قۇتقارۋشىلار كۇنىنە وراي «استانا جاستارى» كوممۋنالدىق مەملەكەتتىك مەكەمەسىنىڭ باستاماسىمەن سارىارقا اۋدانى اكىمدىگىنىڭ عيماراتىندا ورتكە قارسى وقۋ-جاتتىعۋ ءوتتى.
دابىل دىبىسىن ەستىگەن بويدا اتالمىش اۋدان اكىمدىگىنىڭ قىزمەتكەرلەرى مەن كەڭسەلەرى, وسى عيماراتتا ورنالاسقان بىرنەشە ۇيىمنىڭ ماماندارى – بارلىعى 100-دەن اسا ادام 2 مينۋتتىڭ ىشىندە سىرتقا شىعارىلدى.
– بىزگە شاقىرتۋ تۇسكەن سوڭ كيىنۋگە, دايىندالۋعا 1 مينۋت قانا ۋاقىت بەرىلەدى. ال وقيعا ورنىنا 5 مينۋتتا جەتتىك. عيماراتتىڭ ەكىنشى قاباتىنداعى 70 شارشى مەتر بولاتىن ءماجىلىس زالىندا سىمنىڭ قىسقا تۇيىقتالۋى سالدارىنان شىققان «ءورت» دەر كەزىندە ءسوندىرىلدى. كولىك جۇرگىزۋشىسىن قوسقاندا بارلىعى 14 مامان مەن 3 تەحنيكا جۇمىلدىرىلدى, – دەيدى استانا قالاسى تجد ءورت ءسوندىرۋ جانە اپاتتىق قۇتقارۋ جۇمىستارى بويىنشا 5-مامانداندىرىلعان ءورت ءسوندىرۋ ءبولىمىنىڭ اعا ينجەنەرى نۇرزات بورىباەۆ.
شارا سوڭىندا «استانا جاستارى» كمم باسشىسى ۇكىباي نۇرپەيىسوۆ قۇتقارۋشىلاردى ارنايى العىس حاتپەن ماراپاتتاپ, ەڭبەكتەرىنە جەمىس تىلەدى. «بۇل شارانى وتكىزۋدەگى ماقساتىمىز – وسى مەكەمەدە ەڭبەك ەتەتىن بارلىق ادامداردى ءتۇرلى وقىس جاعدايلارعا دايىن بولۋعا شاقىرۋ, ولاردىڭ قاۋىپسىزدىگىن ساقتاۋ» دەيدى اتالمىش مەكەمەنىڭ ۇيىمداستىرۋ ءبولىم باسشىسى ايان ەرمەنتاەۆ.
