استانا
ەلوردادا «1س» بيزنەس-فورۋمى ءوتتى. جيىنعا قاتىسۋشىلار IT– كومپانيالار مەن باعدارلامالىق ونىمدەردى جاسايتىن جەتەكشى كومپانيالار جوبالاردى ىسكە اسىرۋداعى تاجىريبەلەرىمەن, جاڭا تسيفرلىق تەحنولوگيانى قولدانا وتىرىپ, پايدانى ۇلعايتۋدىڭ جولدارىمەن ءبولىستى.
الماتى
قالاداعى جىلدامدىقتى ولشەۋ قۇرىلعىلارى كوشە بويىنداعى بارلىق قوزعالىستىڭ ورتاشا جىلدامدىعىن ولشەيتىن بولادى. بۇل جاڭا ءتارتىپ 1 جەلتوقساننان باستاپ ەنگىزىلەدى.
اقمولا وبلىسى
كوكشەتاۋ قالاسىندا الداعى جىلى جىلۋ ەلەكتر ورتالىعىنىڭ قۇرىلىسى باستالادى. اتالعان نىسان مەملەكەتتىك-جەكەمەنشىك ارىپتەستىك اياسىندا بوي كوتەرەدى. 176 ملرد تەڭگەگە باعالانعان جوبانى جۇزەگە اسىرۋعا سلوۆەنيالىق ينۆەستور ءوتىنىش بىلدىرگەن.
اتىراۋ وبلىسى
وبلىس ورتالىعىندا العاش رەت شەتەلدىك «International Education Fair» جوعارى وقۋ ورىندارىنىڭ ەكى كۇندىك كورمەسى باستالدى. ءبىلىم كورمەسىنىڭ العاشقى كۇنىندە 2 مىڭعا جۋىق اتىراۋلىق ءبىلىم گرانتتارىمەن تانىسىپ ۇلگەردى.
شىمكەنت
قازاقستانداعى وزبەكستان جىلىنا وراي تۇسىرىلگەن «باۋىرلاس ەل» اتتى دەرەكتى ءفيلمنىڭ تانىستىرىلىمى بولدى.
پاۆلودار وبلىسى
پاۆلودار قالاسىنىڭ مامانداندىرىلعان اكىمشىلىك سوتى «تۇنگى سوت» پيلوتتىق جوباسى اياسىندا 441 ءىستى قارادى. ونىڭ 129-ى جول-كولىك وقيعاسىنا قاتىستى بولعان.
تۇركىستان وبلىسى
وبلىس ورتالىعىندا «تەرەڭ تاريحتان – جارقىن بولاشاققا!» اتتى وبلىس اكىمىنىڭ جۇلدەسى ءۇشىن رەسپۋبليكالىق پىكىرسايىس ءوتتى. بۇل شاراعا ەلىمىزدىڭ تۇكپىر-تۇكپىرىنەن كەلگەن تاجىريبەلى تورەشىلەر مەن جاس پىكىرسايىسشىلار باق سىناستى.
جامبىل وبلىسى
پرەمەر-مينيستر باقىتجان ساعىنتاەۆ جۇمىس ساپارىمەن تارازعا بارىپ, ايماقتاعى پرەزيدەنت تاپسىرمالارىنىڭ ورىندالۋ بارىسىمەن تانىستى. ۇكىمەت باسشىسى ءبىلىم بەرۋ, دەنساۋلىق ساقتاۋ, تكش سالالارىنداعى كورسەتىلەتىن قىزمەتتەر ساپاسىن ارتتىرۋ جانە وڭىردە تاريفتەردى تومەندەتۋ بويىنشا قابىلدانىپ شارالارعا قاتىستى نۇسقاۋ بەردى.
