جالپىحالىقتىق ديكتانت بۇل كۇنى رەسپۋبليكامىزدىڭ تۇكپىر-تۇكپىرىندە ۇيىمداستىرىلدى. وعان جاسى 15-تەن اسقان 2 ميلليونداي تۇرعىن قاتىسقان ەكەن. ونىڭ ىشىندە 50 مىڭعا جۋىق استانالىق بار.
– ەۋروپانىڭ كوپتەگەن دامىعان ەلدەرىندە حالىقتىڭ ساۋاتتىلىعىن كوتەرۋ ءۇشىن جاپپاي ديكتانت جازعىزۋ ءۇردىسى قالىپتاسقان. ءبىز دە ەندى مۇنداي شارانى جىل سايىنعى داستۇرگە اينالدىرماقپىز. لاتىن قارپىمەن ءجيى-ءجيى جازۋ جازعان سوڭ, ادامداردىڭ كوزى دە, قولى دا تەز ۇيرەنەدى, – دەيدى مادەنيەت جانە سپورت مينيسترلىگى جانىنداعى ءتىل ساياساتى كوميتەتىنىڭ باسشىسى قۋات بوراشەۆ.
ديكتانت جازىپ شىققان كىسىلەردىڭ ءبىرازى جاڭا ءالىپبيدىڭ ىڭعايلى ءارى وڭاي ەكەنىن ايتتى. مىسالى, ەلوردا تۇرعىنى ارداق ءالجانوۆانىڭ ويىنشا, لاتىن قارپىنە ۇيرەنۋ, اسىرەسە, جاستار ءۇشىن قيىنعا سوقپايدى.
– بۇعان دەيىن دە ءبىز سمارتفوندا لاتىن ءالىپبيىنىڭ پەرنەتاقتاسىن قولداناتىنبىز. جاڭا الىپبيدەگى ارىپتەردىڭ كوبىسى تۋرا سول الفاۆيت بويىنشا جازىلادى عوي. سوندىقتان ديكتانتتى جازۋ بارىسىندا ونشا قينالمادىق, – دەيدى ول.
الايدا كەي ازاماتتار جاڭا ءالىپبيدىڭ قولايسىز تۇستارىنىڭ دا جوق ەمەستىگىن جەتكىزدى. ءوزىن رۋسلان بەگەن دەپ تانىستىرعان جاس جىگىتتىڭ ايتۋىنشا, «ش» جانە «چ» دىبىستارىنىڭ قوسارلانا كەلەتىن جەرلەرىندە ءسوز تىم ۇزاق بولىپ كەتەدى.
– «ش» دىبىسى جاڭا الىپبيدە «sh», ال «چ» دىبىسى «ch» رەتىندە بەلگىلەنگەن. «ەسىكتى اششى» دەپ جازار بولساق, ەكىنشى ءسوزدى «ashshy» دەپ جازۋعا تۋرا كەلەدى. سونىڭ ورنىنا مەن وزگە تۇركى ەلدەرىندەگىدەي «ş», «ç» دەپ جازۋدى ۇسىنار ەدىم, – دەيدى رۋسلان.
ال ايسۇلۋ ەسىمدى ستۋدەنت قازاقشا «ۋ» دىبىسىنىڭ جاڭا الىپبيدە «ý» دەپ جازىلۋى ادامدى ءسال شاتاستىراتىنىن ايتتى:
– «ۋ» دىبىسىن باسقا بارلىق جەرلەردە «u» دەپ تاڭبالاۋعا ۇيرەنىپ قالىپپىز. ءوز اتىمدى جازا باستاسام, ءسوزدىڭ سوڭىنا اۆتوماتتى تۇردە «u» ءارپىن قويىپ جىبەرەم, – دەيدى ول.
