جۇمىسشىلاردى بەلسەندى بولۋعا شاقىردى
استانا قالالىق ينۆەستيتسيالار جانە دامۋ باسقارماسىنىڭ باسشىسى الىشەر ابدىقادىروۆ كەشە 500-دەي ادام جۇمىس ىستەيتىن «Astana يۋتاريا ltd» ويك» جشس جۇمىسشىلارىمەن كەزدەستى. وندا ەلباسى جولداۋىنىڭ ورىندالۋ بارىسى مەن العا قويعان مىندەتتەر جايلى ءسوز قوزعالدى.
«قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» دەپ اتالعان پرەزيدەنت جولداۋى, ارينە, وسى زاۋىت ەڭبەكشىلەرىنىڭ دە مۇددەسىن كوكسەيدى. اتاپ ايتقاندا, حالىقتىڭ تۇرمىس ساپاسىن كوتەرىپ, ءاربىر ازاماتتىڭ باقىتتى ءومىر كەشۋىنە جول اشۋدى كوزدەيدى. بۇل ورايدا, باسقارما باسشىسى الىشەر ابدىقادىروۆ بۇگىنگى كۇنى قالادا تۇرمىس ساپاسىن جاقسارتۋ باعىتىندا قانداي جۇمىس جاسالىپ جاتقانىن ايتىپ ءوتتى. اتقارىلعان شارالارعا توقتالعاندا ەڭ الدىمەن «call center» ورتالىعى اشىلعانىنا توقتالدى.
قالاداعى تۋ كورسەتكىشىنىڭ جوعارىلىعى, ىشكى كوشى-قون ناتيجەسىندە كوشىپ كەلىپ جاتقانداردىڭ كوپتىگى – جالپى قالا حالقىنىڭ كوبەيۋى كەيبىر اۋدانداردا مەكتەپ, بالاباقشا, ەمحانا جەتىسپەۋشىلىگىن تۋدىرىپ وتىرعانىن ايتقان باسقارما باسشىسى الداعى بەس جىلدا بۇل تالاپتار قاناعاتتاندىرىلاتىنىن مالىمدەدى. سونىمەن بىرگە: «سىزدەرگە كورشى بولىپ, تۇرعىن ءۇي سالۋ كومبيناتى اشىلادى. ول كىرپىشپەن قالاعانداي ەمەس, لەگو قۇراستىرعانداي جىلدامداتىپ ۇيلەر تۇرعىزۋعا جول اشادى. سونىڭ ارقاسىندا نارىقتاعى تۇرعىن ءۇي باعاسى دا تومەندەپ, ازاماتتاردىڭ باسپاناعا قول جەتكىزۋى جەڭىلدەيتىن بولادى» دەپ تۇيىندەدى ءوز ءسوزىن ءا.ابدىقادىروۆ.
استانادا ادامداردىڭ يگىلىگىنە جاسالعان ءاربىر ءىستىڭ جەمىسىن قالا تۇرعىندارىمەن بىرگە وسى زاۋىت جۇمىسشىلارى دا كورەتىنىن ەسكە سالعان باسقارما باسشىسى قىسقاشا بايانداماسىنان كەيىن زاۋىت قىزمەتكەرلەرىنىڭ ساۋالدارىنا جاۋاپ بەردى.