حاكىم اباي, شاكارىم, مۇحتار اۋەزوۆ سەكىلدى الىپتار تۋعان توپىراقتان شىققان بەلگىلى اقىن, مەملەكەتتىك سىيلىقتىڭ لاۋرەاتى تىنىشتىقبەك ابدىكاكىمۇلى باس قالاعا كەلىپ, وقىرماندارمەن كەزدەسۋ وتكىزدى.
وقۋشىلار سارايىندا باستالعان جۇزدەسۋ كەيىن ۇلتتىق اكادەميالىق كىتاپحانادا «ولەڭ جازىپ وتىرعاندا, قۇدايدىڭ قولىنداعى جاسىندايمىن!..» اتتى جىر كەشىنە ۇلاستى. تىنىشتىقبەك – ادەبيەتكە ءاپ دەگەننەن ءوز ۇنىمەن كەلگەن اقىن. ونىڭ ولەڭدەرىنىڭ مازمۇنى, بوياۋى ەشكىمگە ۇقسامايدى. العاشقى جىر جيناعى «اقشام حاتتار» جارىق كورگەندە ادەبيەتىمىزدىڭ اۋزى دۋالى تۇلعالارى ءسوز ونەرىنە ورنەگى بولەك, شابىسى ەرەك جىر جۇيرىگى كەلگەندىگىن مويىندادى. جازۋشى ءابىش كەكىلباەۆ ونىڭ شىعارماشىلىعى تۋرالى ايتقاندا «ءبىرتۇرلى اقىن» دەگەن انىقتاما بەرگەن. وسى سوزگە ابدىكاكىمۇلىنىڭ بار بولمىسى سىيىپ تۇر. كەش بارىسىندا قالامگەردىڭ ءومىرى مەن ونەرى جايىندا بايىپتى اڭگىمە ايتىلىپ, ولەڭدەرى وقىلدى. اۆتوردىڭ ءوزى دە وقىرمانداردىڭ سۇراقتارىنا جاۋاپ بەردى.
سونداي-اق ءدال وسىنداي كەش ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جالعاستى. بۇل شارانى «كاۋسار» مادەني-تانىمدىق بىرلەستىگى ۇيىمداستىردى. كەشتە اقىن شىعارماشىلىعى تۋرالى جينالعاندارعا ءسوز قوزعاپ, الداعى جوسپارىمەن ءبولىستى. تىنىشتىقبەك اعانىڭ ايتۋى بويىنشا قازىر ون توم بولاتىن قولجازباسى دايىن تۇر ەكەن, الداعى جىلدارى ءۇش جىر جيناعىن شىعارۋ ويىندا بار ەكەنىن جەتكىزدى. سونىمەن بىرگە كەزدەسۋدە ستۋدەنتتەر اقىن ولەڭدەرىن وقىپ, جىرسۇيەر قاۋىمنىڭ ءشولىن قاندىردى. تالانتتى ونەر يەسى كەنجەعالي مىرجىقباي سەمەيدەن ات ارىتىپ كەلگەن قۇرداسىنىڭ قۇرمەتىنە اننەن شاشۋ شاشتى.
كەزدەسۋدە ۋنيۆەرسيتەت پرورەكتورى, بەلگىلى عالىم ديحان قامزابەكۇلى ءسوز الىپ, وقۋ ورداسىنىڭ باسشىسى ەرلان سىدىقوۆتىڭ اتىنان اقىنعا شىعارماشىلىق تابىس تىلەپ, ۋنيۆەرسيتەتتىڭ عىلىمي كەڭەسىنىڭ شەشىمىمەن «كۇلتەگىن» مەدالىمەن ماراپاتتادى.
فاريدا كاريموۆا
