سولتۇستىك قازاقستان وبلىسى
بۋلاەۆ قالاسىندا باتىر بايان اتىنداعى سپورت كەشەنى اشىلدى. نىساننىڭ قۇرىلىسىنا 107 ملن تەڭگە جۇمسالدى. اۋماعى 1100 شارشى مەتردى الىپ جاتقان كەشەندە فيتنەس, اۋىر اتلەتيكا سەكىلدى وزگە دە امبەباپ ويىن زالدارى بار.
اقتوبە وبلىسى
وبلىس ورتالىعىنداعى مەكتەپتەردى جوندەۋگە 1,8 ملرد تەڭگە ءبولىندى. بۇعان قوسا, جىل سوڭىنا دەيىن ءبىلىم مەكەمەلەرى كومپيۋتەرمەن 100 پايىز قامتاماسىز ەتىلمەك.
اتىراۋ وبلىسى
اتىراۋدا ەلوردانىڭ 20 جىلدىعىن تويلاۋ اياسىندا ۇلتتىق سپورت تۇرلەرىنەن جارىس ءوتتى. وعان 7 ەلدەن 300-گە جۋىق سپورتشى قاتىستى.
تۇركىستان وبلىسى
تۇركىستان وبلىسى شەتەلگە 4,5 مىڭ توننا سيىر ەتىن ەكسپورتتادى. ايماقتا وسى جىلدىڭ 9 ايىندا ءىرى قارا مال سانى 11 پايىزعا ارتىپ, 972,6 مىڭعا جەتكەن.
قاراعاندى وبلىسى
قاراعاندىدا «دۇنيەگە كەلەر ءالى تالاي قاسىم» اتتى اقىندار بايقاۋى ءوتتى. رەسپۋبليكالىق دەڭگەيدە وتكەن جارىسقا ەلىمىزدىڭ ءار ايماعىنان 18 بەن 40 جاس ارالىعىنداعى 70 ادام ءوتىنىش تاپسىرعان.
شىعىس قازاقستان وبلىسى
جارما اۋدانىنىڭ ورتالىعىندا اقىن, فيلولوگيا عىلىمدارىنىڭ دوكتورى, حالىق جازۋشىسى تۇرسىنحان ءابدىراحمانوۆانىڭ ەسكەرتكىشى اشىلدى. ونىڭ بيىكتىگى 6 مەتردى قۇرايدى.
قىزىلوردا وبلىسى
قىزىلوردا قالاسىندا قازاقى كىلەم توقيتىن شەبەرلەردى قولداۋعا ارنالعان «Kilem Fest» اتتى كورمە-فەستيۆالى ءوتتى. ءىس-شارا بارىسىندا قازاقى كىلەمنىڭ باعاسى 370-400 مىڭ تەڭگەگە دەيىن ساۋدالاندى.
قوستاناي وبلىسى
قوستاناي وبلىسىنداعى 864 مىڭ تۇرعىننىڭ 73 پايىزى ەلەكتروندى دەنساۋلىق تولقۇجاتىنا يە. الداعى ۋاقىتتا ءوڭىر تۇرعىندارى بۇرىنعىداي امبۋلاتوريالىق كارتانى پايدالانبايدى, ەندى دارىگەر قابىلداۋىنا ەلەكتروندى تۇردە جازىلادى.
