ينۆەستيتسيالار كولەمى ءۇش ەسەگە ءوستى

استانا حالىقارالىق قارجى ورتالىعى (احقو) الاڭىندا شەتەلدىك ەلشىلەرمەن وتكەن كەزدەسۋدە ەلوردا اكىمى التاي كولگىنوۆ نۇر-سۇلتان قالاسىنىڭ الەۋمەتتىك-ەكونوميكالىق دامۋىندا تۇراقتى وسىمگە قول جەتكىزىپ, نەگىزگى كاپيتالعا سالىنعان ينۆەستيتسيا­لار كولەمىنىڭ 3 ەسەگە وسكەنىن مالىمدەدى. وسى باسقوسۋدا ەلوردامىزداعى ديپلو­ماتيالىق كورپۋستىڭ وكىلدەرىنە احقو-نىڭ حالىقارالىق اربيتراج ورتالىعى, ەكسپات ورتالىعى, ينۆەستيتسيا تارتۋعا جاسالعان قولايلى جاعدايلار, ىنتىماقتاستىقتىڭ كەلەشەكتەگى باعىت-باعدارلارى تۋرالى ايتىلدى.احقو-نىڭ باسقارۋشىسى ­قايرات كەلىمبەتوۆ تۇڭعىش پرەزيدەنت – ەلباسى نۇرسۇلتان نازارباەۆتىڭ ەكسپو-قالا­شىق­تىڭ ينفراقۇرىلىمىن احقو-عا بەرۋ جونىندەگى شەشىمىنىڭ ارقاسىندا وسى جەردە احقو, IT Hub جانە IT University جۇمىس ىستەيتىنىن اتاپ ايتتى. «احقو اعىلشىن قۇقىنا نەگىزدەلگەندىكتەن ەرەكشە رەتتەۋ ءتارتىبىن قولدانادى. سونداي-اق بىزدە تاۋەلسىز رەتتەۋشى ورگاندار جانە ارنايى تاۋەلسىز سوت بار, الەمدىك نارىقتار ءۇشىن حالىق­ارالىق الاڭ قۇرىلۋدا. بۇگىنگە دەيىن 180 ملن اقش دوللارىنان اسا سوماعا ينۆەستيتسيا­لار تارتىلدى» دەپ ءتۇسىندىردى ق.كەلىمبەتوۆ.
ەلوردا اكىمى التاي كولگىنوۆ ەل باسشىلىعىنىڭ ينۆەستيتسيا تارتۋعا ەرەكشە كوڭىل ءبولىپ وتىر­­عانىنا توقتالدى. «ءبىز ينۆەستورلارعا بارىنشا اسا قولايلى جاعداي تۋعىزۋعا ۇمتىلامىز. مىسالعا, اكىمشىلىك رەتتەۋ جەڭىلدەتىلدى, بيزنەس جۇرگىزۋ شىعىندارى قىسقاردى, قالانىڭ تسيفرلىق ارحيتەكتۋراسى قالىپتاسىپ كەلەدى. تسيفرلىق ارحيتەكتۋرانى قولدانۋ اياسىندا قالا تۇرعىندارى مەن كاسىپكەرلەرگە كورسەتىلەتىن قىزمەت تۇرلەرى ەلەكتروندىق فورماتپەن ۇسىنىلادى. بىزدە الەۋمەتتىك جانە ەكونوميكالىق ماسەلەلەردى وڭ شەشۋگە مۇمكىندىك بەرەتىن تسيفرلىق تەحنولوگيالاردى قولدانۋدىڭ تابىستى ۇلگىلەرى بار. بۇعان مىسال رەتىندە smart-ءبىلىم بەرۋدى, smart-مەديتسينانى, open data-نى, Smart Astana ءموبيلدى قوسىمشاسىن, ە-پيك-ءتى كەلتىرۋگە بولادى» دەدى قالا باسشىسى.
باس قالانى ىسكەرلىك جانە وقيعالىق ءتۋريزمنىڭ حالىقارالىق ورتالىعى دەپ اتاۋعا تولىق نەگىز بار ەكەنى اتاپ ايتىلدى. سونىمەن قاتار, كەشەندى تۇردە شەشۋدى تالاپ ەتەتىن بىرقاتار ماسەلەلەر بار. قالا اكىمدىگى ەلوردانىڭ 2050 جىلعا دەيىنگى دامۋ ستراتەگياسىن ازىرلەدى. كەزدەسۋ بارىسىندا ديپلو­ماتيالىق كورپۋس وكىلدەرى تابىستى ىنتىماقتاستىقتىڭ ماڭىز­دىلىعىن قاداپ ايتتى. اكىمدىك, «Astana Invest» قالالىق ينۆەستيتسيالاردى دامىتۋ ورتالىعى مەن فرانتسۋز رەسپۋبليكاسىنىڭ توتەنشە جانە وكىلەتتى ەلشىسى فرانتسيانىڭ ينۆەستيتسياسى ەسەبىنەن جەكەمەنشىك مەكتەپ سالۋ جوباسىن ىسكە اسىرۋعا كەلىستى.