الماتى
الماتىدا «Smart City» جوباسى اياسىندا يتالياندىق ينۆەستيتسيا ەسەبىنەن كولىكتى مينۋتپەن جالعا بەرەتىن «Anytime» كارشەرينگ-سەرۆيسى اشىلدى. جالعا العان اۆتوموبيلمەن تەك شاھار ىشىندە عانا ەمەس, قالا سىرتىنداعى مەدەۋگە, ۇلكەن الماتى كولىنە, ءتىپتى قاپشاعايعا دەيىن بارۋعا بولادى.
اقمولا وبلىسى
ءبىرجان سال اۋدانىندا بيلەر كەڭەسى قۇرىلدى. بۇل كەڭەسكە قازاق بيلەر سوتى قىزمەتىنىڭ نەگىزگى پرينتسيپتەرىن جاڭعىرتىپ, ونىڭ ىشىندە داۋلاسقان تاراپتاردى دانا شەشىمدەرىمەن تاتۋلاستىرۋ ميسسياسى جۇكتەلىپ وتىر.
قوستاناي وبلىسى
بيىل قوستاناي وبلىسىندا 5 ملن 214 مىڭ توننا استىق جينالىپ, ورتاشا ءتۇسىم 12,8 تسەنتنەردى قۇرادى. ال قازان ايىنىڭ باسىنان بەرى 73 مىڭ توننا بيداي تەمىر جول ۆاگوندارىنا تيەلىپ, ونىڭ 54,6 مىڭ تونناسى ەكسپورتقا شىعارىلدى.
قىزىلوردا
وبلىس ورتالىعىندا «قورقىت-قوبىز» رەسپۋبليكالىق بايقاۋى ءوتىپ, 17-55 جاس ارالىعىنداعى 17 ونەرپاز باق سىنادى. بايقاۋ قورىتىندىسى بويىنشا استانالىق شولپان شاراپاتوۆا باس جۇلدەنى قانجىعالادى.
تۇركىستان وبلىسى
سوزاق اۋدانىنىڭ 90 جىلدىعى قارساڭىندا 24 نىسان پايدالانۋعا بەرىلدى. بۇدان بولەك, وسى اۋدانعا قاراستى شولاققورعان, جۋانتوبە, جارتىتوبە, سىزعان قىزىلكول اۋىلدارىنىڭ نەگىزگى كوشەلەرى جارىقتاندىرىلدى.
ماڭعىستاۋ وبلىسى
اقتاۋلىق عالىمدار ەلەكتروموبيلدى قۋاتتايتىن ستانسا جاساقتادى. ەكى ستانسانىڭ تولىق قۋاتتاۋ تسيكلى ءۇش ساعاتتان تۇرادى. مۇندا كۇنىنە 8 كولىكتى قۋاتتاۋعا بولادى.
قاراعاندى وبلىسى
«بيزنەستىڭ جول كارتاسى – 2020» باعدارلاماسى بويىنشا قاراعاندىدا جاس كاسىپكەرلەر مەكتەبى اشىلدى. مۇندا 18-29 جاس ارالىعىنداعى جاستارعا ءدارىس وتكىزىلەدى. وقىتۋ بارىسىندا تىڭداۋشىلارعا بيزنەس قۇرۋ كەزىندە قانداي زاڭنامالىق, ەكونوميكالىق جانە الەۋمەتتىك ءماسەلەلەردىڭ كەزدەسەتىنى تۋرالى ايتىلادى.
