بۇگىن استانا قالاسىندا اسىق اتۋدان «التىن ساقا» حالىقارالىق ءتۋرنيرى باستالدى. قالا كۇنىنىڭ قۇرمەتىنە وراي وتكىزىلىپ وتىرعان اسىق ءتۋرنيرىن «اسىق اتۋ» رەسپۋبليكالىق فەدەراتسياسى, ەلوردالىق دەنە شىنىقتىرۋ جانە سپورت باسقارماسى, استانا قالاسى اكىمدىگىنىڭ «سپورتتىق-بۇقارالىق شارالاردى وتكىزۋ ديرەكتسياسى» ۇيىمداستىرىپ وتىر.
وسىمەن 8-ءنشى رەت ۇيىمداستىرىلىپ وتىرعان ءداستۇرلى تۋرنيرگە قىرعىز ەلى ەكى بىردەي كوماندا الىپ كەلىپتى. سونداي-اق, ەلىمىزدىڭ ءار وبلىسىنان تاعى 9 كوماندا كەلىپ قاتىسىپ جاتىر. «بۇگىنگى كۇنى ۇلتتىق سپورت تۇرلەرىمەن اينالىساتىنداردىڭ قاتارى ارتىپ كەلەدى. وسىمەن 8-ءشى رەت وتكىزىلىپ وتىرعان استانا كۇنىنە ارنالعان «التىن ساقا» حالىقارالىق ءتۋرنيرى – سونىڭ ءبىر دالەلى. ۇلتتىق ويىنىمىز اسىق اتۋ سايىسىن وتكىزۋدەگى نەگىزگى ماقسات – ۇلتتىق سپورت ءتۇرىن قايتا جاڭعىرتۋ جانە دامىتۋ, سونداي-اق, قالا تۇرعىندارى مەن قوناقتارىنىڭ, اسىرەسە, بالالاردىڭ اتالعان سپورت تۇرىنە دەگەن قىزىعۋشىلىعىن ارتتىرۋ. سونىمەن قاتار, شەت ەلدەردەن كەلگەن كوماندالارعا ءبىر-بىرىمەن تانىسىپ, ءوزارا تاجىريبە الماسۋ. اسىق سەكىلدى قۇندىلىقتارىمىزدىڭ استارىندا ءبىزدىڭ تاريحىمىز جاتىر. بۇل ويىن ءتۇرى جاس بالالاردى مىقتىلىققا, مەرگەندىككە ۇيرەتەدى. سوندىقتان دا بۇل ءتۋرنيردىڭ تاربيەلىك ءمانى زور» دەيدى استانا قالاسى كومانداسىنىڭ اعا جاتتىقتىرۋشىسى ءارى باس تورەشىسى ەسكەندىر راحمەتوۆ.
تۋرنيرگە مونعوليا, قىرعىزستان, تاجىكستان, ازەربايجان, تۇركيا, قىتاي جانە رەسەي كوماندالارى كەلۋلەرى ءتيىس بولعان. الايدا بەلگىلى سەبەپتەرمەن كوبىسى كەلە الماپتى. اسىق اتۋ سايىسىنا قاتىسۋشى كوماندالاردان بولەك ەرەجەگە سايكەس, جاسى 16-عا تولعان كەز-كەلگەن قالا تۇرعىنى قاتىسا الادى. بۇگىن شىمىلدىعىن تۇرگەن شارا ەرتەڭگە دەيىن جالعاسادى.
بۇركىت نۇراسىل
