيىنتىق ماتەريالدارعا جۇمسالاتىن شىعىن 80 پايىزعا ارتقان.
بۇگىندە استانانىڭ قوعامدىق كولىك سالاسىندا 50 باعىت بويىنشا قىزمەت كورسەتەتىن 8 كومپانيا بار. اۆتوپاركتەردەگى 890 اۆتوبۋستىڭ 734-ءى كۇندەلىكتى جەلىگە تۇراقتى تۇردە شىعادى. 2008 جىلدان بەرى ەلورداعا 406 اۆتوبۋس ساتىپ الىنعان ەكەن. بۇدان وزگە, 76 باعىتتى قۇرايتىن جاڭا مارشرۋتتىق جەلى جاسالىپ, ەكسپرەسس-مارشرۋتتار ىسكە قوسىلعان. «استانا حالقىنىڭ كوبەيىپ كەلە جاتقانىنا سايكەس, ەلوردادا اۆتوبۋستار تاپشىلىعى ءالى دە بار. سونىڭ ءبىر سەبەبى – ءجۇرگىزۋشىلەردىڭ جەتىسپەۋىندە بولىپ وتىر. قىستا بىرقاتار جولاۋشىلار كولىكتەرىنىڭ قاڭتارىلىپ تۇرۋىنا جۇرگىزۋشىلەردىڭ اياق استىنان كەتىپ قالۋى سەبەپ بولدى. جالاقىلاردىڭ ازدىعىنا بايلانىستى بۇل ماماندار دا بىزدە تۇراقتامايدى. سوندىقتان ءتاريفتى كوتەرۋ قاجەتتىلىكتەن تۋىنداپ وتىر» دەدى راشيد امانجولوۆ. ونىڭ ايتۋىنشا, قازىرگى كۇنى ەلوردانىڭ قوعامدىق كولىكتەرىنە 250 جۇرگىزۋشى جەتىسپەيدى ەكەن.
بۇدان كەيىن قالالىق جولاۋشىلار كولىگى سالاسىندا قولعا الىنعان جوبالار توڭىرەگىندە اڭگىمە قوزعاعان باسقارما باسشىسى بۇگىنگە دەيىن گازبەن جۇرەتىن 350 جاڭا اۆتوبۋس ساتىپ الىنعانىن, كەيىن ارناۋلى جولدارمەن جۇرەتىن جۇردەك اۆتوبۋستار جەلىسى, كولىكتەردىڭ ءجۇرىسىن رەتتەيتىن جاڭا باعدارشامدىق باعدارلاما ىسكە قوسىلاتىنىن, مۇنىڭ ءبارى قوسىمشا شىعىندى قاجەت ەتەتىنىن اتاپ كورسەتتى.
قوعامدىق كولىكتە ءبىر رەتتىك جول ءجۇرۋ اقىسىن كوتەرۋ ماسەلەسى ءالى دە تالقىلانادى.
قىمبات نۇرعالي
