استانا
ەلوردالىق سالىق قىزمەتكەرلەرى ءتيىستى ماقساتتا پايدالانىلماي جاتقان 100-دەن استام جەر تەلىمىن انىقتادى. ەندى ءتيىستى مىندەتتەمەلەرىن ورىنداماعان ازاماتتار ون ەسە كوپ مولشەردە سالىق تولەۋگە مىندەتتەلدى. ونىڭ جالپى سوماسى 197 ملن تەڭگەنى قۇرايدى. دەپارتامەنت وكىلدەرى سالىق زاڭناماسىن بۇزعان تۇرعىنداردىڭ اكىمشىلىك جاۋاپقا تارتىلاتىنىن ەسكەرتۋدە.
الماتى
التىنشى شىلدەدەن باستاپ الماتى قالاسىنان كولساي كولدەرى, شارىن شاتقالى جانە باسقا دا تانىمال باعىتتارعا باراتىن تۋريستىك اۆتوبۋستار بالۋان شولاق اتىنداعى سپورت جانە مادەنيەت سارايىنىڭ جانىنان جۇرەتىن بولادى. بۇل وزگەرىستەر قالا تۇرعىندارى مەن قوناقتارىنىڭ قالاعان جەرىنە قاۋىپسىز جانە جايلى جەتۋىن قامتاماسىز ەتۋ ءۇشىن قابىلدانعان.
جامبىل وبلىسى
ەلوردانىڭ مەرەيتويىنا ارنالعان «20 جىلدىققا – 20 نىسان» جوباسى اياسىندا جامبىل وبلىسىنىڭ اۋداندارىندا 20 الەۋمەتتىك نىسان پايدالانۋعا بەرىلمەك. اتالمىش نىسانداردىڭ قاتارىندا كۇن ەلەكتر ستانساسى, تاريحي مۋزەي, امبۋلاتوريا, ساۋىقتىرۋ كەشەنى, سپورت الاڭقايى, «Qasyq» كووپەراتيۆى, ءوندىرىس وشاعى, ءسۇت زاۋىتى جانە بىرنەشە بالاباقشا بار.
وسكەمەن
الاكولگە ەندى شارشاپ-شالدىقپاي جەتۋگە بولادى. وتكەن اپتادان باستاپ وسكەمەندەگى زاششيتا تەمىرجول ستانساسىنان «وسكەمەن-جالاڭاشكول» باعىتىنداعى العاشقى جولاۋشىلار پويىزى جولعا شىقتى.
اتىراۋ
اتىراۋداعى از قامتىلعان وتباسىنان شىققان 40 بالا يتاليادا دەمالۋدا. بالالاردىڭ شەتەلگە بارىپ, دەمالۋلارى ءۇشىن قاجەتتى جولدامانى اتىراۋ وبلىستىق ءبىلىم باسقارماسى ۇيىمداستىرعان. يتاليانىڭ چەزەناتيكو قالاسىندا ورنالاسقان بالالاردىڭ جازعى دەمالىسى
3 شىلدەگە دەيىن جالعاسادى.
پاۆلودار
پاۆلوداردا اتتى پوليتسيا ۆزۆودى قۇرىلدى. استانا قالاسىنان اكەلىنگەن 15 ات جول-پاترۋلدىك پوليتسەيلەرىنە بەرىلدى. اتتى پوليتسەيلەر ۆزۆودى قالانىڭ وڭتۇستىك بولىگىندە ورنالاسقان «يۋجنىي» ساياجاي شارۋاشىلىعى اۋماعىندا قوعامدىق ءتارتىپتى قاداعالايتىن بولادى.
قوستاناي
قوستاناي قالاسىنىڭ №2 سوتىندا قازاقستان مەن رەسەي فەدەراتسياسىنان بىردەي زەينەتاقى الىپ كەلگەن رەسەي ازاماتىنا قاتىستى ءىس قارالدى. 2000 جىلى چەليابى وبلىسىنىڭ زەينەتاقى قورىنىڭ تىزىمىنە الىنعان زەينەتكەر 2003 جىلدىڭ ناۋرىز ايىنان 2018 جىلدىڭ ناۋرىزىنا دەيىن قازاقستاننان 15 جىل بويى زاڭسىز اقشا الىپ كەلگەن. وسى ۋاقىتقا دەيىن ەل بيۋدجەتىنەن 3968718 تەڭگە قاراجات يەمدەنگەن.
